Markus 9 - Allah Wene Hurumbik Keron

¹ Yig isaruk apareg, eke fobik yig isaruk wilil, “Hit aphe nin duma welahebon epmano waraheg eleg hiniluk wilil, At Allah weregmen oag weregsoho suhuon etno hinilanggen hahup-o, ulug An demat yig hisihi-o,” ulug yig isebag.

At Yesus olohore akeleg neken seg apahon wene 9:2-13

² Eke fobik, ininggik enggalimen angge welapareg, At Yesusen it Petrus, Yohanes, Yakobus etano og inaplug o bunumu aphe eleg ambeg epmano inakeleg-at lahabag. Laharuk apareg, epmano inim wilil, At olohore akeleg neken seg apag.

³ Akeleg neken seg atuk apareg, At asum obog apinag suruk wilil, hulu apag. Hulu apag ari, ap sum omatukon etnowen hulu amag ulug suruk elehon olohore ninon neken-at hulu apag. Asum etno obog-at hulu atuk apagma,

⁴ it Elia, Musa etano At Yesus inim wene baltukmu, it omini henahan etanowen inilanggen isebag. Inilanggen isaruk apareg, at Petrus etnowen Yesus yig ituk wilil, “Ninowe-o, nit duma fano-at welahe du, o henahan faluk-o.

⁵ Misig Hat hibam, misig at Musa ibam, misig at Elia ibam, o ebe eta-at faltul-o,” ulug yig epag.

⁶ Ariroho yig epag ari, it At omini inim etano inakol anggolo haruk apareg, at Petrus etno wene ariroho ik ulug apeleg heheg, we yuhun-at yig epag.

⁷ Yig ituk apagma, it etano hena misig ambik waharuk apareg, sebe inapag. Sebe inaptuk apagma, hena ahla epmanowen une misig yig isaruk wilil, “An Namloho nindi hunduhukon ari-at etna, hit At une-at holtuk amiek-o,”

⁸ ulug yig isaruk apagma, it etano inilanggen hiog hayog wenag haruk apag, it ap epmano eleg atuk apareg, At Yesus akeleg-at weregma inilanggen hebahon oke,

⁹ fobik bunumu epmanowen ambik waharuk apareg, At Yesusen yig isaruk wilil, “An hinilanggen neyehebon etno aphe yig isa fug-o, An Allahen minduhup naharision fobik aphe warehon wereg ambeg epmanowen niluk atlug waharuk nealug, yig isahuben-o,” ulug inesanggo wapag.

¹⁰ Inesanggo watuk apagma, it etanowen aphe werlekon inil fam uk sohorep isalug, irit uruk wilil, “At Ninowe etnowen aphe warehon wereg ambehen niluk atlug waruhuk yig nisehek etno, keroho ulug yig nisehek-o?” ulug uruk apag.

¹¹ Ariroho uruk apareg, At Yesus etno yig ituk wilil, “It wene baleg unde epmanowen at Elia bilin-at waruhu ulug uruk ari, keroho ulug yig nisaruk-o?” ulug At etno hinog webag.

¹² Hinog waruk apagma, At etnowen yig isaruk wilil, “Ariroho yig hisaruk ari, at Elia etno bilin waharuk aruhureg, aren yi angge di angge epmano dig dug seko umburuk aruhu, ulug yig hisaruk ari, demat yig hisaruk oke, eke alem misig du hag, An Allahen minduhup naharision etno nobam dag seko embeheg, eke inambit neyeheg suhup, ulug wene baleg wereg ari, keroho ulug wereg buruk ahep-o?” ulug yig isaruk apareg,

¹³ eke fobik yig isaruk wilil, “At Elia etno arat nisa wapareg, ninim weregma wene baleg etno fam ariroho obam dag seko umbuhup, ulug wene fam ahurumbik ebag etno ilitoho, it aphe inindien arat umburusa ulug yig hisaruk ahi-o,” ulug yig isebag.

At Yesusen udag misig setan indimu kebahon etno fano sebahon wene 9:14-29

¹⁴ Yig isaruk apagma, it At omini nin epmano inambeg wapag. Waharuk apag, it aphe nin anggolo inambeg wonggaleg wilil, it wene baleg unde epmano ninen At omini epmano inim wene sahaltukmu ilanggen isebag.

¹⁵ Ilanggen isebareg fam, it aphe epmanowen At waharuk inilanggen haruk apareg, wi ulug fog suruk wilil, At ambeg dulum-at wapag. Waharuk apareg, inim heahi war war uruk apareg,

¹⁶ At etnowen yig isaruk wilil, “Hit wene alem nongge farim hinim sahaltuk ahep-o?” ulug yig isebag.

¹⁷ Yig isaruk apagma, it aphe anggolo wonggalfahon epmano inanggelegma ap misig welapareg yig ituk wilil, “Nowe Yesus wai. An namloho etno setan une elehon misig indimu kirisimu, walug Hat hambeg wahi-o.

¹⁸ Eke at udag ebe setan indimu kuruk halug, ebe kweanma yinaheg, eke hinel wareheg, eke ayeg kilit mareheg, eke elma wasup herog eheg, eke ebe warehon neken aplohok eleg aheg suruken Hat homini epmano inambeg setan du wilipfiek-o, ulug yig isihion oke, iren wilipfuk hai ahama imbisehesa-o,” ulug yig epag.

¹⁹ Yig ituk apagma, eke At Yesus etnowen yig isaruk wilil, “Nomini-o, hit An ninim welaheon oke, hinindi fikfag ebereheg eleg sil nuruk ahep du, An ninggik maren hit ninim welatlug nibam lahuk-o? Eke An hit ninim welam ari nambit-o. Eke An nebe ninggik maren ninim welatlug lahuk-o?” ulug yig isaruk apareg, eke at ap etno yig ituk wilil, “Hat udag ari walug nambeg ma-o,” ulug yig epag.

²⁰ Yig ituk apagma, at udag etno Yesus ambeg walug wapag. Walug waharuk apagma, setan udag etno indimu werehon etnowen At Yesus ilanggen haruk apareg, elekelek suruk apagma, at udag etno kweanma yin apag. Yin atuk apareg, dahag fahag suruk wilil, elma wasup anggolo herog ebag.

²¹ Elma wasup anggolo herog uruk apagma, At Yesusen yig ituk wilil, “Udag du ariroho inggik marenam sirisi-o?” ulug ikni etno yig ituk apagma, at etnowen yig ituk wilil, “At udag doron famen ariroho mondog-at suruk wilil,

²² ilikia hupmu, nintul nantul hondokma kolapfeheg, ikma yalepfeheg suruk atisireg, wariog ulug suruk atisi-o. Ariroho suruk atisireg fam, eke kidia Haren nit fano nisimin-o,” ulug yig epag.

²³ Yig ituk apagma, At Yesus etnowen yig ituk wilil, “Fano suruk hiluk halug ehen ari, keroho ulug ehen-o? It yi aphe di aphe obohen At Allah obam ebetuk isalug, iren kino urukon etno ilitoho-at suruk-o,” ulug yig epag.

²⁴ Yig ituk apagma, at ikni etnowen yig ituk wilil, “An nindi At Allah obam eberiog ulug suruk ahion oke, nindi biren am nowen Hat naso welamin-o,” ulug une suon-at yig epag.

²⁵ Yig ituk apagma, it aphe obog horog-at wonggalik waharukmu, At Yesus ilanggen isaruk apareg, setan etno winimug yig ituk wilil, “Hat setan hune eleg wilil hesanggo dohuon du wilip amin-o. Wilip atuk apmihinteg, fobik kik wam fug-o,” ulug winimug yig epag.

²⁶ Winimug yig ituk apagma, at setan etno une nga uruk apareg, dahag fahag suruk wilil, wilip apag. Wilip atuk apagma, udag etno ap warehon neken wereg heheg, it aphe epmanowen, “Waraha-o,” ulug uruk apag.

²⁷ Waraha-o ulug urukmu, At Yesus etnowen inggik senoko minduhupfuruk apagma, minapag.

²⁸ Minatuk apagma, At omini epmano inim uma undama kuruk apareg, inakeleg-at wene uruk wilil, “Setan wilip amag ulug seheon oke, niren ehema wilip aheg eleg-at bok welaha ari, keroho ulug sehek-o?”

²⁹ ulug uruk apagma, At etnowen yig isaruk wilil, “At setan ariroho-at wereg halug, sembahyang-at urukmu wilip atuk-o. Yi wene di wene epmano uruk isalug, wilip atuk eleg-o,” ulug yig isebag.

At Yesusen An nowabuhupmu niluk aruhuk ulug fobik inim yig isebahon wene 9:30-32

³⁰ O epmanowen wilip atuk apareg, o Galilea lebag. Laruk apareg, yig isaruk wilil, “An nebe duma wereg neyeheg, hiren aphe yig isa fug-o, An nambit-o,” ulug yig isebag.

³¹ Yig isaruk apareg, eke fobik yanggul isaruk wilil, “An Allahen minduhup naharision etno senoko og naplug laruk amuhupmu, nowabuhup-o. Nowabuhubon oke, ninggik henahanam welatlug niluk aruhuk-o,”

³² ulug yanggul isaruk apagma, it epmanowen uruk wilil, “Wene duroho yig nisehek du, keroho ulug yig nisehek-o?” ulug ebareg oke, hinog wao inakolen sohorep isebag.

An suon hat suon ulug urukmu At Yesus etnowen inesanggo wapahon wene 9:33-37

³³ Eke fobik o Kapernaum etno wapag. Waharuk apareg, uma epmano kebag. Kuruk apareg, At Yesusen it epmano yig isaruk wilil, “Hit kwalema waharuk wilil, nongge wene il waharuk hisihi-o,” ulug yig isaruk apagma, it epmano inakolen inune eleg-at bok apag.

³⁴ Ariroho bok apag ari, kwalemen irit wene baltil waharuk wilil, an suon, hat suon, ulug il wapahon etno fam inune eleg-at bok apag.

³⁵ Bok atuk apagma, At etno horie uruk apareg, At omini dua belas epmano wol isaruk apagma, it epmano wapag. Waharuk apagma, Aren yig isaruk wilil, “Hit ap misihen an suon at-o ulug uruk halug, ebe kimbuangge neken wilil hinanduanangge-at welamag-o,”

³⁶ ulug yig isaruk apareg, udag doron misig walug it inil fam inambeg bulmu epmano minduhupfebag. Minduhupfuruk apareg, ahumu furuk haruk wilil yig isebag, “It udag nin ariroho-at An ninuk baloko og inaptuk amuhupseg, heahi war inaptuk hisalug, An nebe-at og nabuhup-o.

³⁷ Eke An nebe og nabuhup halug ari, At lahap nabik waharision etno-at wahup-o,” ulug yig isebag.

Kristus udaki ninim dambuksoho welam ari fano-o ulug yig isebahon wene 9:38-41

³⁸ Yig isaruk apagma, at Yohanes etnowen yig ituk wilil, “Ninowe Yesus wai, ap misig setan indimu kebahon etno at ap misihen Hat hinuk fam lisoko wiliptuk ninilanggen hehe-o. Haruk ahereg, yig ituk wilil, ‘Hat hebe nit ninomin neken eleg wilil, haren ariroho suk hai-o,’ ulug winimug yig erehe-o,” ulug yig ituk apagma,

³⁹ eke At Yesus etnowen yig ituk wilil, “Hiren ariroho winimug yig isa fug-o. It ap ninen An ninuk fam sukfuganggeroho suruk wilil, nabug baltuk eleg-o.

⁴⁰ Eke it ninim healeg welahe fuhon epmano fanoroho-at ninim dambulig welahe-o.

⁴¹ Eke it aphe nin epmanowen du Kristus udaki at-o, ulug ik honanggo og hisaruk halug, Anden sohorep isahuk fug-o. Onggo fanowon-at og isahuk-o, ulug yig hisihi ari An demat yig hisihi-o,” ulug yig isebag.

Hiren hinomini epmano dag sukag ulug inindimu kahaluk fug-o ulug yig isebahon wene 9:42-50

⁴² Yig isaruk apareg, eke fobik yig isaruk wilil, “Eke it udag doron epmano An nobam ebetukon oke, iren dag sukag ulug at ap misihen inindimu kahaltukmu dag suruk ari, at ap etno anggolop fam helep liloko ikma belapfelepmen fano-o.

⁴³ Ari halug, hininggiken dag suruk ahebon epmano baloko imbiuk-o. Eke baloko umbulug o hiniluk welam ambeg epmano lao ari fano-o.

⁴⁴ Eke hininggik baleg eleg biren wereg etno fam o hondok ambulpul nangguk aheg eleg welaruhu ambeg epma lao ari hai-o.

⁴⁵ Ari halug, eke hiniogen dag suruk ahebon epmano inim baloko imbiuk-o. Baloko umbulug o hiniluk welam ambeg epmano isokanggog kuk ari fano-o.

⁴⁶ Eke hiniog baleg eleg biren wereg etno fam o hondok ambulpul nangguk aheg eleg welaruhu ambeg epma hinombisahuk ari hai-o.

⁴⁷ Eke hinilanggenen dag suruk ahebon halug, femag fil huliloko imbiuk-o. Femag huliloko umbulug At Allah weregma kuk ari fano-o. Eke hinilanggen femag femag wereg halug, o hondok olokma hinombisahuk ari hai-o.

⁴⁸ Eke fobik o epma lalug hinebe waraheg eleg hiseheg hinobam kulanggen umburuk aruhu-o. Eke hondok hinaruk aruhuon etno nangguk aheg eleg mondog-at welaruhu-o.

⁴⁹ Eke saho fam orom engga foltuk etno hag, hondok anggelalo fam hinobam fol hinaptuk aruhu-o.

⁵⁰ Eke saho olokon etno ebe fano wereg oke, olok eleg atuk halug, keroho olokepfuk-o? Ari halug, saho olokon hinindimu wilil, hit hit hinim fanoroho dambulig welamuk-o,” ulug yig isebag.