Markus 10 - Allah Wene Hurumbik Keron

Ap misihen hwe du nambit-o ulug uruk wilil sohorep isao ari fano ano dag ano? ulug yig isebahon wene 10:1-12

¹ Eke fobik o epmano sohorep isalug, o Yudea epmanowen ik Yordan femag lebag. Laruk apagma, it aphe anggolo At ambeg wonggalik wapag. Waharuk apareg weregma, it nin wene yanggul isil nuruk apag etno ilitoho-at yanggul isebag.

² Yangguloko yig isarukmu, it Farisi ap epmano At ambeg waharuk apareg, Aren baluog ulug yig ituk wilil, “Wene duroho suruk amuk eke duroho suruk am fug ulug ebahon etno wereg heheg, ap misig uhwe amberaken sohorep isao ari fano ano, dag ano? Haren yig nisimin-o,”

³ ulug yig ituk apagma, eke At Yesus etnowen yig isaruk wilil, “At Musaen wene duroho suruk amuk eke duroho suruk am fug ulug ebahon etno yig hisaruk wilil, wene alem du hag keroho yig hisebag-o?” ulug yig isebag.

⁴ Yig isaruk apagma, it epmanowen yig ituk wilil, “At Musaen duroho yig nisebag-o. Hwe du nambit-o ulug wene baloko og ituk aruhureg, sohorep isahu ari fano-o, ulug yig nisebag-o,”

⁵ ulug yig ituk apagma, At Yesus etnowen yig isaruk wilil,

⁶ “Hit hinindi hinahlahiroho welahep etno fam wene ariroho yig hisebahon oke, eke bilin At Allahen yi angge di angge wal hiog ulug suruk wilil, ap wal heheg, hweap wal heheg sebag-o.

⁷ Ariroho wal hebareg fam, it aben iniknisi inisina sohorep isalug inuhwesi inim dambuksoho welam ari fano-o.

⁸ Ari halug, inebe misig-at dambuksoho wilil, inebe biren oke, biren neken welam sohorep isalug, misig-at dambuksoho welamuhup-o,” ulug yig isebag.

⁹ Yig isaruk apareg, eke fobik yig isaruk wilil, “Ari halug, At Allahen dambuk inaptukon etno it apheyen heal inabuk ari hai-o,” ulug yig isebag.

¹⁰ Yig isaruk apareg, uma epmano kuruk apagma, it At omini epmanowen yig ituk wilil, “Hat wene etno nongge wene yig nisehen-o?” ulug hinog webag.

¹¹ Hinog waruk apagma, eke At etnowen yig isaruk wilil, “Ap misihen hwe bilinon sohorep isalug, werlekon waruk ari, at uhwe etno wereg heheg ari, alomnangge neken-at suruk-o.

¹² Eke at hwe misihen ahun bilinon etno sohorep isalug, ap werlekon waruk ari, hwe etno alomnangge neken-at suruk-o,” ulug yig isebag.

Udag doron sen inaplug wilil Nikni wa ulug sembahyang ebahon wene 10:13-16

¹³ Yig isaruk apagma, it aphe ninen udag doron epmano Aren inggik sen inabukag ulug og inaplug ambeg imbisa waharuk apagma, At omini epmanowen winimug yig isebag.

¹⁴ Winimug yig isaruk apagma, At Yesus etno asine haruk apareg, yig isaruk wilil, “It udag doron epma An nambeg wamag-o. It udag doron epmano At Allah weregma welamuog ulug waharuk isalug, winimug yig isa fug-o.

¹⁵ Eke it udag doronen Allah wene waruk ari hag, hit ariroho nintul nantul waruk amuhup fug halug ari, At Allah wereg ambeg kuhup fug-o, ulug An demat yig hisaruk ahi-o,” ulug yig isebag.

¹⁶ Yig isaruk apareg, udag doron epmano ahoma wal kiko og inapag. Og inaptuk apareg, inungguluag inggik seneg wilil, Nikni Allah wa ulug sembahyang uruk apareg, ahien inobam embebag.

Udag aharek werehon misig etno At Yesus ambeg lebahon wene 10:17-31

¹⁷ Eke fobik kwalem suon liog ulug suruk apagma, ap misig At ambeg buahen laruk apareg, indibahal yungguksoho ut wandukseg wilil, “Ninowe-o, Hat wene fanoroho yanggul nisaruk ahenon du, an niluk welamon etno holahuken keroho sukag ulug hahla buruk ahen-o?” ulug yig epag.

¹⁸ Yig ituk apagma, At Yesus etnowen yig ituk wilil, “Hat keroho ulug An fanowon yig nirehen-o? At Allah akeleg-at fanowon wereg-o.

¹⁹ Ari halug, wene duroho suruk amuk eke duroho suruk am fug ulug ebahon etno hiluk-o. Ap wabuk fug-o. Eke hwe ap uhweon diloko wa fug-o. Eke hinalomnangge herahuk fug-o. Eke hinenggal wene ap inobam denggeluk fug-o. Ariroho suruk imbisalug hiniknisi hinisasi inune-at fanoroho holtuk wilil, suontep isaruk amuk-o,” ulug yig epag.

²⁰ Yig ituk apagma, eke at etnowen yig ituk wilil, “Yu-o Nowe, an udag doron heheg wene etno waruk wilil, nintul nantul ilitoho-at suruk ahi-o,”

²¹ ulug yig ituk apagma, At Yesus etno indi famen ahmu haruk apareg, ilanggen fikfag wenaharuk wilil yig epag, “Hat wene misig du-at waruk ahen fug hiyihi-o, wene ebe waruk ahen fuhon ari, hat yi angge di angge anggolo werehon epmano fam uang anggen onggo baloko it aphe inaharek elehon epmano sumbut isimin-o. Og isaruk healug, hat haharek boholmen anggolo-at og hiruhu-o. Ari halug, An ninim sil nuruk amuhuken ma-o,” ulug yig epag.

²² Ariroho yig epahon oke, at ap etno aharek yi angge di angge anggolo wilil, indi dag atuk apareg, olohore inim dag atuk wilil, sohorep isalug lebag.

²³ Laruk apagma, At Yesus etno olohore dahagsoho omini epmano yet isaruk apareg, yig isaruk wilil, “It inaharek yi angge di angge anggolo werehon epmano At Allah weregma kuk hai-o,” ulug yig isebag.

²⁴ Yig isaruk apagma, At omini epmano inakol haruk apareg, inindi dag atuk apagma, At Yesus etnowen yig isaruk wilil, “Nudaki, it inaharek anggolo werehon At Allah weregma keroho kuk-o?” ulug yig isaruk apareg,

²⁵ eke fobik yig isaruk wilil, “Wam unta etno ele doron fam kuk hai etno hag, it aphe inaharek yi angge di angge anggolo werehon epmano At Allah weregma kuk hai-o,” ulug yig isaruk apagma,

²⁶ it omini epmano inakolen fog suruk apareg, irit uruk wilil, “Ari halug, it sandeg hag inili og inabuhu-o?” ulug yig epag.

²⁷ Yig ituk apagma, At Yesus etnowen ilanggen wenag inaptuk apareg, yig isaruk wilil, “It apheyen suk ari hai-o. At Allahen-at inili og inabuk fano-o. At Allahen ariroho suhuk ahla burukon etno hai aruhu fug-o,” ulug yig isaruk apagma,

²⁸ at Petrus etnowen yig ituk wilil, “Nit yi angge di angge epmano obog-at sohorep isalug Hat ninim sil nuruk amuog ulug waharukuk-o,” ulug yig epag.

²⁹ Yig ituk apagma, At Yesus etnowen yig isaruk wilil, “Hiren An ninuk su amag ulug wene fano wene yig isil laruk amuog ulug, hinifaleg inim, eke hinowe not inim, eke hiniknisi hinisasi inim, eke hinudaki inim, eke hineyabuk inim, obog-at sohorep isahup halug, it ninen muko wilip hinabuog ulug suruk iseheg oke, Anden kidia-at hinifaleg inim, eke hinowe not inim, hinisasi inim, hinudaki inim,

³⁰ eke hineyabuk inim inubulukmu obog-at og hisaruk ahi ari, fobik hiniluk mondog welamon etno-at og hisahuk-o, ulug yig hisihi ari An demat yig hisihi-o,” ulug yig isaruk apareg,

³¹ eke fobik yig isaruk wilil, “It kidia bilin neken werehon ari fobik amuhup-o. Eke it nin fobik neken werehon epmano bilin amuhup-o,” ulug yig isebag.

At Yesusen An nowabuhupmu niluk aruhuk ulug fobik inim at yig isebahon wene 10:32-34

³² Eke fobik it epmano o Yerusalem luog ulug kwalema laruk wilil, At Yesus etno bilin larukmu, it omini inakolen suruk apagma, it aphe inombolim lebahon epmanowen inim-at ninakol-o, ulug il laruk apag. Ariroho il larukmu, At Yesusen it omini dua belas epmano inakeleg-at fuloko yanggap isaruk apareg, At ebe wabukon etno hurumbik yig isebag.

³³ Yig isaruk wilil, “Nit o Yerusalem-at luk-o. Epma laruk nisalug, An Allahen minduhup naharision etno it Allah unde inowesi epmano inim, it wene baleg unde epmano inimen ininggik sen nabuhup-o. Sen naptuk amuhupseg, nowabuog ulug noag deloko it ap Allah wene inapelehon epmano og isahup-o.

³⁴ Og isaruk amuhupmu, iren nahunda yatuk wilil, nenggali wareheg, inowasup nobam supsepfeheg, eke yikangge nowareheg suruk amuhupseg nowabuhup-o. Nowatuk amuhupmu, ninggik henahanam welaruhukseg, niluk atlug minaruhuk-o,” ulug yig isebag.

At Zebedeus udaki biren etnowen At Yesus ambeg kino wapahon wene 10:35-45

³⁵ Yig isaruk apagma, at Zebedeus udaki biren Yohanes, Yakobus inim At Yesus ambeg waharuk apareg, yig ituk wilil, “Ninowe Yesus wai, misig og nisamihinen ulug hambeg kino wahe-o,”

³⁶ ulug yig ituk apagma, At Yesusen yig isaruk wilil, “Hit An nambeg kino wahep ari, nongge og hisawag ulug kino wahep-o?” ulug yig isebag.

³⁷ Yig isaruk apagma, eke it etanowen yig ituk wilil, “Hat hebe fobik suon aruhunteg, nit ninebe at misig hinggik bikit fil eke at misig hinggik harebag fil ninebe suon neken minduhup nisahakunen ulug hambeg kino wahe-o,” ulug yig epag.

³⁸ Yig ituk apagma, At Yesus etnowen yig isaruk wilil, “Hit kino yig nituk ahep ari, hinapeleg-at wilil kino yig nerehep-o. Ariroho ehebon oke, An nahik honanggo nahukon etno hit nao fano behep ano? Eke An nobam umbukon etno, hit hinobam umbuk fano behep ano?”

³⁹ ulug yig isaruk apagma, eke it etanowen yig ituk wilil, “Yu-o, Hat hobam umbukon ari nit ninobam umbuk fano at-o,” ulug uruk apagma, eke At Yesus etnowen yig isaruk wilil, “An nahik honanggo nahukon etno, hit ninim-at nahuk-o. Eke An nobam umbukon ari, hit inim-at hinobam umbuhup oke,

⁴⁰ eke hit hinebe etano hag Anden ninggik femag femag minduhup hisahuk ari eleg-o. At Allahen ahla bebahon etno-at ariroho minduhup isahu-o,” ulug yig isebag.

⁴¹ Yig isaruk apagma, At Yesus omini sepuluh epmanowen inesanggo holtuk apareg, it Yakobus, Yohanes etano winimug yig isebag.

⁴² Winimug yig isaruk apagma, At Yesusen it obog wonggalep isaruk apareg, yig isaruk wilil, “It yi aphe di aphe kweanmon inowesi suon minduhuk werehon epmanowen inosi inune oag weregsoho-at seberoho imbisarukon oke,

⁴³ eke iren suruk ari hag, hit ariroho suk fug-o. Ap hiron misig suon welam hinindi halug, at ebe inanduanangge neken wilil suruk amag-o.

⁴⁴ Eke an ninuk-at suon welamag ulug uruk halug, it osi epmano obog-at inanggimbu neken welamag-o.

⁴⁵ An Allahen minduhup naharision etno it aphe nanggimbu neken wilil napma seberoho imbisiog ulug waharikik fug-o. An nebe etno it aphe inanggimbu wilil inilioko inake wararuhuken ulug waharikik-o,” ulug yig isebag.

At Bartimeus ilanggen buhon etno fano sebahon wene 10:46-52

⁴⁶ Wene etno yig isaruk apareg, At omini epmano inim, it aphe obog wonggalik wapahon epmano inim o Yerikho wapag. Waharuk apareg, o Yerikho epmanowen selema fil wilip atuk apagma, at Timeus amloho Bartimeus ilanggen bug wilil uang kino urukon etno kwalem suon fam enggatgatma epmano horieg weregma,

⁴⁷ it aphe ninen At Yesus Nazaret ap etno waha-o, ulug urukmu esanggo holtuk apareg, une suon uruk wilil, “Yesus wai, Hat Daud etamu wahen ari, an nabua niyimin-o,” ulug yig epag.

⁴⁸ Une suon-at yig ituk apagma, it aphe nin epmanowen, “Hat hune uk fug-o,” ulug winimug yig epag. Winimug yig ituk apagma, at etnowen uruk wilil, “Eleg-o, Hat Daud etamu du, nabua niyimin-o,” ulug une suon-at yig ituk apagma,

⁴⁹ At Yesus etno inim bok atuk apareg, uruk wilil, “Ebe wamagsoho wol iek-o,” ulug yig isaruk apagma, it aphe etnowen at Bartimeus etno yig ituk wilil, “Hat wol haptuk du, minamin-o. Minatuk apmihinteg hahientoho-at ma-o,” ulug wol haruk apagma,

⁵⁰ hetnogsoho minatuk apareg, asum selemon etno loloko umbulug At Yesus ambeg lebag.

⁵¹ At ambeg laruk apagma, At Yesusen yig ituk wilil, “Hat Anden keroho seko hombahukag ulug wahen-o?” ulug yig ituk apagma, eke at ap ilanggen buhon etnowen yig ituk wilil, “Nowe-o, an nilanggen buhon du fano amag ulug fenggen nabin-o,” ulug yig epag.

⁵² Yig ituk apagma, At Yesus etnowen yig ituk wilil, “Hat An fano nabukag ulug nobam ebetuk ahen etno fam fanorep hahaki ari, hibam lag-o,” ulug yig ituk apagma, ilanggen buhon etno arat fenggen atuk apareg, At Yesus inim kwalema lebag.