Roma 13 - Allah Wene Hurumbik Keron

It inowesi pemerintah epmano inune holtuk amuk-o ulug yig isebahon wene 13:1-7

¹ Eke it yi aphe di aphe obohen it inowesi pemerintah epmano inune inesanggo holukag-o. Eke At Allahen it inowesi pemerintah epmano wene baltuk amag ulug minduhup isarisi fuhon misig wereg eleg-o. Eke it pemerintah wene baltukon wereg epmano At Allahen-at minduhup isarisi-o.

² Eke ari fam, at ap misihen it inowesi pemerintah inune epmano sahaltuk halug, At Allahen minduhup isarision epmano at inune sahaltuk-o. Eke at ap misihen ariroho suruk halug, fobik ebe dag ariog ulug onggarehen-at oag del saruk-o.

³ Eke it inowesi pemerintah epmano it aphe fano surukon epmanowen inakol isawag ulug minduhup isarisi fug-o. It aphe dag surukon epmanowen-at inakol isawag ulug minduhup isarisi-o. Eke hiren it inowesi pemerintah epmano ninakol isehe ha nowen ulug, fanowon epmano-at suruk amuk-o. Ariroho suruk hisalug, suontep hisahakup-o.

⁴ Eke hit hinebe fanoroho welamag ulug it inowesi pemerintah epmano At Allah anggimbu-at wereg-o. Ariroho wereg oke, hit dag suruk ahebon epmanowen hinakol isahup-o. Eke it inasehen ari it ap dag surukon angginon inobam umbukon ulug seneg wereg-o. It inebe At Allah anggimbu-at wilil, it aphe dag surukon epmano onggo imbiek yig isaruk amuog ulug inalontoho wereg-o.

⁵ Eke ari fam, it inowesi pemerintah epmano inune hinesanggo holtuk amuk-o. Eke ariroho holtuk wilil, onggo imbiek ulug yig hisawon etno inim, eke inuneyen ariroho siek ulug yig hisarukon etno inim, obog-at hinindi ebetuk wilil, hinesanggo holtuk amuk-o.

⁶ Eke ari halug, it ap wene baltukon arien yabuk surukon epmano onggo neken uang umburuk ahep-o. Eke it ineyabuk dombog-at suruk ari, At Allah anggimbu-at wilil suruk-o.

⁷ Eke ariroho suruk ari hag, uang etno ilitoho-at umburuk amuk-o. Ariroho suruk wilil, kwalem onggo etno inim-at umburuk amuk-o. Eke hit ariroho surukon epmano hinakoltoho wilil, it obog-at suontep isaruk amuk-o.

Hit hinomini hinim fanoroho welamuk-o ulug yig isebahon wene 13:8-14

⁸ Eke at misihen angge etno hobam nomat neken welam ari hai-o. Eke hit hit hinindi hunduhuk welamuk-o. Eke it epmano inomini inindi hunduhuk wereg halug, wene duroho suruk amuk eke duroho suruk am fug ulug ebahon etno ilitoho-at suruk-o.

⁹ Eke wene duroho suruk amuk eke duroho suruk am fug ulug ebahon etno yig nisaruk wilil, “Hwe ap inuhweon diloko wa fug-o, eke ap wabuk fug-o, eke yi angge di angge hinalomnangge herahuk fug-o, eke ap inaharek epmano hulik ulug hinahla buk fug-o, ulug ariroho komo yig nisebahon etno alem neken wene misig du wereg-o, eke hit hinebe hinonggarehen hinabua saruk ahep etno hag, it hinomini hinim welahebon epmano fanoroho inabua suruk amuk-o,” ulug yig nisaruk-o.

¹⁰ Eke inomini inindi hunduhuk wereg halug, dahon epmano inobam umburuk eleg-o. Eke ari halug, it aphe inim hinindi hunduhuk wereg hisalug wene duroho suruk amuk eke duroho suruk am fug ulug ebahon etno ilitoho-at suruk-o.

¹¹ Eke kidia o ari sambit welahe ulug hiniluk halug, ariroho yig hisihion epmano ilitoho-at suruk amuk-o. Eke hit nohoruk amon etno sohorep isalug, kidia minamon etno fam arat fanggog ehek-o. Eke fobik ninili wahu ulug ninahla buruk atukukon oke, ninili wawon etno horog fanggog uruk-o.

¹² Eke o hubanggo welamon etno arat eleg ariog ulug suruk ari fam, o seleg etno wariog ulug suruk-o. Eke ari halug, niren it o hubanggo werehon epmanowen surukon epmano sohorep isalug, o ilingge wilil surukon etno ninasehen ninasing wereg epmano hag sen salug welamuk-o.

¹³ Ariroho o ilingge wilil, motoho-at suruk amuk-o. Eke inahum heheg narukon epmano inim, eke ik nenek surukon donggogsoho narukon epmano inim, eke hwe ap uhweon wanggik surukon etno inim, eke winimug isarukon epmano inim, eke inasineyen surukon epmano inim, obog-at ariroho suruk am fug-o.

¹⁴ Eke At Ninowe Yesus Kristusen angge etno hinasehen hinasing neken wantalug wilil, hit hinebe kweanmon etnowen dahan fahan suk ulug hinahla bulug surukon etno hinesanggo holtug eleg ilitoho suk fug-o.