Markus 11 - Allah Wene Hurumbik Keron

At Yesus etno o Yerusalem lebahon wene 11:1-11

¹ O Yerusalem etno luog ulug, Zaitun bunumu apma o sili inuk Betfage horog Betania etano laruk apareg, epmano wilil, At omini biren lahap isebag.

² Lahap isiog ulug yig isaruk wilil, “O sili misig erahuk aliek-o. Laruk atlihipseg, wam keledai misig amboloag fam horie uruk elehon etno kumbi lilig weregma hinilanggen halihip-o. Haruk atlihipseg, loloko walug maniek-o.

³ Loloko walug waharuk hisalug, it aphe epmanowen, ‘Hit wam kumbi keroho ulug loltuk ahep-o?’ ulug yig hisaruk isalug, hiren ‘Nit At Ninowe etnowen nanggom elehen keledai misig wak aliek-o,’ ulug yig nisehekseg fam, yoho walug laruk amulteg, ubulukmu imbik wamul yig isimuk-o,” ulug yig isebag.

⁴ Yig isaruk apagma, it epmano laruk apareg, wam keledai misig kwalem suon fam enggatgatma kumbi lilig weregma inilanggen haruk apareg loltuk apagma,

⁵ it aphe epmanowen yig isaruk wilil, “Hit wam kumbi nolug loltuk ahep-o,” ulug yig isebag.

⁶ Yig isaruk apagma, it epmano At Yesus etnowen ariroho iuk ulug yig isebahon etno yig isaruk apagma, eke it epmanowen yig isaruk wilil, “Ariroho ehekseg fam ari, walug aliek-o,” ulug yig isaruk apagma,

⁷ wam keledai etno At Yesus ambeg walug waharuk apareg, it inasum selemon loloko wam amboloag fam umburuk apagma, At Yesus etno wam amboloag fam horie ik lahabag.

⁸ Horie ik laharuk apagma, it aphe epmano it ninen kwalema inasum dalepfeheg, eke it ninen e engga yumbuksoho dalepfeheg suruk apareg,

⁹ it nin bilin it nin fobik laruk wilil, “Hosana ebag, ari nit ninune fam ‘Allah inuk suontepfuk-o,’ ulug uruk apareg, At Ninikni inuk suon wahaon du-at suontepfuk-o.

¹⁰ Eke at ninetamu Daud ubulukmu Ninowe suon welariog ulug wahaon du At inuk-at suontepfuk-o. Eke At Ninikni boholma werehon etno akeleg-at alon faluk-o,” ulug inune suon uruk apag.

¹¹ Inune suon il laruk apareg, o Yerusalem etno kebag. Kuruk apagma, At Yesus etno o Allah ibam epmanowen yi angge di angge obog-at wenahil nuruk apareg, fobik o hup aha-o, ulug At omini dua belas epmano inim o Betania wapag.

At Yesusen e ombomi etno homali embebahon wene 11:12-14

¹² Waharuk apareg, noholug ilikia o Betania etnowen kwalema laruk wilil, At Yesus etno orom obok atuk apagma,

¹³ e misig ombomi anggen neken narukon etno alit sobalfareg weregma o yatmen-at ilanggen yet haruk apareg, e etno anggen yihik ano eleg ano? ulug alma ilanggen bik ha wapag. Bik ha waharuk apag, anggen yihik eleg wilil engga-at sobalegma ilanggen hebag. Ariroho weregma hebag ari, e ombomi anggen neken yihirukon etno ili wapag fureg fam, ariroho weregma ilanggen hebag.

¹⁴ Ilanggen haruk apareg, e ebe etno yig ituk wilil, “Hat e du aphe nawag ulug hanggen yihuk fug-o,” ulug winimug epag. Ariroho winimug itukmu it omini epmanowen inesanggo holfag.

At Yesus etno o Allah ibam kuruk apareg it aphe onggo hundutukon epmano muko wilip isebahon wene 11:15-19

¹⁵ Inesanggo holtuk apareg, o Yerusalem etno laruk apagma, At Yesus etno o Allah ibam etno kebag. Kuruk apareg, it ap yi angge di angge onggo baltuk apahon epmano muko selema wilip isiog ulug, it uang anggen hundutukon inahe daleg epmano dahagsoho lemelepfeheg, eke it ap sue yalme inambeg hundirik kurukon epmano inahe daleg epmano lemelepfeheg sebag.

¹⁶ Ariroho suruk apareg, yig isaruk wilil, “Hit o Allah ibam duma yi angge di angge walug wilip aheg kik waheg suruk ahep du, suk fug-o,” ulug yig isebag.

¹⁷ Yig isaruk apareg, eke fobik yig isaruk wilil, “At Allahen ebahon etno Alkitab fam wene baleg weregma yig hisamin-o. At Allahen, ‘An nibam ari it yi aphe di aphe obog inungguluag dombog-at sembahyang ik kuruk ambeg inibam du at-o,’ ulug uruk amuhup-o, ulug ebahon etno hinapeleg ano? Ariroho ebahon etno wereg heheg oke, it ap yi angge di angge inalomnangge heraharukon epmano inakolen heraharik laruk etno hag, hit At Allah ibam du kik waharuk ahep-o,” ulug yangguloko yig isebag.

¹⁸ Yangguloko yig isaruk apagma, it ap Allah unde suon epmano inim, it wene baleg unde epmano inim ariroho yig isebahon etno inesanggo holtuk apareg, uruk wilil, “Niren keroho wabuk behep-o?” ulug abug balfag. Ariroho abug balfag ari, it aphe obog wonggalfahon epmanowen At Yesusen yanggul isebahon etno wi ulug fog suruk isaruk apareg, inakolen abug balfag.

¹⁹ Abug balfahon oke, o hup atuk apagma, At Yesus omini inim o sili su ambeg epmano sohorep isalug, wilip apag.

E ombomi etno bug apahon wene 11:20-26

²⁰ Wilip atuk apareg, noholug ilikia kwalema laruk wilil, e ombomi anggen neken yihirukon etno engga inim, omanggen inim obog-at bug apagma, inilanggen hebag.

²¹ Haruk apareg, at Petrus etno Yesusen e etno winimug epahon etno indimu ebetuk apareg, yig ituk wilil, “Nowe Yesus wai, e Haren winimug itikinon etno obog-at bug aha du hilanggen himin-o,” ulug yig epag.

²² Yig ituk apagma, eke At Yesus etnowen yig ituk wilil, “Ari halug, Anden yig hisaminon etno-at hinindi ebetuk amiek-o.

²³ Hit hinindi biren welahebon etno imbisalug, At Allah obam-at hinindi ebetuk wilil, bunu suon du leko lahalug ik yenggeleg du sebesik ambik ma-o, ulug uruk wilil, hinindi demat ebetuk hisalug, hiren uruk ahebon etno demat seg atukmu hinilanggen hahup-o, ulug yig hisihi ari demat yig hisihi-o.

²⁴ Ariroho yig hisihi ari, hit sembahyang uog ulug yi angge di angge kino uruk atlug, fobik hinindien arat wihi-o, ulug demat ebetuk hisalug, og hisahu at-o.

²⁵ Eke hit minatlug sembahyang uruk wilil, hit dag suruk ahebon epmano Hinikni boholma werehon etnowen hinobam hinapelegsoho apma hinombisahukag ulug, hiren ap du nambit-o, ulug hinim healeg welahebon etno, obam apelegsoho hinapma umburuk amuk-o,” ulug yig isebag.

²⁶ Yig isaruk apareg eke fobik yig isaruk wilil, hiren ap dag surukon etno apelegsoho hinapma umburuk eleg halug, At Hinikni boholma werehon etnowen hiren dag surukon epmano hinapelegsoho apma hinombisahaku fug-o.

At Yesusen yi angge di angge sebahon epmano hinog waruk apagma yig isebahon wene 11:27-33

²⁷ Yig isaruk apareg, it epmano iniog suhuluk o Yerusalem lebag. Laruk apagma, At Yesus etno o Allah ibam epmano larukmu inilanggen haruk apareg, it Allah unde inowesi epmano inim, it wene baleg unde epmano inim, it inowesi epmano inim At ambeg waharuk apareg, yig ituk wilil,

²⁸ “Hat yi angge di angge anggolo suruk ahen ari, keroho ulug suruk ahen-o? Eke sen hinggikmu imbirisimu suruk ahen-o?” ulug yig epag.

²⁹ Yig ituk apagma, At Yesus etnowen yig isaruk wilil, “An wene misig hinambeg hinog wamin-o. Hinog waruk apminteg, yig nituk hisalug, hiren sen hinggikmu imbirisimu suruk ahen-o ulug yig nituk ahebon etno yig hisamin-o,”

³⁰ ulug yig isaruk apareg, hinog og inaptuk wilil, “At Yohanes aphe ikma belap inaptuk atisi ari, boholmen yig itision fam ikma belap inaptuk atisi ano, eke apheyen yig ituson fam ikma belap inaptuk atisi ano? Hit hiniluk halug, yig nimiek-o,” ulug yig isebag.

³¹ Yig isaruk apagma, Aren wene yig isebahon etno fam irit uruk wilil, “Niren boholmen yig itision fam ikma belap inaptuk atisi-o, ulug yig ituk nisalug, eke Aren ariroho hiniluk oke, hiren at une etno eberoko weheg eleg welatikip ari, keroho ulug welatikip-o? ulug yig nisikon-o.

³² Eke niren apheyen yig ituson fam ikma belap inaptisi ulug yig ituk nisalug, it aphe obohen at Yohanes ari nabi ap Allah wene yig nisarukon demat hehe-o, ulug inindi ebetuk etno fam winimug nisahup-o,” ulug uruk apareg, yig um inakolen sohorep isebag.

³³ Inakolen sohorep isaruk apareg, yig ituk wilil, “Nit ninapeleg-o,” ulug At Yesus etno yig ituk apagma, eke At Yesus etnowen yig isaruk wilil, “Ari halug, Anden yi angge di angge suruk ahion epmano Aren ninggikmu imbirisi-o ulug yig hisamin fug-o,” ulug yig isebag.