Markus 5 - Allah Wene Hurumbik Keron

O Gerasa etnowon ap misig setan indimu kebagma lisoko wilipfebahon wene 5:1-20

¹ Eke fobik ik Galilea baloko it Gerasa ap wereg ambeg etno lebag.

² Laruk apareg, so famen wilip atuk apagma, ap misig setan indimu kebahon etno ap warehon imbisaruk ambeg epmanowen At Yesus ambeg wapag.

³ Eke at ap etno ibam it ap warehon imbisaruk ambeg epmano-at weregma, it ninen inggik hele wabulen ulug wal hebahon oke, hai apag.

⁴ Eke inggik inim, iog inim nintul nantul hele watuk apahon oke, inggik iog fil hihiburuk hele warepfurukon etno hibil atuk apag. Hibil atukmu, it aphe obohen uruk wilil, “Ap du senebuk hai-at hehe-o,” ulug sohorep isebag.

⁵ Sohorep isaruk apagma, ilikia hupmu aphe warehon imbisaruk ambeg epmano inim, eke bunu alo anggolo wereg ambeg epmano inim laruk wilil, une suon eheg, eke onggarehen helep fam-at wateheg, sil laruk apag.

⁶ Laruk apareg, epmano wilil, At Yesus etno o yatma-at ilanggen yet haruk apareg, At ambeg buahen wapag. Waharuk apareg, indibahal yungguksoho wilil, heahi wapag.

⁷ Heahi watuk apareg, une suon yig ituk wilil, “Hat Yesus Allah boholmon Amloho wai. An keroho seko nombahiog ulug wahen-o? Haren an nowabuk nowen ulug At Allah inuk fam yig hirihi-o,” ulug yig epag.

⁸ Ariroho yig epag ari, At Yesusen at ap setan indimu kebahon etno, “Hat setan ap du indimu welahenon etno wilip amin-o,” ulug yig ituk apagma, ariroho ebag.

⁹ Ariroho uruk apagma, eke At Yesusen yig ituk wilil, “Ari halug, hat hinuk sa-o?” ulug yig ituk apagma, at etnowen yig ituk wilil,

¹⁰ “Nit ninebe anggolo-at welahe etno fam, ninuk Legion ari nit ninune fam anggolo ulug soalsalug welahi-o, Nowe. Ari halug, it inebe anggolo nindimu werehon epmano lisoko yatma wilip isa fug-o,” ulug hinog yig epag.

¹¹ Yig ituk apareg wereg heheg, it wam epmano kwean naruk ambeg dom alma irlilmu epmano weregma,

¹² it setan obohen At Yesus etno yig ituk wilil, “Nit wam inindimu epma kulen lahap nisahin-o,” ulug yig ituk apagma,

¹³ At Yesus etnowen, “Ari halug fano at-o, hit hinebe epma aliek-o,” ulug yig isaruk apagma, it setan epmano ap etno indimuen wilip atuk apareg, wam epmano inindimu kebag. Kuruk apagma, yi wam di wam obog inebe dua ribu bule enggatgatma epmano wilil, ununuroho laruk apareg, ikma epmano bule ambebagma, iken waroko og inaplug lebag.

¹⁴ Iken og inaplug laruk apagma, it ap wam inaso welapahon epmano hite wilip atuk apareg, wam iken og inapahon wene etno aphe uma werehon inim, eke yabukmu werehon inim yig isil nuruk apagma, it aphe epmanowen uruk wilil, “Keroho surukmu isehesareg ehesa-o,” ulug wenag inabik lebag. Wenag inabik laruk apareg, fobik At Yesus ambeg waharuk apag,

¹⁵ at ap setan anggolo indimu kebahon etno indi ubulukmu atuk apareg, sum wantoho epmano horieg weregma inilanggen haruk apareg, inakol apag.

¹⁶ Inakol atuk apagma, eke it bilin inilanggen hebahon epmanowen at ap setan indimu kebagma wilip apahon etno inim, eke wam inindimu kebahon epmano inim obog-at olmadiloko yig isebag.

¹⁷ Yig isaruk apagma, epmanowen yig ituk wilil, “Yesus wai, Hat nit wereg ambeg ninim welahe ari sohorep isalug, lag-o,” ulug yig ituk apagma,

¹⁸ At Yesus etno so fam ikma epmano kiog ulug sebag. Kiog ulug suruk apagma, at ap setan indimu welapahon etnowen yig ituk wilil, “Yesus wai, Hat an ninim welamuhuk-o,” ulug yig epag.

¹⁹ Yig ituk apagma, eke At Yesus etnowen yig ituk wilil, “Eleg-o, hat hibam howe not wereg ambeg laruk apmihinteg, An nowe inuk suon etnowen nabua nearuk wilil, sukfuganggeroho fano nabehek-o, ulug yig isa alu-o,” ulug yig ituk apagma,

²⁰ at etno laruk apareg, an At Yesusen sukfuganggeroho fano nabehek-o, ulug o ahik misig inuk Dekapolis etno yig isil nurukmu, it aphe obohen fog suruk apag.

At Yairus ahaloho etno inim eke hwe amep nintul nantul waharukon etno inim fano inapahon wene 5:21-43

²¹ Fog suruk iseheg, eke At Yesus etno so famen ik femag waharuk apareg, ik ayegma wilip apag. Wilip atuk apareg weregma, it aphe obog At ambeg wonggalik wapag.

²² Wonggalik wapareg weregma, ap misig inuk Yairus, o Allah wene uruk ambeg inaso werehon etno waharuk apareg, At Yesus ilanggen halug, indibahal yungguksoho ut kunukseg wilil,

²³ “Yesus wai, an nahaloho uk wareg wilil wararikon-o. Ari halug iluk amagsoho Haren ungguluag hinggik seneg wilil fano simihinen ma-o,” ulug yig ituk mondog-at werehen inim lebag.

²⁴ Inim laruk apagma, it aphe anggolo ambolma laruk wilil, kelelegsoho lebag.

²⁵ Kelelegsoho laruk wilil, hwe misig dua belas tahun amep nintul nantul waharuk mondog welapahon etno inim lebag.

²⁶ Eke at etno uk wareg wilil, eleg arikon neken it ap fano inaptukon anggolo inambeg laruk wilil, onggo umburuk apahon oke, eleg am sohorep isalug mondog anggolo welapag.

²⁷ At hwe etno ariroho amep anggolo waharuk wilil weregma, it aphe ninen, At Yesus etno aphe fano inabil nuruk-o, ulug urukmu, esanggo holtuk apareg, it aphe obog At ambeg wonggalik waharukmu, at hwe etno inim waharuk apareg, ahla buruk wilil,

²⁸ “Anden asum ninggik sen haruk nealug, fano nabikon-o,” ulug ahla buruk apareg, asum inggik sen hebag.

²⁹ Asum sen haruk apagma, at amep nintul nantul waharuk apahon etno arat eleg apag. Eleg atuk apagma, at hwe etnowen uruk wilil, “Namep waharuk atision etno kidia eleg aha hihi-o,” ulug ahla buruk heheg,

³⁰ At Yesus etno ahla buruk wilil, “An noag weregsoho aphe fano inaptuk ahion etno wilip aha hihi-o,” ulug ahla buruk wilil, it aphe obog At ambolma fanggog ik wapahon epmano ilanggen dahagsoho yet isebag. Yet isaruk wilil, “An nasum sen senerehen-o,” ulug yig isebag.

³¹ Yig isaruk apagma, it At omini epmanowen yig ituk wilil, “It aphe kelegsoho wereg iseheg, An nasum sen senerehen-o ulug uruk ahen ari, keroho ulug uruk ahen-o?”

³² ulug yig ituk apagma, At etnowen yig isaruk wilil, “Eleg-o, An nasum ari sen senerehen-o?” ulug ilanggen fikfag wenag inapag.

³³ Fikfag wenag inaptuk apagma, at hwe asum sen hebahon etno akolen oag del haruk wilil, At ambeg kunuk ebag. Kunuk uruk apareg, elekelek suruk wilil, “Hasum anden senerihi-o,” ulug yig epag.

³⁴ Yig itug apagma, At etnowen yig ituk wilil, “Nahaloho-o, hat hindimu An nobam eberepfulug wahenteg fam fano ahen-o. Arat fano ahenteg fam, uk ari hobam aruhu fug-o, nahaloho wa,” ulug yig ituk heheg,

³⁵ at ap o Allah wene uruk ambeg inaso werehon etno osi nin at ibamen lahap isaruk apagma, waharuk apareg, yig ituk wilil, “Yairus wai. Hat hahaloho etno mondog arat warahama, At Ninowe yanggul nisarukon ari luk ulug yig um fug-o,” ulug yig epag.

³⁶ Ariroho yig epahon etno At Yesus esanggo holfareg-at oke, holtug eleg neken at Yairus etno yig ituk wilil, “Hindi dag am imbisalug, An nobam-at ebetuk amin-o,” ulug Aren o Allah wene uruk ambeg inaso werehon etno yig epag.

³⁷ Yig ituk apareg, it Petrus inim, Yakobus inim, Yohanes Yakobus ot etno inim, “It ari hag An ninim lul-o,” ulug yig isaruk apareg, At Yesus inim lebag.

³⁸ Laruk apareg, at ap it Yahudi ap inaso werehon etno ibam laruk apag ioba yatukmu inesanggo hol hol uma kebag.

³⁹ Kuruk apareg, yig isaruk wilil, “Hole du waraha fug-o. Ebe nohoruk heheg, keroho ulug hinaplohok anggolo suruk wilil, ioba yatuk ahep-o?”

⁴⁰ ulug yig isaruk apagma, it epmanowen warahaon heheg uruk ulug inahla buruk apareg, ahunda yapag. Ahunda yatuk apagma, At etnowen it obog wilip isaruk apareg, at hole etno ikni isina inim, eke At omini henahan inim wapahon etano inim at hole etno wereg ambeg kebag.

⁴¹ Kuruk apareg, inggik sen haruk wilil, it inune fam, “Talita kumi-o,” ulug ebag ari, nit ninune fam ‘Hole du minamin’ ulug yig hituk ahi-o,

⁴² ulug yig ituk apagma, hole etno minatuk apareg lebag. Eke at hole etno ebe awan su atuk wilil, dua belas tahun welapag.

⁴³ Eke at hole etno minatlug laruk apagma, it obohen wi ulug fog sebag. Fog suruk apagma, At Yesusen it epmano inesanggo watuk wilil, “Anden hole fano sihion du hiren aphe yig isa fug-o,” ulug yig isaruk apareg, eke “Fobik orom og imiek-o,” ulug yig isebag.