Lukas 9 - Allah Wene Hurumbik Keron

At Yesusen omini epmano inesanggo waroko lahap isebahon wene 9:1-6

¹ Eke fobik At Yesusen omini dua belas epmano wonggalik wamag ulug wol isaruk apareg, yig isaruk wilil, “Hiren it aphe setan inindimu kurukon lisoko wilip iseheg, eke it uk warehon fano inabeheg sukag ulug hinoag weregsoho hinombisahaki-o,” ulug yig isebag.

² Yig isaruk apareg, iren At Allah weregmen sukon wene etno yig iseheg, eke it uk warehon epmano fano inabeheg sukag ulug lahap isebag.

³ Lahap isiog ulug yig isaruk wilil, “Hinowanggundumuk inim, sum inim, orom inim, uang anggen inim, obog-at walug lao sohorep isalug aliek-o. Eke hinasum anggolo walug la fug-o, misig-at wantimuk-o.

⁴ Laruk atlihipmu, eke it aphe o misihen heahi war hinaptuk isalug, hinim welatlug, fobik o misig alu-o.

⁵ Laruk amuhupmu, eke it o misihen heahi war hinaptuk eleg isalug, it aphe dahon imbisawon etno iniluk amag ulug, o etno hiniog sabele horoho imbisaruk amuk-o,” ulug yig isebag.

⁶ Yig isaruk apagma, At omini epmano laruk apareg, o ahik ya da epmano ya keheg sil nuruk wilil, wene fano wene yig iseheg, eke it aphe uk warehon epmano fano inabeheg sil nuruk apag.

At Herodes etno indi seneni ebetuk apahon wene 9:7-9

⁷ Fano inabil lebareg fam, at Herodes, o Galilea inowe suon etno esanggo hol haruk apagma, it aphe ninen yig ituk wilil, “At Yohanes aphe ikma belap inaptukon etno iluk atisireg, sil nuruk-o,” ulug yig ituk apagma, indi seneni anggolo ebetuk apag.

⁸ Ebetuk heheg, it ninen, “Eleg-o, At ebe Elia etno-at waharisi hehe-o,” ulug uruk apagma, eke it ninen, “Eleg-o, At ebe it nabi ap Allah wene amuk yig isaruk apahon misig etno iluk atisi hehe-o,” ulug uruk apahon oke,

⁹ at Herodes etnowen uruk wilil, “Eleg-o, anden at Yohanes etno ungguluag baloko warepfirikikon oke, ap duen surukon yig nisaruk ari sa-o?” ulug ahla buruk apareg, At Yesus ilanggen bik hiog ulug ahla bebag.

At Yesusen aphe lima ribu epmano orom roti inim ikan inim sumburoko amiek-o ulug og isebahon wene 9:10-17

¹⁰ Eke fobik At Yesusen omini mondep isebahon epmano iniog suhuluk waharuk apareg, iren sil nuruk apahon epmano obog dindiloko At Yesus etno yig epag. Yig ituk apagma, At Yesusen og inaplug, inakeleg-at o misig inuk Betsaida etno lebag.

¹¹ Laruk apagma, it aphe obog epmanowen At Yesus waha-o, ulug urukmu inesanggo holtuk apareg, mutlug lebag. Mutlug laruk apagma, heahi war inaptuk apareg, At Allah weregmen sukon wene etno yig isaruk wilil, it uk warehon epmano hag fano inapag.

¹² Fano inaptuk apagma, mo dobog iog ulug suruk heheg, At omini epmano ambeg waharuk apareg, yig ituk wilil, “O limu aphe inibam eleg duma, it aphe obog waheson du orom inim inibam nohorukon inim heag sawag ulug o aphe inibam wereg ambeg epma lahap isuk-o,” ulug yig epag.

¹³ Yig ituk apagma, At Yesus etnowen yig isaruk wilil, “Eleg-o, hiren-at orom og isimiek-o,” ulug yig isaruk apagma, it omini epmanowen yig ituk wilil, “Nit hag orom roti fuaben angge inim, eke ikan biren-at seneg welahe-o, ari halug, it aphe obog wonggaleheson duma og isuog ulug orom onggo balik lawag ulug yig nisehen ano?” ulug yig epag.

¹⁴ Ariroho yig epag ari, it ap obog inebe lima ribu wereg isalug ariroho yig epag. Yig ituk apagma, At Yesusen omini epmano yig isaruk wilil, “Ari halug, it ap epma inosi inim dombog heheg, inebe lima puluh dambuksoho horiep iseheg suruk amuk-o,” ulug yig isaruk apagma,

¹⁵ it omini epmanowen ariroho-at suruk wilil, it aphe obog horiep isebag.

¹⁶ Horiep isaruk apagma, At Yesus etnowen orom roti fuaben angge etano inim, ikan biren etano inim seneg wilil, ilanggen boholma lahap haruk apareg, heahi watuk wilil, Allah wa ulug sembahyang ebag. Sembahyang uruk apareg, At omini epmanowen it aphe sumbut isawag ulug kut kut og isebag.

¹⁷ Og isaruk apagma, it aphe epmano obog-at inahumsoho nebag. Inahumsoho naruk apareg, dinik apahon epmano At ominien hele yaho nesanggowen angge fam yonggaroko embebag.

At Petrus etnowen Hat hebe Kristus at-o ulug yig epahon wene 9:18-20

¹⁸ Eke fobik At Yesus etno akelegma lebareg sembahyang urukmu, it omini epmano At ambeg waharuk apagma, Aren yig isaruk wilil, “It aphe obog epmanowen An nebe farim sa ulug uruk-o?” ulug yig isebag.

¹⁹ Yig isaruk apagma, eke it epmanowen yig ituk wilil, “It ninen, at Yohanes aphe ikma belap inaptukon etno waharuk ahareg, uruk-o. Eke it ninen, Eliaen uruk-o. Eke it ninen, it nabi ap amuk Allah wene yig isaruk apahon epmano misig iluk atisireg sil nuruk ulug uruk-o,” ulug yig epag.

²⁰ Yig ituk apagma, At etnowen yig isaruk wilil, “Eke hiren An sa ulug uruk ahep-o?” ulug yig isaruk apagma, at Petrus etnowen yig ituk wilil, “Hat hebe Kristus, At Allahen lahap nisa waharision etno-at hearuk ahe-o,” ulug yig epag.

At Yesus etnowen An nowabuhup-o ulug hurumbik yig isebahon wene 9:21-27

²¹ Yig ituk apagma, eke At etnowen yig isaruk wilil, “Hat ehen ari aphe yig isa fug-o,” ulug inesanggo watuk apareg,

²² yig isaruk wilil, “An Allahen minduhup naharision etno dahon neken nowabuhup-o. It hinowesi epmano inim, eke it Allah unde inowe suon etno inim, it wene baleg unde epmano inimen inambit nearuk amuhupseg, nowabuhupmu, ninggik henahanam welaruhukseg fam, niluksoho minduhup nahaku-o,” ulug yig isebag.

²³ Yig isaruk apareg, eke fobik it obog yig isaruk wilil, “Hit An ninim sil nuruk amuhuken ulug hinahla buruk ahep halug, yi angge di angge hinindi hunduhuk welahebon epmano sohorep isalug, hinahe salib etno nintul nantul hinomalo fam holalug, An ninim-at sil nuruk amuhuk-o.

²⁴ Eke hinebe hinili huluog ulug suhubon oke, waramuhup at-o. Eke An ninuk su amag ulug sil nuruk wilil, hinebe hinili holeheg eleg-at welamuhup halug, hinebe hinili holahup-o.

²⁵ Eke hit o ahik ya da yi angge di angge obog unde welamuhup etno fam fobik hili holalug eleg-at o dagma lao ari fano buruk ahep ano? Ari eleg-o.

²⁶ Eke hit An ninuk inim, An nawene etno inim yig isao hinenggalien sohorep isaruk amuhup halug, fobik An Allahen minduhup naharision etno An Nikni inim, it boholma malaikat epmano inim ininuk suon wereg etno hag ninuk suontep naharuk amuhupmu, Anden hinili wao sohorep hisahakuk-o,” ulug yig isaruk apareg, eke fobik yig isaruk wilil,

²⁷ “Hit aphe nin duma welahebon epmano waraheg eleg hiniluk wilil, At Allah weregmen suhuon etno hinilanggen hahup-o, ulug An demat yig hisihi-o,” ulug yig isebag.

At Yesus olohore akeleg neken seg apahon wene 9:28-36

²⁸ Yig isaruk apareg, eke fobik ininggik enggalimen angge welapareg, At Yesusen it Petrus, Yohanes, Yakobus etano og inaplug, inim sembahyang uog ulug bunumu misig lahabag.

²⁹ Lahabareg, sembahyang urukmu, At etno olohore ninon-at atuk wilil, asum inim obog olohore libil labal surukmu yet hao hai neken seg apag.

³⁰ Ariroho suruk wilil, it ap biren ininuk Musa, Elia etano hetnogsoho waharuk apareg, At Yesus inim wene balfag.

³¹ It biren etano boholmon inapinag suruk etno hag sil waharuk apareg, At Yesus fobik At Allahen ahla burukon etno ilitoho o Yerusalemen waramon etno yig epag.

³² Yig ituk apareg weregma, at Petrus, omini nin epmano inim nohoruk apareg, iniluk atlug, At Yesus etno it ap biren inim inapinag libil labal surukmu inilanggen isebag. Inilanggen isaruk apareg, it ap biren etano At Yesus sohorep isalug, luog ulug surukmu,

³³ at Petrus etnowen Yesus yig ituk wilil, “Ninowe-o, nit duma fano-at welahe-du, o henahan faluk-o, misig Hat hibam, misig at Musa ibam, misig at Elia ibam, o ebe eta-at faltul-o,” ulug yig epag. Ariroho yig epag ari, at Petrus etno wene ariroho ik ulug apeleg heheg, we yuhun-at yig epag.

³⁴ Awan yig ituk heheg, it etano hena misig ambik waharuk apareg, sebe inapag. Sebe inaptukmu, it omini epmano inakol hebag.

³⁵ Inakol haruk apagma, hena ahla epmanowen une misig yig isaruk wilil, “An Namloho heako umburuk seyahon ari-at etna, hit At une-at holtuk amiek-o,”

³⁶ ulug une etno ebareg fam, At Yesus akeleg-at weregma, inilanggen hebag. Inilanggen hebahon oke, it omini epmanowen aphe werlekon inune yig isao sohorep isebareg, eke inilanggenen hebahon epmano ap misig yig epag fug.

At Yesusen udag misig setan indimu kebahon etno fano sebahon wene 9:37-43a

³⁷ Eke fobik noholug bunumu etnowen ambik waharuk apagma, it aphe obog wonggalfahon epmanowen At Yesus inim salkal ebag.

³⁸ Salkal uruk apagma, it aphe wonggalfahon etno inahla epmano ap misig welapareg, une suon uruk wilil, “Ninowe yanggul nisarukon wai. An namloho misiharon etno hilanggen bik ha ma-o.

³⁹ Eke at etno setan indimu kurukmu, une suon uruk wilil nenek surukmu, elma wasup anggolo herog uruk-o. Eke at setanen ayeg libiltuk wilil, sohorep isaruk eleg-o.

⁴⁰ Eke Hat homini epmano inambeg setan du wilipfiek-o, ulug yig isihion oke, iren wilipfuk hai ahama imbisehesa-o,” ulug yig epag.

⁴¹ Yig ituk apagma, At Yesusen yig isaruk wilil, “Hit hinindi fikfag ebereheg eleg-at wilil, hinobabut dahon-at welahep du, An ninggik maren ninim welatlug nibam lahuk-o? Eke An hit ninim welam ari nambit-o. Eke An nebe ninggik maren ninim welatlug lahuk-o?” ulug yig isaruk apareg, at ap etno yig ituk wilil, “Hat hamloho ari walug nambeg ma-o,” ulug yig epag.

⁴² Yig ituk apagma, udag etno waharuk heheg, at setanen waroko kweanma yinggipfuruk apagma, nenek sebag. Nenek suruk apareg weregma, At Yesusen setan dahon etno winimug yig ituk apareg, udag etno fano sebag. Fano suruk apareg, At etno ikni og epag.

^43a Og ituk apagma, it aphe obohen wi At Allahen oag weregsoho sukfugangge suruk-o, ulug fog sebag.

At Yesusen An nowabuhupmu niluk aruhuk ulug fobik inim yig isebahon wene 9:43b-45

^43b At Yesusen sebahon etno it apheyen awan fog suruk heheg, At Yesusen At omini epmano yig isaruk wilil,

⁴⁴ “Hit Anden yig hisaminon etno hinapeleg am fug-o. An Allahen minduhup naharision it aphe ininggiken senoko og naplug laruk amuhup-o,”

⁴⁵ ulug yig isaruk apagma, it epmanowen uruk wilil, “Wene duroho yig nisehek du, keroho ulug yig nisehek-o?” ulug inahla bebag fug. Inahla beheg eleg weregma, Aren yig isebahon etno herako neken yig isarukmu inahla buruk eleg wilil, alem ebahon etno hinog wao inakolen sohorep isebag.

An suon hat suon ulug urukmu At Yesus etnowen inesanggo wapahon wene 9:46-48

⁴⁶ Eke fobik At Yesus omini epmanowen irit wene baltuk wilil, “An suon, hat suon,” ulug winimug aptuk apagma,

⁴⁷ At Yesusen it inahla bebahon epmano obog At iluk wilil, udag doron misig inggik senoko apma minduhupfuruk apareg,

⁴⁸ yig isaruk wilil, “It udag nin ariroho-at An ninuk baloko og inaptuk amuhupseg, heahi war inaptuk hisalug, An nebe-at og nabuhup-o. Eke An nebe og nabuhup halug ari, At lahap nabik waharision etno At wahup-o. Eke ap misig hinanggelegmen seberepataruk halug, fobik suon welaruhu-o,” ulug yig isebag.

It hinim healeg welahep fuhon epmano fanoroho-at hinim dambulig welamuk-o ulug yig isebahon wene 9:49-50

⁴⁹ Eke fobik at Yohanes etnowen yig ituk wilil, “Ninowe wai. Ap setan indimu kirision misig at ap misihen Hat hinuk fam lisoko wiliptuk ninilanggen hehe-o. Haruk ahereg, yig ituk wilil, Hat hebe nit ninomin neken eleg wilil, Haren ariroho suk hai-o, ulug winimug yig erehe-o,” ulug yig ituk apagma,

⁵⁰ eke At Yesusen Yohanes inim, it omini nin epmano inim yig isaruk wilil, “Hiren ariroho winimug yig isa fug-o. Eke it hinim healeg welahep fuhon epmano fanoroho-at hinim dambulig welamuk-o,” ulug yig isebag.

It o Samaria aphe o sili misihen At Yesus ninambit-o ulug ebahon wene 9:51-56

⁵¹ Eke fobik At Yesus boholma walug lahukon etno horog fanggog uruk apagma, indi ebetuk apareg, o Yerusalem kwalema liog ulug sebag.

⁵² Suruk apareg, it o haltuk amag ulug inayonggo embebahon epmano bilin lahap isaruk apagma, it epmano o Samaria epma misig obam haluog ulug lebag.

⁵³ Laruk apagma, it aphe epmanowen At Yesus o Yerusalem liog ulug surukon ari nit ninim nohuk ninambit-o, ulug ebag.

⁵⁴ Uruk apagma, it omini Yakobus Yohanes inim inesanggo holtuk apareg, At Yesus yig ituk wilil, “Ninowe-o, it aphe duma war inabukag ulug boholmen hondok belabik ma yig imuk ano?” ulug yig ituk apagma,

⁵⁵ At Yesus etno olohore ambolma dahagsoho yet isaruk apareg, winimug yig isebag.

⁵⁶ Yig isaruk apareg, it epmano o misig lebag.

It yuhun-at At Yesus ninim luk ulug yig ituk apagma yig isebahon wene 9:57-62

⁵⁷ It epmano kwalem luog ulug surukmu, ap misig waharuk apareg At Yesus yig ituk wilil, “Hat o ahik ya da sil nuruk aruhun halug, an ninim-at sil nuruk amuhuk-o,” ulug yig epag.

⁵⁸ Yig ituk apagma, At Yesusen yig ituk wilil, “Bak halug, inielma wereg-o. Eke sue boholma sil nurukon halug, inibam wereg-o. Eke An Allahen minduhup naharision etno kel siog ulug nunggul hopsoho ying am ambeg ari eleg-o,” ulug yig epag.

⁵⁹ Yig ituk apareg, eke fobik ap misig yig ituk wilil, “Hat ninim lulen ma-o,” ulug yig ituk apagma, at ap etnowen yig ituk wilil, “Nowe-o, an bilin lalug nikni warehon kweanma salepfinen yig nimin-o,” ulug yig ituk apagma,

⁶⁰ At Yesusen yig ituk wilil, “It waratukonen it warehon epmano kweanma salep isaruk amag ulug sohorep isin-o eke hat hag, At Allah weregmen sukon etno yig isil alu-o,” ulug yig epag.

⁶¹ Yig ituk apagma, eke at ap misihen yig ituk wilil, “Nowe-o, an Hat ninim lahuk oke, bilin an nomini nune fag inabiog ulug lamin-o,” ulug yig epag.

⁶² Yig ituk apagma, At Yesusen yig ituk wilil, “Ap misig yabuk arat warision oke, ilanggen ambolma dahagsoho yet harukon arien Allah yabuk suk hai-o,” ulug yig epag.