Matius 14 - Allah Wene Hurumbik Keron

At Yohanes aphe ikma belap inaptukon etno warepfebahon wene 14:1-12

¹ Eke fobik o ari sambit at o Galilea inowe suon Herodes etno At Yesusen sebahon epmano esanggo holtuk apareg,

² at osi ap suon suon epmano yig isaruk wilil, “At ap sukfuganggeroho suruk ari, at Yohanes aphe ikma belap inaptukon etno aphe warehon wereg ambe­hen iluk atlug minatisireg, ariroho suruk hihi-o,” ulug yig isebag.

³ Ariroho yig isebag ari, bilin at inowe suon Herodesen Yohanes hele waroko it aphe dag surukon imbisaruk ambeg epma kolapfukag-o ulug yig isebag. Ariroho yig isebag ari, bilin at inowe suon Herodes etnowen alem at ot Filipus uhwe Herodias etno diloko weba­reg fam,

⁴ at Yohanes aphe ikma belap inaptukon etnowen at inowe suon Herodes yig ituk wilil, “Hwe etno warikinteg fam ari, hinim welam hai-o,” ulug yig ituk apagma,

⁵ at inowe suon Herodes etnowen ahla buruk wilil, anden watle, ulug ahla bebahon oke, it Yahudi aphe epmanowen At Yohanes ari, Allah wene yig nisarukon nabi ap at-o, ulug obam ebetuk apag etno fam, akolen bok apag.

⁶ Bok atuk apagma, eke fobik at inowe suon Herodes o at endag apahon etno fam esoho esetuk iseheg, at Herodias ahaloho etno it wonggalfahon epmano obog inil fam yunggultuk apagma, at inowe suon Herodes ahien suruk apareg,

⁷ abug yig ituk wilil, “Hat ebe du hag og nemag ulug kino yig nipmihinon etno demat og hipmin-o,” ulug yig epag.

⁸ Yig ituk apagma, at hole isina etnowen yanggul itukmu, hole etnowen inowe suon Herodes yig ituk wilil, “At Yohanes aphe ikma belap inaptukon etno ungguluag baloko eserangge fam enako kidia dia og nipmihin-o,” ulug yig epag.

⁹ Yig ituk apagma, at inowe suon Herodes etno indi dag apahon oke, it obog inaohi esepahon etno inolohotmen abug yig epahon etno fam, at hole kino ebahon etno og emag ulug osi yig isebag.

¹⁰ Yig isaruk apagma, at Yohanes o aphe dahon imbisaruk ambeg epmanowen ungguluag balepfuruk apareg, eserangge fam enako walug hole etno og epag.

¹¹ Og ituk apagma, hole etnowen isina og irik lebag.

¹² Og irik laruk apagma, at Yohanes omini epmano waharuk apareg, ebe warepfebahon etno walug kweanma salepfik lebag. Salepfik laruk apareg, At Yesus yig irik lebag.

At Yesusen aphe lima ribu epmano orom roti ikan inim sumburoko amiek-o ulug og isebahon wene 14:13-21

¹³ At Yesus etno yig irik laruk apagma, esanggo holtuk apareg, o epmano sohorep isalug, akeleg-at so fam o misig aphe eleg ambeg lebag. Laruk apagma, it aphe obog inesanggo holtuk apareg, inibam epmano sohorep isalug, kwalema At Yesus mutlug lebag.

¹⁴ Laruk apagma, eke At Yesus etno so fam epmanowen wilip atuk apareg, it obog wonggalik wapahon epmano ilanggen isebag. Isaruk apareg, indimuen inabua isaruk wilil, it uk warehon epmano fano inapag.

¹⁵ Fano inaptuk apareg weregma, hupmu At omini epmano ambeg waharuk apareg, yig ituk wilil, “Nit o hup ahama, aphe inibam eleg ambeg welahe-o. Ari halug, it aphe obog waheson duma orom heag sawag ulug o aphe inibam wereg ambeg epma lahap isuk-o,” ulug yig ituk apagma,

¹⁶ eke At Yesusen, “It aphe duma wilip amiek-o ulug yig isa fug-o, hiren-at orom og isimiek-o,” ulug yig isebag.

¹⁷ Yig isaruk apagma, eke it etnowen yig ituk wilil, “Nit duma orom roti fuaben angge inim, eke ikan biren-at seneg welahe-o,” ulug yig epag.

¹⁸ Yig ituk apagma, At Yesusen yig isaruk wilil, “Ari halug, An og nirik maniek-o,” ulug yig isaruk apareg,

¹⁹ it aphe obog isinggama epmano horie ukag ulug yig isebag. Yig isaruk apareg, At Yesus etnowen orom roti fuaben angge eke ikan biren etano inim waruk apareg seneg wilil, ilanggen boholma lahap haruk apareg, heahi watuk wilil Allah wa ulug sembahyang ebag. Sembahyang uruk apareg, orom roti etano kuroko omini og isaruk apagma, At omini etnowen it aphe sumbut isebag.

²⁰ Sumbut isaruk apagma, it aphe epmano obog-at inahumsoho nebag. Inahumsoho naruk apareg dinik apahon epmano At ominien hele yaho nesanggowen angge fam yonggaroko embebag.

²¹ Eke it aphe nebag ari, it ap inebe lima ribu inim, eke it hweap udag wanereg eleg epmano inimen obog-at nebag.

At Yesus etno ik fam iog imbil lebahon wene 14:22-33

²² Naruk apagma, At Yesusen it aphe epmano lahap isiog ulug At omini epmano yig isaruk wilil, “Hit hinebe bilin ikma so fam epma kuruk atlihipseg, ik le femag laruk amiek-o,” ulug yig isaruk apareg, it aphe obog wilip isaruk apareg, At ebe akeleg-at bunumu epmano sembahyang ik lahabag.

²³ Lahabareg epmano wereg heheg, o hup atuk apagma, At Yesus etno akeleg-at bunu etno fam welapag.

²⁴ At etno epmano wereg heheg, At omini epmano inakeleg-at so etno fam laruk wilil, ik bulmu epmano weregma, hiahne fil ha waharuk apagma, iken so etno lek hondo sebag.

²⁵ Lek hondo surukmu, o witiog ulug ahla healtuk heheg, At Yesus etno inambeg liog ulug, ik ahum fam iog imbil lebag.

²⁶ Ik ahum fam iog imbil larukmu, it omini epmano inilanggen haruk apareg, inakolen uruk wilil, “Ahut ano?” ulug inakolen inune ebag.

²⁷ Inune uruk apagma, At etnowen yig isaruk wilil, “Hinahlahiroho-at welamiek-o. An nebe-at waharuk ahi du hinakol nea fug-o,” ulug yig isaruk apagma,

²⁸ eke at Petrusen yig ituk wilil, “Ninowe-o, Hat hebe horog duma welahen halug, ik ahum fam hiog umbulug wilik ma ulug yig nimin-o,” ulug yig ituk apagma,

²⁹ eke At Yesusen yig ituk wilil, “Hat hebe kidia wilik ma-o,” ulug yig epag. Yig ituk apagma, at Petrus etno so fam epmanowen wilip atuk apareg, ik ahum fam iog umbulug At Yesus ambeg liog ulug horogsoho lebag.

³⁰ Laruk apareg, hiahne etno fil ha waharukmu ilanggen haruk wilil akol haruk apareg, ikma dobogsoho ambiog ulug sebag. Ariroho suruk apareg, une suon yig ituk wilil, “Nowe-o, Haren nili og nabin-o,” ulug yig ituk apagma,

³¹ At Yesus ik ahumu inggik belapfuruk apareg, senoko minduhupfebag. Minduhupfuruk apareg, yig ituk wilil, “Hat hindi biren ahenteg fam, An nobam dorat ebetuk ahen hihi-o,” ulug yig epag.

³² Yig ituk apareg, it biren so etno fam kuruk apagma, hiahne etno eleg apag.

³³ Eleg atuk apagma, eke At Yesus omini epmanowen obam sembahyang uruk wilil, “Hat hebe Allah Amloho demat welahen heyehe-o,” ulug yig epag.

Aphe anggolo fano inaptuk apahon wene 14:34-36

³⁴ Yig ituk apareg, ik etno baloko o Genesaret luog ulug ik ayegma horogsoho laruk apareg, weregma,

³⁵ it aphe epmanowen At Yesus enggag hebag. Enggag haruk apareg, o aliluke epmanowen it aphe uk warehon epmano og inaplug wamag ulug inayonggo umburuk apareg, At Yesus ambeg imbisa wapag.

³⁶ Imbisa waharuk apareg, yig ituk wilil, “It aphe uk warehon dumen Hat hasum atog ininggik senebuk fano ano?” ulug ambeg hinog waruk apagma, it At asum ininggik senepahon epmano obog-at fano apag.