Markus 3 - Allah Wene Hurumbik Keron

At Yesusen ap inggik hunduhukon misig fano sebahon wene 3:1-6

¹ Eke fobik ap inggik hunduhukon etno it o Allah wene uruk ambeg epmano inim weregma, At Yesus etno kebag.

² Kuruk apagma, it aphe epmano inahla buruk wilil, o hari Sabat sembahyang uog ulug bok wereg niseheg oke, ap du fano sikon ano, eleg ano? Fano suruk halug, At o hari Sabat fam yabuk sehek ulug niren ninune obam denggeltulen-o, ulug inilanggen fikfag wenaharuk apag.

³ Inilanggen wenaharuk weregma, At Yesusen ap inggik hunduhukon etno yig ituk wilil, “Hat hebe minatuk apmihinteg bulmu dia ma-o,”

⁴ ulug yig ituk apareg, it epmano yig isaruk wilil, “Ari halug, wene duroho suruk amuk eke duroho suruk am fug ulug ebahon etno wereg heheg, o hari Sabat sembahyang uog ulug bok welahe etno fam, aphe fano seko imbisao ano, dag seko imbisao ano, eke inebe inili og inabuk ano, inusuk ano?” ulug yig isaruk apagma, it epmano inune ilik eleg-at bok apag.

⁵ Ariroho bok weregma, obam winimugsoho ilanggen bik iseheg, eke it aphe obog inindi dahon wereg isalug, inabua iseheg suruk apareg, ap inggik hunduhukon etno yig ituk wilil, “Hat kidia hinggik bung himin-o,” ulug yig ituk apagma, bung haruk apareg, inggik etno arat fano apag.

⁶ Fano atuk apagma, it Farisi ap epmano it Herodiani ap inim o Allah wene uruk ambeg etnowen dulum-at wilip atuk apareg, ap du keroho wabuhuk-o ulug wene baltuk apag.

At Yesus etnowen aphe anggolo fano inapahon wene 3:7-12

⁷ Eke fobik At Yesus, omini epmano inim ik ayegma laruk apagma, it yi aphe di aphe obog-at o Galileaon inim,

⁸ eke o Yudeaon inim, eke o Yerusalemon inim, eke o Idumeaon inim, eke o ik Yordan ik le femag epmanowon inim, eke o Tirus Sidon o ahik ya da epmanowon inim obog-at ombolim lebag. Eke it epmano Aren fano inabil waha-o, ulug urukmu, inesanggo holtuk apareg, it obog At ambeg wonggalik lebag.

⁹ At ambeg wonggalik laruk apagma, At Yesus etnowen omini epmano yig isaruk wilil, “Kidia aphe keleg atuk du, An fonggogsoho wilip nahuk nowen, so ambian motoho walug maniek-o,” ulug yig isebag.

¹⁰ Yig isaruk apareg, eke Aren it aphe nin arat fano inaptuk apagma, it uk warehon nin epmanowen Yesus ininggik sen huog ulug aphe nin heal iseheg horogsoho lebag.

¹¹ Horogsoho laruk apagma, it setan inindimu kebahon epmanowen At Yesus inilanggen halug, seberoho yin atuk apareg, uruk wilil, “Hat hebe At Allah Amloho at-o,” ulug inune ariroho-at yig epag.

¹² Inune yig ituk apagma, At Yesus etnowen it setan dahon inindimu werehon epmano yig isaruk wilil, “An hinilanggen neyehebon etno aphe yig isa fug-o,” ulug inesanggo watuk apag.

At Yesus etnowen omini dua belas epmano wol isebahon wene 3:13-19

¹³ Inesanggo watuk apareg, At Yesus etno bunumu lahabag. Laharuk apareg, At indi eberoko ahla buruk apareg, it inebe dua belas mondep isebahon epmano wol inapag.

¹⁴ Wol inaptuk apagma, At ambeg balu sik wapag. Balu sik waharuk apagma, it inebe dambuksoho minduhup isaruk apareg, yig isaruk wilil,

¹⁵ “Hit ninim dambuksoho welaheg, eke An nune etno yig iseheg, eke setan inindimu kurukon lisoko wilip iseheg suruk amuhuben ulug heako mondep hisaharuk ahi-o,” ulug heako imbisebag.

¹⁶ It inebe heako imbisebahon etano, at Simon, inuk fobik Petrus soalfahon etno inim,

¹⁷ eke it Zebedeus udaki Yakobus, ot Yohanes etano, ininuk it inune fam Boanerges, ari nit ninune fam ‘Bohol une udaki’ ulug soal inapahon etano inim,

¹⁸ eke at Andreas etno inim, eke at Filipus etno inim, eke at Bartolomeus etno inim, eke at Matius etno inim, eke at Tomas etno inim, eke at Yakobus Alfeus amloho etno inim, eke at Tadeus etno inim, eke at Simon Zelot ap etno inim,

¹⁹ eke at Yudas Iskariot, fobik Yesus senebukag ulug yonggo lebahon etno inim, it epmano obog-at heako imbisaruk apareg, At ibam kebag.

It wene baleg unde epmanowen Roh Kudus abug balfahon wene 3:20-30

²⁰ Kuruk apareg, ibam epmano wereg heheg, fobik aphe obog kelegsoho wonggalik kuruk apagma, it epmanowen orom nawim keroho suk-o, ulug uruk apag.

²¹ Ariroho urukmu, it ninen ap du nenek neken suruk hehe-o, ulug uruk apagma, At osi, isasi inim inesanggo holtuk apareg, ebe senebuog ulug lebag.

²² Senebuog ulug laruk iseheg, it ap wene baleg unde nin epmano o Yerusalemen waharuk apareg, uruk wilil, “Ap du iblis Beelzebul indimu kehek-o. Eke Aren it iblis inindimu kurukon epmano lisoko wilip isaruk ari, at Beelzebul iblis inowe etno oag werehon etno og ituk hehe-o,” ulug yig epag.

²³ Yig ituk apagma, At Yesus etnowen it aphe obog At ambeg wonggalik wamag ulug wol isaruk apareg, wene ilitoho neken yig isaruk wilil, “At iblis misihen iblis misig inindimu kurukon etno lisoko wilipfuk ari hai-o,” ulug uruk apareg, eke fobik yig isaruk wilil,

²⁴ “O ahik misihon it minggiroko wilil umayirluk aptuk isalug, inoag eleg aruhu-o.

²⁵ Eke ap ungguluag misihon it minggiroko wilil umayirluk abuhup etno fam, inim healeg welamuhup-o.

²⁶ Eke iblis owe ot inim healeg wilil irit aptuk isalug, inoag mondog eleg aruhu-o,”

²⁷ ulug yig isaruk apareg, eke fobik yig isaruk wilil, “At ap oag werehon ibam unde etno ilanggen wereg heheg, aren angge wak kuk ari hai-o. Eke ap etno hele waroko umbulug-at it ap ninen aren angge herako walug wilip atuk-o,” ulug yig isaruk apareg,

²⁸ eke fobik yig isaruk wilil, “It apheyen yi dag di dag surukon epmano inim, eke nintul nantul aphe inabug baltukon epmano inim At Allahen inobam inapelegsoho sohorep isalug, apma imbisahu oke,

²⁹ eke At Roh Kudus etno abug baltuk isalug, At Allahen inobam inapelegsoho apma imbisahu fug-o. Iren Roh Kudus etno abug baltuk ari, inoag deloko o dagma welamon etno-at imig saruk-o, ulug An demat yig hisaruk ahi-o,” ulug yig isebag.

³⁰ Ariroho yig isebag ari, iren iblis indimu kehek-o, ulug yig epahon etno fam ariroho yig isebag.

At Yesusen An nisina nosi inebe du at-o ulug yig isebahon wene 3:31-35

³¹ Yig isaruk weregma, At isina osi inim waharuk apareg, selema minduhuk wilil, At ebe wamag ulug yig isebag.

³² Yig isaruk apagma, it aphe obog At ambeg wonggalik wapareg horieg werehon epmanowen yig ituk wilil, “Ninowe-o, hisina hosi selema wilil wol haptuk-o,” ulug yig ituk apagma,

³³ At Yesusen yig isaruk wilil, “An nisina nosi ari sandeg-o?” ulug yig isebag.

³⁴ Yig isaruk apareg, At ambeg horiehon epmano wenag inaptuk wilil, “Eleg-o, An nisina, nosi inim inebe du-at wereg-o.

³⁵ At Allahen une yig isarukon etno inesanggo holtukon halug ari, An nisina nosi-at wereg-o,” ulug yig isebag.