Matius 7 - Allah Wene Hurumbik Keron

Aphe oag del inabuk fug-o ulug yig isebahon wene 7:1-6

¹ At Yesusen yig isaruk wilil, “It apheyen hinoag del hinabuk nowen, hiren inoag deluk fug-o.

² Hiren oag del inaptuk ahep etno hag, iren fobik oag del hinabuhup-o. Eke hiren wal haruk ahep etno hag, iren fobik wal hahup-o.

³ Nin eke e asenggep doron hat homin ilanggenma werehon etno haruk ahenon oke, eke e asenggep suon hat hilanggenma werehon ari haruk ahen fug ano?

⁴ Hat hilanggenma e asenggep suon weregma, homin etno yig ituk wilil, ‘Hilanggenma e asenggep ari wilipminen bok amin-o,’ ulug keroho yig imuk-o?

⁵ Henggal-at uruk ahenon du, bilin e aseng­gep suon hat hilanggenma werehon etno wilipfulug fobik e aseng­gep homin ilanggenma werehon etno wilipfik ulug wal hahun-o.

⁶ Eke yi angge di angge fanowon etno it yangge og isa fug-o. Sulanggen fanowon etno wam elma hik ha fug-o. Hik hahunmu fobik wam iohen hondorepfulug dahagsoho libil habuk nowen og isa fug-o,” ulug yig isebag.

Sembahyang urukon wene 7:7-12

⁷ At Yesusen yig isaruk wilil, “Hit sembahyang kino uruk hisalug, og hisahu-o. Hit heaharuk ahebon etno heag sahup-o. Sok kik haruk hisalug, hut hisahu-o.

⁸ Eke ariroho-at it aphe obohen sembahyang kino uruk isalug, og isahu-o. Iren heaharukon etno heag sahup-o. Sok kik haruk isalug, hut isahu-o.

⁹ Eke hamloho etnowen orom og nimin-o ulug hobam kino urukmu, helep og um buruk ahen ano?

¹⁰ Eke ikan og nimin ulug kino uruk halug walo og um buruk ahen ano?

¹¹ Eleg-o. Ari halug, hit dahon etnowen hinudaki yi angge di angge fanowon-at og isaruk ahep halug, At Hinikni boholma werehon etno obam kino urukmu Aren fanowon-at og hisahu-o.

¹² Eke it apheyen ariroho fano ninaptuk amag ulug hinahla buruk hisalug ari hag, ilitoho at fano inaptuk amuk-o. Eke Anden ariroho yig hisihi ari, at Musa inim, it nabi ap epmano inimen wene duroho suruk amuk eke duroho suruk am fug ulug yig nisebag-o,” ulug yig isebag.

Kwalem doron larukon wene 7:13-14

¹³ At Yesusen yig isaruk wilil, “Kembatma kwalem doron etno kuruk amuk-o. O dag ambeg larukon kembat ele etno suon-at wereg-o, o epma larukon kwalem suon-at wereg-o. It aphe kwalem suon etno larukon inebe anggolo-at laruk-o.

¹⁴ Eke iniluk welam ambeg kwalem ele etno doron-at wereg-o, o epma aphe inebe dorat kembat ele doron etno heag saruk-o,” ulug yig isebag.

E misihen e misig anggen yihiruk eleg-o yig isebahon wene 7:15-20

¹⁵ Eke At Yesusen yig isaruk wilil, “It ap wene demat uruk elehon etno hinambeg waharukim yaharoho welamiek-o. It etno inasum selemon wam domba ahap neken wantehon oke, eke inindi undama oloyangge etnowen suruk hag aphe yuhun-at ayeg libil inaptuk-o.

¹⁶ Iren angge anggen yihiruk etno fam inobabut hiniluk aruhu-o. E sawin alog werehon etnowen anggur anggen yihiruk ano? Eke e dangganduk etnowen ombomi anggen yihiruk ano? Ari eleg-o.

¹⁷ Eke ari halug, e fanowon etnowen anggen fanowon-at yihiruk-o. Eke e dahon etnowen anggen dahon-at yihiruk-o.

¹⁸ E fanowon etnowen anggen dahon yihiruk eleg-o. Eke e dahon etnowen anggen fanowon yihiruk eleg-o.

¹⁹ E anggen fanowon yihiruk elehon epmano obog-at baloko hondokma yal inaptuk aruhu-o.

²⁰ Eke ari halug, iren anggen yihikon etno fam inobabut hiniluk aruhu-o,” ulug yig isebag.

Aphe inobabut surukon farim ebahon wene 7:21-23

²¹ Eke At Yesusen yig isaruk wilil, “Eke it Nowe, Nowe ulug yig nitukon epmano obogsoho At Allah weregma kuhup fug-o. It nin At Ninikni boholma werehon etnowen wene duroho suruk amuk eke duroho suruk am fug yig nisebahon etno ilitoho surukon halug o epma kuhup-o.

²² Eke fobik o ari sambit it aphe anggolo epmanowen yig nituk wilil, ‘Ninowe-o, Hat hinuk fam wene yig isaruk soag etno Hat hapeleg ano? Eke Hat hinuk fam yi angge di angge obog-at sukfuganggeroho suruk soag epmano Hat hapeleg ano?’ ulug yig nimuhup-o.

²³ Yig nituk amuhupmu, eke Anden it aphe obog inil fam yig isaruk wilil, ‘Hit hinebe An napeleg-o. Hit dag suruk atikibon du An nolohotmen wilip amiek-o,’ ulug ariroho yig isahuk-o,” ulug yig isebag.

It ap birenen inibam fal sebahon etano At Yesusen ilitoho neken yig isebahon wene 7:24-27

²⁴ At Yesus etnowen yig isaruk wilil, “It aphe obog An nune du inesanggo holtuk atlug ilitoho-at surukon etno inawene du ilitoho neken yig hisamin-o. It etno ap indi enggaron etno ilitoho wereg-o. Eke at ap etnowen ibam aloma-at oag weregsoho falepataruk apagma,

²⁵ osit haplanggen etno waharuk wilil, ikmuk hiahne inim waharuk apareg, ibam etno sahaloko walug liog ulug suruk apagma, eke o aloma oag weregsoho falfahon etno sahaloko walug lebag fug-o.

²⁶ Nin eke, it nin An nune du inesanggo holtuk oke, inindimuen ilitoho suk ulug ebetuk elehon etno, ap urunangge etno ilitoho wereg-o.

²⁷ At ap etno ibam donggoma falepfebahon etno osit haplanggen etno waharuk wilil, ikmuk hiahne inim waharuk apagma, ibam etno sahaloko walug liog ulug suruk apareg, fobik mondog sahaloko walug lebag-o,” ulug yig isebag.

At Yesus mondog oag werehon ulug yig isebahon wene 7:28-29

²⁸ Ariroho-at yig isaruk apagma, At Yesusen yanggul isaruk apahon etno it aphe obog wonggaleg welapahon epmanowen wi ulug fog suruk apag.

²⁹ Ariroho fog suruk apag ari, At Yesusen it ap wene holal unde etnowen yig isebag etno hag yig isaruk apag fug, Aren une oag weregsoho-at yig isarukmu haruk apareg, fog suruk apag.