Matius 1 - Allah Wene Hurumbik Keron

At Yesus Kristus etamuki umbiasi welapahon wene 1:1-17

¹ At Yesus Kristus, Abraham Daud etamu etno, At etamuki umbiasi welapahon ininuk du at-o.

² At Abraham etnowen amloho Ishak endepag. At Ishak etnowen amloho Yakub endepag. At Yakuben udaki Yehuda osi inim endag inapag.

³ At Yehuda uhwe Tamar etnowen udaki Peres, Zerah endag inapag. At Peres etnowen amloho Hezron endepag. At Hezron etnowen amloho Ram endepag.

⁴ At Ram etnowen amloho Aminadab endepag. At Aminadab etnowen amloho Nahason endepag. At Nahason etnowen amloho Salmon endepag.

⁵ At Salmon uhwe Rahab etnowen amloho Boas endepag. At Boas uhwe Rut etnowen amloho Obed endepag. At Obed etnowen amloho Isai endepag.

⁶ At Isai etnowen amloho Daud inowe suon Raja etno endepag. At Daud uhwe Uria oho welapahon etnowen amloho Salomo etno endepag.

⁷ At Salomo etnowen amloho Rehabeam endepag. At Rehabeam etnowen amloho Abia endepag. At Abia etnowen amloho Asa endepag.

⁸ At Asa etnowen amloho Yosafat endepag. At Yosafat etnowen amloho Yoram endepag. At Yoram etnowen amloho Uzia endepag.

⁹ At Uzia etnowen amloho Yotam endepag. At Yotam etnowen amloho Ahas endepag. At Ahas etnowen amloho Hizkia endepag.

¹⁰ At Hizkia etnowen amloho Manasye endepag. At Manasye etnowen amloho Amon endepag. At Amon etnowen amloho Yosia endepag.

¹¹ Eke at Yosia etnowen udaki Yekhonya osi inim endag inapag. Endag inapag ari, it Israel aphe epmano o Babel wilip isebagma epmano wilil endag inapag.

¹² O Babel wilip isaruk apagma, at Yekhonya etnowen amloho Sealtiel endepag. At Sealtiel etnowen amloho Zerubabel endepag.

¹³ At Zerubabel etnowen amloho Abihud endepag. At Abihud etnowen amloho Elyakim endepag. At Elyakim etnowen amloho Azor endepag.

¹⁴ At Azor etnowen amloho Zadok endepag. At Zadok etnowen amloho Akhim endepag. At Akhim etnowen amloho Eliud endepag.

¹⁵ At Eliud etnowen amloho Eleazar endepag. At Eleazar etnowen amloho Matan endepag. At Matan etnowen amloho Yakub endepag.

¹⁶ Eke at Yakub etnowen amloho Yusuf etno endepag. At Yusuf etno Maria oho welapag. Oho weregma at Maria etnowen Yesus, inuk misig Kristus etno endepag.

¹⁷ Ari halug, Abraham udaki etamuki empat belas endag inaptuk apagma, fobik at Daud endepag. At Daud endag atuk apareg, udaki etamuki empat belas endag inaptuk apagma, fobik it aphe epmano o Babel etno wilip isebag. O Babel etno wilip isaruk apagma at misig etnowen udaki etamuki empat belas endag inaptuk apagma, fobik At Kristus etno endag apag.

At Yesus Kristus endag apahon wene 1:18-25

¹⁸ At Yesus Kristus endag apag etno ariroho endag apag. At isina Maria Yusuf wene watukon etno inim dambuksoho awan heheg, Roh Kudus etno fam ahumla apag.

¹⁹ Ariroho ahumla atuk apagma, at Yusuf indi fano weregma, uhwe selegma enggali wabuk amberaken hwe etno herako sohorep isaminen ulug ahla bebag.

²⁰ Ahla buruk apareg weregma, eke hubanggo nohorukmu i og haruk wilil, Allah malaikat etno at ambeg waharuk apareg, yig ituk wilil, “Yusuf Daud etamu wai. Huhwe Maria holao hambit ha fug-o. Udag ahumlareg ari, Roh Kudus fam ahumla atisi-o.

²¹ Eke udag ebe endetuk halug, inuk Yesus-at soaluhun-o. Eke it apheyen dag surukon elegsoho apma imbisalug inili wahu halug, inuk ari-at soaluhun-o.

²² Eke At Allahen at nabi ap une fam ebahon etno demat sirisi-o ulug inahla bukag ulug ariroho ahumla atisi-o.

²³ At nabi etnowen hurumbik yig isaruk wilil, ‘Hwe duhumon misig udag ahumla aruhuon etno du ha manu-o. Aren fobik udag etno ap angge-at enderuhumu, inuk Imanuel soaluhup-o.’ Eke, inuk ari, ‘Allah ninim welahe-o’ ulug soaluhup ulug at nabi etnowen ebahon etno yig hirihi-o,” ulug at malaikat etnowen Yusuf yig epag.

²⁴ Yig ituk apagma, at Yusuf etno nohorukmu i og haruk apareg iluk apag, iluk atuk apareg, at Allah malaikat etnowen ebahon etno ilitoho suruk wilil, uhwe etno-at holebag.

²⁵ Holebareg oke, udag etno awan endetuk eleg heheg, inim dambuksoho nohoruk apag fug. Eke fobik udag manggia etno arat endetuk apagma, inuk Yesus-at soalfag.