Matius 8 - Allah Wene Hurumbik Keron

At Yesusen ap misig uk honanggo hunduhukmu fano sebahon wene 8:1-4

¹ Yig isaruk apareg, eke fobik At Yesus etno dom famen ambik waharuk apagma, it aphe dohaleg welapahon epmano ombolim lebag.

² Ombolim laruk apagma, eke at ap honanggorohon misig etno ambeg waharuk apareg, indibahal yungguksoho kino yig ituk wilil, “Nowe-o, Haren fano nabuk behen halug, Haren fano nabuk hahla behenteg fam ari fano at-o,” ulug yig epag.

³ Yig ituk apagma, At Yesus etno inggik bungsoho sen haruk apareg, yig ituk wilil, “An fano habuk nahla bihireg fam, arat fano amin-o,” ulug yig ituk apagma, ap etno ukmu mondog eleg apag.

⁴ Eleg atuk apagma, At Yesusen yig ituk wilil, “Aphe nin yig isa fug-o. At Allah unde misig etnowen-at heawag ulug lag-o. Eke at Musaen ebag etno ilitoho, it aphe epma inahla bukag ulug, hat fano ahe­non arien At Allah ake imbik lag-o,” ulug yig epag.

At Yesusen ap suon anggimbu misig etno o Kapernaum etnowen fano sebahon wene 8:5-13

⁵ Yig ituk apareg, eke fobik o Kapernaum wapag. Waharuk apareg weregma, it Roma ap inowe misig olohotma laruk apareg, yig ituk wilil,

⁶ “Nowe-o, an nanggimbu misig uk hundutisireg uma yinggig wi­lil, oloken suruk-o. Ebe fano simihinen yig hirihi-o,” ulug yig epag.

⁷ Yig ituk apagma, At Yesusen yig ituk wilil, “An at fano siog ulug wapmin-o,” ulug yig ituk apagma, eke at ap suon etnowen yig ituk wilil,

⁸ “Eleg-o, Nowe. Hat hebe suon atma, Hat an nambeg wam ari hai-o. Hune dumen-at imihinmu, an nanggimbu etno fano arikon-o.

⁹ Eke an hag ariroho-at nowe suon etno apma welahion at-o. Ariroho wilil, an napma nosi epmano wereg-o. Eke an nanggimbu misig ‘lag-o’ ulug yig ituk nealug, laruk at-o. Eke ‘ma-o,’ ulug yig ituk nealug, waharuk at-o. Eke ari ‘sin,’ ulug nanggimbu misig yig ituk nealug, ilitoho at suruk-o,” ulug yig epag.

¹⁰ Ariroho yig epahon etno At Yesusen wi ulug ahla buruk apareg, eke fobik it aphe inim lebahon epmano yig isaruk wilil, “At ap duen nobam ebetuk hag? It Israel aphe ariroho nobam ebetuk isaruk ahi fug-o, ulug An demat yig hisaruk ahi-o.

¹¹ Eke misig du hinindi eberiek-o. It aphe anggolo emu filon inim, ahamu filon inim waharuk amuhupseg, it Abraham, Ishak, Yakub inim boholma At Allah weregma epmano e daleg etno fam horieg welamuhup-o.

¹² It epmano boholma welamuhup-at oke, eke it nin At Allah weregma inim welatlebon oke At obam ebetuk eleg etno fam o hikmu epmano hik isaruk aruhumu, epmen ioba yareheg, inayeg kilit mareheg suruk wilil welamuhup-o,” ulug yig isebag.

¹³ Yig isaruk apareg, At Yesusen ap inowe etno yig ituk wilil, “Hibam lamihinmu, hindi eberehenon etno ilitoho-at seg arikonma hilanggen hamihin-o,” ulug yig ituk apagma, inowe anggimbu etno ari sambit-at fano apag.

At Yesusen yi aphe di aphe nin eke at Petrus owe inim fano inapahon wene 8:14-17

¹⁴ Eke fobik At Yesus etno Petrus ibam epmano kuruk apareg, at Petrus owe etno uk salo wareg wilil yinggig weregma ilanggen hebag.

¹⁵ Ilanggen haruk apareg, at hwe etno inggik sen hebag. Sen haruk apagma, uk etno eleg apag. Eleg atuk apagma, at hwe etno minatuk apareg, aso welapag.

¹⁶ Ariroho weregma, eke fobik hupmu mo amburuk heheg, it aphe ninen inomini setan inindimu werehon epmano At Yesus ambeg imbisa wapag. Imbisa waharuk apagma, At Yesusen setan etno inenggali watuk apareg lisoko wilip iseheg, eke it yi uk di uk warehon halug fano inabeheg suruk apag.

¹⁷ Ariroho sebag ari, amuk at nabi Yesaya etnowen hurumbik yig isaruk wilil, “Uk ninidimu werehon epmano Aren ninonggo balfareg fam niren uk hundutuk aheon epmano Aren elehep nisaharisi-o,” ulug ebahon etno demat ebag ulug inahla bukag ulug At Yesusen ariroho sebag.

It apheyen yuhun-at Yesus ninim luk-o ulug yig epahon wene 8:18-22

¹⁸ Suruk apareg, At Yesus etnowen it aphe At ambeg wonggalfahon epmano imbisalug, At omini epmano inim ik le femag luk-o, ulug yig isebag.

¹⁹ Yig isaruk apagma, at ap wene unde misig ambeg waharuk apareg, yig ituk wilil, “Ninowe yanggul nisarukon wai. Hat o ahik ya da sil nuruk aruhun halug, an ninim-at sil nuruk amuhuken-o,” ulug yig epag.

²⁰ Yig ituk apagma, eke At Yesusen yig ituk wilil, “Bak halug, inibam e elma wereg-o. Eke sue boholma sil nurukon halug, inibam wereg-o. Eke An Allahen minduhup naharision etno kel siog ulug nunggul hopsoho ying am ambeg ari eleg-o,” ulug yig epag.

²¹ Yig ituk apagma, eke fobik ap misig At omininion etnowen yig ituk wilil, “Nowe-o, an bilin lalug nikni warehon kweanma salepfiminen yig nimin-o,” ulug yig ituk apagma,

²² At Yesusen yig ituk wilil, “Hat An ninim sil nuruk amuhuken ma-o. Eke it waratukon etnowen hag it warehon epmano kweanma salep isaruk amag ulug sohorep isin-o,” ulug yig epag.

At Yesus etnowen hiahne misig waharuk apagma bok amin-o ulug yig epahon wene 8:23-27

²³ Yig ituk apareg, At Yesus omini inim ikma so fam kebag.

²⁴ Kuruk apareg weregma, hetnogsoho hiahne suon misig waharuk wilil, ik yenggelegma aplohok anggolo suruk apareg ik etno leko so fam sal ha wapag. Sal ha waharuk heheg, At Yesus etno nohobag.

²⁵ At etno nohoruk heheg it omini epmano ambeg waharuk apareg, iluk hebag. Iluk haruk apareg, yig ituk wilil, “Ninowe-o, nit waramuog ulug suruk ahe du Haren ninili wimin-o,” ulug yig ituk apagma,

²⁶ At Yesusen yig isaruk wilil, “Hit Allah une fanoroho ebetuk ahep fug etno, keroho ulug hinakolen uruk ahep-o?” ulug yig isebag. Yig isaruk apareg, minatlug hiahne etno inim, ik etno inim winimug yig isaruk apagma, aplohok eleg apag.

²⁷ Ariroho eleg atuk apagma, it epmanowen fog suruk wilil, “Hiahne inim, ik inim epmano ap du une holoko bok ahesa du, wi, ap ebe sa buruk ahep-o?” ulug uruk apag.

O Gadara etnowon ap biren setan inindimu kebagma lisoko wilip isebahon wene 8:28-34

²⁸ Uruk apareg, ik etno baloko le femag laruk apareg, it Gadara ap inibam lebag. Laruk apagma, it ap biren setan inindimu kebahon etno aphe warehon imbisaruk ambeg o wikmu epmanowen ambeg wapag. Eke it ap etno aphe war inabil nuruk apag halug, it aphe kwalem apma ke lebag fug.

²⁹ Eke it etno At Yesus inune suon yig ituk wilil, “Hat Allah Amloho wai, keroho seko ninombisahiog ulug wahen-o? War ninabuk sambit etno awan waharuk eleg heheg, war ninabiog ulug wahen ano?” ulug yig epag.

³⁰ Yig ituk apagma, kwalem ke aphe inanggom anggolo kwean nil nuruk weregma,

³¹ it setan etnowen At Yesus yig ituk wilil, “Hat wilip isamin hahla behen halug, wam inindimu kukag ulug lahap nisahin-o,” ulug yig ituk apagma,

³² At etnowen, “Epma aliek-o,” ulug yig isebag. Yig isaruk apagma, it epmano wilik waharuk apareg wam epmano inindimu kebag. Kuruk apagma, yi wam di wam obog bule enggatgatma ununuroho laruk apareg, ikma epmano bule ambebagma, iken waroko og inaplug lebag.

³³ Og inaplug laruk apagma, it ap wam inaso welapahon epmano hite wilip atuk apareg, aphe inibam epmano wapag. Waharuk apareg, wam iken og inapahon wene etno inim, it ap setan inindimu kebahon fano inapahon wene etno inim obog-at dindiloko yig isebag.

³⁴ Yig isaruk apagma, it aphe umon obog-at Yesus ambeg waharuk apareg, ebe inilanggen halug, yig ituk wilil, “Hat nit ninibam duma sohorep isalug, lag-o,” ulug yig epag.