Matius 15 - Allah Wene Hurumbik Keron

At Yesusen it Farisi ap etno yangguloko yig isebahon wene 15:1-9

¹ Eke fobik it Farisi ap etno inim, eke it wene holal baleg unde nin epmano inim o Yerusalemen At Yesus ambeg wonggalik waharuk apareg, yig ituk wilil,

² “It ninetamukien wene duroho suruk amuk eke duroho suruk am fug ulug yig nisebahon etno wereg heheg, eke it Hat homini du weheg eleg wilil, orom nuog ulug ininggik sabele fanoroho ho suruk eleg ari, keroho ulug suruk-o?” ulug yig epag.

³ Yig ituk apagma, eke At Yesusen yig isaruk wilil, “Eke hit hag, At Allahen wene duroho suruk amuk eke duroho suruk am fug ulug yig hisebahon etno hinapeleg neken sohorep isalug, hinonggarehen hinahla buruk ahebon etno-at suruk ahep ari, keroho ulug suruk ahep-o?

⁴ Hit ariroho suruk ahep ari At Allahen, hiniknisi hinisasi ininuk-at suontepfuruk amuk-o, ulug yig hisebareg oke, eke fobik, iniknisi inisasi inobam denggeltuk ari, it hag waramag-o, ulug yig hise­bahon etno oke,

⁵ eke hit hag dahan fahan-at suruk ahep hisi­hi-o. Ariroho suruk ahep etno fam, hiren hiniknisi hinisasi yig isaruk wilil, ‘Ninaharek og hisolowon oke, Allah ake ulug embe­he-o,’ ulug yig isaruk ahep-o.

⁶ Ariroho yig isaruk ahep ari, hiniknisi hinisasi ininuk suontepfuk hinamberaken-at suruk wilil, it nin hag ariroho siuk ulug yig isaruk ahep-o. Ariroho yig isaruk wilil, Allah wene etno seberoho umbuog ulug-at suruk ahep hisihi-o.

⁷ Eke hit hinenggal-at uruk ahebon du amuk at Yesaya etnowen hit hinawene ebag ari demat ebag-o.

⁸ Eke At Allahen uruk wilil, ‘It aphe du inuneyen An suontep naharuk oke, inindimuen nin-at ebetuk-o. Nebe iniluk wereg oke, nune waruk eleg-o.

⁹ Ariroho inindimu ebetuk wilil, it inetamukien wene duroho suruk amuk eke duroho suruk am fug ulug ebahon etno farim du Allah wene at-o, ulug uruk wilil, we inambilik fam inenggal-at suontepfuruk ahe ulug uruk-o,’ ulug At Allahen yig isebahon etno at Yesayaen holal embebag ari, hit farim-at embebag-o,” ulug At Yesusen yig isebag.

Ninindimuen wilip atukon etnowen dag seko ninombisaharuk-o ulug yig isebahon wene 15:10-20

¹⁰ Yig isaruk apareg, At Yesusen it aphe obog epmano At ambeg wonggalik wamag ulug wol isebag. Wol isaruk apareg, yig isaruk wilil, “Hit An nune etno hinindi ebetlihiben hinesanggo fanoroho holiek-o.

¹¹ Yi angge di angge ninelma naruk aheon etnowen dag seko ninombisaharuk eleg-o. Eke ninindimuen wilip atukon etnowen-at dag seko ninombisaharuk-o,” ulug yig isebag.

¹² Yig isaruk apagma, At omini epmano ambeg waharuk apareg, yig ituk wilil, “Haren yig nisehenon etno fam it Farisi ap inahla burukon etno seberepfehen ari hai-o,” ulug yig epag.

¹³ Yig ituk apagma, At Yesus etnowen yig isaruk wilil, “Eleg-o, yi angge di angge An Nikni boholma werehon etnowen i yatisi fuhon etno hohol angge ulug henoko wahu-o.

¹⁴ Eke it Farisi ap etno farim hinindi ebebuk fug-o. It etno inilanggen buhon wilil, inomini inilanggen buhon etno ininggik senoko og inaplug laruk oke, obog-at yombanma bule ambuhup-o,” ulug yig isebag.

¹⁵ Yig isaruk apagma, eke at Petrus etnowen, “Haren ilitoho neken yig nisehenon ari, ebe undamon yanggul nisimin-o,” ulug yig epag.

¹⁶ Yig ituk apagma, At Yesusen yig isaruk wilil, “An wene yig hisihion etno it nin inindi ebetuk eleg etno hag, hit ariroho-at hinindi ebetuk eleg wilil, hinahla behep fureg uruk ahep ano?

¹⁷ Yi angge di angge aphe inelma narukon etno inindimu kuruk eleg wilil, arikon etno inal famen wilip atuk-o.

¹⁸ Eke yi angge di angge aphe inelmen wiliptukon halug, alem inindimuen-at wiliptuk-o. Eke alem yion dion inindimuen wilip atukon arien hag dag seko imbisaruk-o.

¹⁹ It apheyen dag suog ulug inindimuen ebetuk-o. Inindimuen ebetuk atlug, ap watukon etno inim, eke ap inuhweon diloko warukon etno inim, eke hweap selemen surukon etno inim, eke inalomnangge heraharukon etno inim, eke inenggal-at urukon etno inim, eke inune dahon inobam denggeltukon etno inim,

²⁰ ariroho surukon etno obog-at inindimuen ebetuk isalug, ari fam dag seko imbisaruk-o. Eke iren orom nuog ulug hininggik sabele hosiuk-o ulug urukon oke, hininggik sabele hoseheg eleg naruk ahep arien hinindi sabele bal atuk wilil, dag seko hinombisaharuk eleg-o,” ulug yig isebag.

Hwe Kanaanon misig ahaloho fano sebahon wene 15:21-28

²¹ Eke fobik At Yesusen o epmano sohorep isalug, o Tirus Sidon epmano lebag.

²² Laruk apagma, at hwe misig o Kanaan epma i werehon etno ambeg waharuk apareg, yig ituk wilil, “Nowe-o, Hat Daud etamu duen hahmu niyimin-o. An nahaloho setan indimu kuruk atisireg, obam oloken yahan watuk wereg-o,” ulug yig epag.

²³ Yig epahon oke, At Yesusen une yig epag fug. Une yig ereheg eleg weregma, eke At omini etnowen yig ituk wilil, “At hwe du mug ninaplug laruk wilil, une suon ninobam uruk du, wilibin-o,” ulug yig epag.

²⁴ Ariroho yig ituk apagma, At Yesusen yig isaruk wilil, “It Israel aphe wam domba nuk atukon neken werehon etno-at heag inabukag ulug lahap nabik waharisi-o,” ulug yig epag.

²⁵ Yig ituk apagma, at hwe etno ambeg waharuk apareg, indibahal yungguksoho yig ituk wilil, “Nowe-o, Haren nabua nealug nahaloho etno fano nipmihin-o,” ulug yig ituk apagma,

²⁶ eke At Yesusen yig ituk wilil, “Orom udag doronen ininggikmu seneg isalug, diloko yangge og isa hai-o,” ulug yig epag.

²⁷ Yig ituk apagma, eke at hwe etnowen, “Yu-o, Nowe, demat ehen-o. Eke it yangge unde etnowen orom ahap denoko e daleg orom narukon etno apma belapfuruk halug, it yanggeyen naruk-o,” ulug yig epag.

²⁸ Yig ituk apagma, At Yesusen yig ituk wilil, “Hat hwe du nobam demat ulug eberehenteg fam, haren kino yig nerehenon etno ilitoho fano arikon-o,” ulug yig ituk apagma, ebahon etno ilitoho ahaloho dulum-at fano apag.

At Yesus etnowen aphe anggolo fano inaptuk apahon wene 15:29-31

²⁹ Eke fobik At Yesusen o etno sohorep isalug, ik Galilea ayegma lebag. Laruk apareg, bunu misig fam lahabag. Laharuk apareg, horieg weregma,

³⁰ it yi aphe di aphe obog At ambeg wonggalik waharuk apareg, inomini ininggik iniog dahon epmano inim, inilanggen buhon inim, iniog hunduhukon inim, eke inune elehon inim, it yi aphe di aphe uk warehon epmano inim, obog-at og inaplug waharuk apareg, At Yesus ambeg imbisa wapag. Imbisa waharuk apagma, At Yesus etnowen it aphe epmano obog fano inapag.

³¹ Fano inaptuk apagma, it ap inune elehon etano inune eheg, iniog hunduhukon fano aheg, iniog dahon kwalem laheg, inilanggen buhon fenggen aheg suruk apagma, it aphe obog epmanowen inilanggen isaruk apareg, wi ulug it Israel aphe Inikni Allah etno inuk suontepfebag.

At Yesusen aphe epmat ribu orom inim ikan inim sumburoko amiek o ulug og isebahon wene 15:32-39

³² Ariroho weregma, At Yesusen it omini epmano wol isaruk apareg, yig isaruk wilil, “Aphe anggolo duma ninambeg waharusareg, nininggik henahanam ninim nohokeon oke, orom nawon eleg aha du nahmu-o. Eke it nin inibam yatmen waharuson epmano orom oboken inil fulug suk nowen ulug orom og isalug eleg-at lahap isao ari hai-o,” ulug yig isebag.

³³ Yig isaruk apagma, it At omini etnowen yig ituk wilil, “Aphe anggolo wereg oke, o limu aphe inibam eleg ambeg duma orom roti og isulen kema kino luk-o?” ulug yig ituk apagma,

³⁴ At Yesusen yig isaruk wilil, “Hit orom roti esoho maren seneg welahep-o?” ulug yig isaruk apagma, it etnowen yig ituk wilil, “Nit orom roti sabiren angge inim, eke ikan we dot inim seneg welahe-o,” ulug yig epag.

³⁵ Yig ituk apagma, At Yesus etnowen yig isaruk wilil, “Hit aphe obog horie iek-o,” ulug yig isaruk apareg, orom roti sabiren angge etno inim, ikan etano inim inggikmu webag.

³⁶ Waruk apareg, seneg wilil Nikni Allah wa ulug sembahyang ebag. Sembahyang uruk apareg, orom roti inim ikan inim kut kut At omini etno og isaruk apagma, it aphe obog inapma belabil lebag.

³⁷ Inapma belabil laruk apagma, it obog-at inahumsoho nebag. Inahumsoho naruk apareg dinik apagma embebahon etno it ominien baluroho hele yaho sabiren angge fam elepnoroho yonggaroko embebag.

³⁸ Eke it aphe orom nebag ari, it ap inebe empat ribu inim, eke it hweap udag wanereg eleg epmano inim obog-at nebag.

³⁹ Naruk apagma, it aphe epmano lahap isalug, At Yesus etno so fam ikma kuruk apareg, o Magadan etno lebag.