Matius 10 - Allah Wene Hurumbik Keron

At Yesusen omini dua belas epmano wol isebahon wene 10:1-4

¹ Eke fobik At Yesusen omini dua belas epmano wol isaruk apareg, yig isaruk wilil, “Hiren it setan inindimu werehon epmano lisoko wilip iseheg, eke it uk warehon epmano fano inabeheg sukag ulug minduhup hisahaki-o,” ulug yig isaruk apareg,

² it ap wol isebahon epmano ini­nuk Simon, inuk misig Petrus soalfahon etno inim, at ot Andreas etno inim, at Zebedeus udaki Yakobus, ot Yohanes etano inim,

³ eke it Filipus, Bartolomeus etno inim, eke it Tomas, Matius uang onggo kino urukon etno inim, at Alfeus amloho Yakobus etno inim, eke Tadeus etno inim,

⁴ eke Simon, ap Kanaon etno inim, eke Yudas Iskariot, fobik Yesus senebukag ulug yonggo lebahon etno inim, it epmano obog-at minduhup isebag.

At Yesusen omini dua belas etno inesanggo waroko lahap isebahon wene 10:5-15

⁵ Minduhup isaruk apareg, eke fobik At Yesusen lahap isiog ulug inesanggo watuk wilil, “Hit o Samaria epma, it Allah wene waruk elehon wereg ambeg epmano la fug-o.

⁶ It Israel aphe wam domba nuk atuson epma­no-at heag inabil aliek-o.

⁷ Laruk atli­hipseg, At Allah weregmen sukon etno fanggog uruk-o, ulug yig isimuk-o.

⁸ Yig isaruk wilil, eke it uk warehon fano inabe­heg, it warehon minduhup iseheg, eke it honanggorohon fano in­abeheg, eke it setan inindimu werehon wilip iseheg sil nuruk amuk-o. Eke hit Anden onggo eleg yuhun-at og hisarikikon etno fam, hiren uang anggen onggo dot og nisimiek-o ulug kino eheg eleg-at sil nuruk amuk-o.

⁹ Eke hiren emas inim, perak inim, uang anggen inim walug la fug-o.

¹⁰ Eke misig, kwalema laruk wilil, sum yi angge di angge yonggatukon ulug walug la fug-o. Sum hinebemon misig-at wanteg wilil, hiniog eset inim, hinowanggundumuk inim walug la fug-o. Hit yabuk fanowon etno-at suruk hisalug, iren yi angge di angge og hisawag-o.

¹¹ Eke hit etno o misig kuruk amuhupseg, hiren ap misihen ninaohi eseri­kon ano? ulug aso bok wilil, ap etno hinim welamuk-o.

¹² Welatlug eke o misig kuruk wilil, wahinaniog ulug yig isimuk-o.

¹³ Yig isaruk amuhupmu, iren wa ulug yig hisaruk isalug, hiren heahi war inaptuk wilil, hinahien inobam imbiuk-o. Eke iren hinaohi esetuk eleg isalug, hinahien inobam umbuk fug-o.

¹⁴ Eke o misig it apheyen wa ulug yig hiseheg eleg-at hinune yig isahubon etno sahaltuk isalug, inolohotma hiniog sabele horoho imbisa­lug, o etno sohorep isahup-o.

¹⁵ Eke At Allahen fobik aphe inaren baltuk wilil, o Sodom Gomora dorat ahmu isahuon oke, eke it aphe heahi war hinaptuk elehon epmano mondog inabua isahu fug-o, ulug ariroho suhuon etno hinindi ebetuk amiek-o,” ulug inesanggo watuk apareg, lahap isebag.

It apheyen dahon etno hinobam umbuhup-o ulug yig isebahon wene 10:16-25

¹⁶ At Yesusen yig isaruk wilil, “Hit hinesanggo holtuk amiek­-o. Wam domba epmano it oloyangge hahon inayeg libil inaptukon inambeg lahap isaruk etno hag, lahap hisaruk ahi-o. Eke wam elien orom niog ulug aphe inamben baltuk etno hag, hit hinebe yaharoho wilil, sue yalme indi fano wereg etno hag hit hinindi fanoroho welamuk-o.

¹⁷ Eke fobik sen hinaplug, it ap Allah unde suon wene baltuk ambeg epmano inim, eke o Allah wene uruk ambeg epmano inim, hinombisahik lalug, epmanowen yikangge hinusuhup-o.

¹⁸ Eke hiren it Yahudi ap inim, it Yahudi wene inapelehon epmano inim wene fano wene etno yig isaruk hisalug, An ninuk waruk amuhup etno fam og hinaplug it yi ap di ap inowesi suon epmano inambeg hinombisahik lahup-o.

¹⁹ Hinombisahik laruk amuhupmu, hiren nongge yig isuk-o, keroho uk-­o, ulug hinindi seneni ebebuk fug-o.

²⁰ Fobik hinonggarehen hinahla buhubon etno yig isaruk eleg heheg, At Hinikni Roh Kudus etnowen yig hisahuon etno-at yig isaruk amuhup-o.

²¹ Eke fobik hinomin misihen omin misig wabukag ulug inggik senoko og iseheg, eke at iknien udaki war inabukag ulug ininggik senoko og iseheg, eke inudakien iniknisi war inabukag ulug ininggik senoko og iseheg suruk amuhup-o.

²² Eke An ninuk waruk hisalug, it obohen inambit hisahup-o. Inambit hisahubon oke, eke hiren hinindi bugsoho welamuhup halug, fobik hinili og hinabu­hu-o.

²³ Eke hit hinebe o misihen hinusuog ulug suruk isalug, sohorep isalug o misig hite alu-o. Eke At Allah Amloho awan waharuk eleg heheg, yabuk o Israel epma suhup-o, ulug An demat yig hisaruk ahi-o.

²⁴ Eke it yig isarukon epmano at yanggul isarukon apma wereg etno hag, it anggim­bu epmano at inowe apma wereg-o.

²⁵ Ari halug, it yig isarukon epmanowen an at ninowe yanggul nisarukon ilitoho welam nindi-o, ulug uruk am ari fa­no-o. Eke it anggimbu etnowen an nebe at ninikni ilitoho welam nindi-o, ulug uruk am ari fano at-o. Eke it inowe ari inuk Beelzebul-o ulug soaltuk isalug, at udaki ininuk da­hon-at soal inabuhu-o,” ulug At Yesusen yig isebag.

At sa ninakol welam-o ulug yig isebahon wene 10:26-31

²⁶ Eke At Yesusen yig isaruk wilil, “Hit aphe hinakol isa fug-o. Yi angge di angge herahoma werehon epmano fobik selegma aruhu-o. Eke yi angge di angge inindimu herako werehon epmano it aphe obog iniluk amagsoho yig isahup-o.

²⁷ Anden kidia o hikmu neken wilil yig hisaruk ahion etno hiren selegma-at yig isa­hup-o. Eke nit ninahlen yig hisarukmu holtuk ahebon etno o isin fam selegma epmen yig isahup-o.

²⁸ It apheyen inebe war inaptuk oke, inahut war inaptuk elehon etno hinakol isa fug-o. Eke At Allahen inebe inim inahut inim o dagma imbisahuon etno hag hinakol haruk amiek-o.

²⁹ Eke sue wurle biren etano onggo balu­kon uang anggen dorat umburuk oke, eke At Hiniknien obog sen inaptuk halug, misig kweanma bule amburuk eleg-o.

³⁰ Eke hit hiniruk epmano inim obog waneroho wereg-o.

³¹ Ari halug, sue doron etno bule ambuk nowen ulug At Allahen sen inaplug wereg oke, eke hit hinebe fanoroho sen hinaplug wereg heheg, it nin hinakol isa fug-o,” ulug At Yesusen yig isebag.

At Yesus obam ebetuk amon wene 10:32-33

³² At Yesusen yig isaruk wilil, “It obohen An Yesus Amloho welahi-o, ulug selegmaroho urukon halug, An At Nikni boholma werehon il fam du An nudaki ulug ariroho uhuk-o.

³³ Eke it obohen an Yesus napeleg-o, ulug selegmaroho uruk elehon halug, Anden At Nikni boholma werehon etno il fam it ap du An napeleg-o, ulug ariroho uhuk-o,” ulug At Yesusen yig isebag.

It apheyen At Yesus farim healtukon wene 10:34-39

³⁴ At Yesusen yig isaruk wilil, “Kidia An waharikikseg fam, it aphe obog inonggarehen dambultuk ulug hinahla buk fug-o. Eke dambulukon etno sohorep isalug, iren heal sawon etno-at og isa waharikik-o.

³⁵ Eke it inudakien iniknisi inambit iseheg, eke it inaholanien inisasi inambit iseheg, eke it inahburi etnowen inowani inambit iseheg suruk amag ulug waharikik-o.

³⁶ Ariroho waharikikseg fam, ap misig owe not epmano inim healeg mondog welamuhup-o.

³⁷ Eke ap misihen An nebe indi hunduhuk welam sohorep isalug, ikni isina-at indi hunduhuk wereg halug ari, An ninim welam hai aruhu-o. Eke ap misihen An nebe indi hunduhuk welam sohorep isalug, amloho ahaloho-at indi hunduhuk wereg halug ari, An ninim welam hai aruhu-o.

³⁸ Eke hit hinebe etno seberoho wilil hiren angge e salib etno hinomalo fam waruk amuhupseg, An lao ambeg mug naplug lahup fug halug, ninim welam hai aruhu-o.

³⁹ Eke ap misig onggarehen ili huliog ulug suhuon oke, hai aruhu-o. Eke ap misihen An nawene etno yig isil laruk wilil, onggarehen ili huliog ulug suruk eleg halug, fobik ilioko umbuhu-o,” ulug At Yesusen yig isebag.

Onggo fanowon etno og isahu-o ulug yig isebahon wene 10:40-42

⁴⁰ At Yesusen yig isaruk wilil, “Ap misihen ninim welamulen ulug yig hisaruk halug, An nebe-at ninim welamulen yig nituk-o. Eke An nebe ninim welamulen yig nituk isalug, At lahap nabik waharision etno-at ninim welamulen yig ituk-o.

⁴¹ Eke at ap i werehon misihen ap du Allah wene yig nisarukon atma, ninim welamulen-o ulug uruk halug, fobik Allahen At udaki onggo fanowon og isahuon epmano nin minggiroko ap i werehon etno og iruhu-o. Eke at ap i werehon misihen ap wahawon du obabut fanowon halug, ninim welamulen-o uruk halug, fobik At Allahen it inobabut fanowon epmano onggo fanowon og isahuon etno at ap i werehon etno minggiroko og iruhu-o.

⁴² Eke An namloho misig it apheyen ap du kimbu-o ulug urukon oke, ap misihen ik holon induk fanowon etno nawag ulug og ituk halug, fobik An nudaki onggo fanowon og isahuon epmano nin minggiroko ap ik holon og itision etno og iruhu-o, ulug yig hisihion ari hinindi ebetuk amiek-o,” ulug yig isebag.