Matius 4 - Allah Wene Hurumbik Keron

At iblisen Yesus indi kahalik wapahon wene 4:1-11

¹ Eke fobik At Yesus etno iblisen indi kahalik wamag ulug At Roh Kudus etnowen walug o limu aphe eleg ambeg epmano le­bag.

² Epmano lebareg, no­ho ing­gik empat puluh hari orom neng­geg eleg-at we­regma, fobik orom obok hebag.

³ Orom obok hebareg weregma, At indi kahal­tukon iblis etno ambeg waharuk apareg, yig ituk wilil, “Hat Allah Amlo­ho-at wela­hen halug, helep du orom amagsoho hune yig imin-o,” ulug yig epag.

⁴ Yig ituk apagma, At Yesus etno­wen yig ituk wilil, “Orom ari fam aphe iniluk welam hai-o. At Allah une inesanggo holuhup halug alem ari fam it aphe iniluk wela­mon etno-at hola­hup-o, ulug wene holal balfahon ari-at wereg-o,” ulug yig epag.

⁵ Yig ituk apag­ma, at iblisen walug o Yerusalem etno­wen o Allah ibam o fulahi­mu min­duhupfeba­reg,

⁶ yig ituk wilil, “Hat Allah Amloho-at wela­hen halug, hebe hiksoho ambik ma-o, ambik wapmi­hinmu, Aren At o malaikat etno Hat hake lahap isa warikon­ma, it etnowen hiog helep fam wataru­kim ulug ining­gikmu sen habu­kon-o, ulug holal balfa­hon ari-at we­reg-o,” ulug yig epag.

⁷ Yig ituk apa­gma, eke At Yesus etnowen yig ituk wilil, “Eleg-o, Hi­nikni Allah indi kaha­lik la nowen-o, ulug wene baleg wereg-­o,” ulug yig epag.

⁸ Yig ituk apagma, eke at iblisen dom yaron isin fam walug laha­bag.

⁹ Laha­bareg, o kwe­anma o ahik ya da o faleg fanowon heag ituk wilil, “Hat hi­langgen hehenon ari obog-at og hipminen, kunuk ulug an nobam sembahyang in-o,”

¹⁰ ulug yig ituk apagma, eke At Yesusen yig ituk wilil, “Hat iblis hebe lag-o. Ninikni Allah-at sembahy­ang obam uruk am fano-o. Nit At akeleg-at andu­ananggeroho welam ari fano-o, ulug wene baleg ari wereg-o,” ulug yig ituk apag­ma,

¹¹ at iblis etno sohorep isalug, mondog lebag. Mondog laruk apag­ma, eke it malaikat epmano waharuk apareg, At Yesus aso welapag.

At Yesus o Galilea wapahon wene 4:12-17

¹² Eke fobik it ninen at Yohanes hele watusa-o, ulug urukmu At Yesus esanggo holtuk apareg, o Galilea wapag.

¹³ Waharuk apareg, o Nazaret etnowen wilip atlug, o Zebulon Naftali ho­rog-at o Kapernaum epmano welapag.

¹⁴ Ariroho welapag ari, bilin at nabi Yesaya etnowen hurumbik yig isebahon etno demat siri­si-o ulug inahla ebebukag ulug o Kapernaum welapag.

¹⁵ Eke at Yesaya etnowen bilin yig isaruk wilil, “O Zebulon eke Nafta­li, laruk ambeg kwalem, eke ik Yor­dan ayeg oholuk fil epmano inim, it aphe o Gali­lea were­hon epma­no inim,

¹⁶ it aphe inung­guluag dombog o hikmu horieg welapa­hon ari, fobik yangguk suon haru­sa-o. It aphe waratuk ambeg sanggunmu werehon epma­no selegma atisi-o,” ulug holal embe­bag.

¹⁷ Ariroho holal embe­bareg fam, eke fobik o ari famen At Yesusen wene yanggul isebag. Yanggul isaruk wilil, “Hinindi wereg amiek-o. At Allah boholmen sukon etno fanggog ehek-o,” ulug yig isaruk apag.

At Yesusen omini empat ikan watukmu wol isebahon wene 4:18-21

¹⁸ Eke fobik At Yesus ik Galilea ayegma laruk wilil, at Simon inuk misig Petrus etno, ot Andreas inimen werul etno ikma belaptukmu ilanggen yet isebag. It etano ikan watukon welapag.

¹⁹ It ikan watukon etno yet isaruk apareg, yig isaruk wilil, “An nombolim maniek-o. Ikan watuk ahep etno ilitoho, aphe sen inabil nurukon welamuhuben ulug minduhup hisahakuk-o,”

²⁰ ulug yig isaruk apagma, werul iren angge etno sohorep isalug, At inim laruk apag.

²¹ Inim laruk apag, eke it Yakobus, ot Yohanes inim, inikni Zebedeus etno inim ikma so fam horieg weregma, it inawerul etno seleben surukmu ilanggen yet iseba­reg, wol isebag.

²² Wol isaruk apagma, it etno inikni so etno fam sohorep isalug, At inim lebag.

At Yesusen wene yig isaruk wilil aphe fano inapahon wene 4:23-25

²³ Inim laruk apagma, At Yesus etno o Galilea etno obog-at dahag dahag sil nuruk wilil, iren wene uruk ambeg o falegma epmanowen yanggul iseheg, eke At Allahen sukon wene fano wene etno yig iseheg, eke it aphe obog uk warehon inim, ukmurohon inim fano inabeheg sil nuruk apag.

²⁴ Ariroho sil nuruk apareg fam, it ninen At etno fano inabil waha-o, ulug o Siria epmanowen At awene etno yig isil le­bag. Yig isil laruk apagma, it aphe uk warehon inim, eke uk oloken surukon inim, eke it setan inindimu kebahon inim, eke it nenek surukon inim, eke it inoag sahalehon inim At ambeg imbisa waharuk apagma, Aren obog-at fano inapag.

²⁵ Fano inap­tuk apagma, it aphe o Galilea, Dekapolis, Yerusa­le­m, Yudea-on, o ik Yordan le fema­hon obo­g, At inim laruk apag.