Lukas 23 - Allah Wene Hurumbik Keron

At Pilatus etnowen Hat Yesus it Yahudi ap Inowe suon ano ulug hinog webahon wene 23:1-5

¹ Eke fobik it obog minatuk apareg, At Yesus etno walug, Pilatus ambeg imbik lebag.

² Imbik laruk apareg, inune dahon epmano obam denggeltuk wilil uruk apag, “At ap duen Kaisar ahauang anggen etno og um fug-o, An nakeleg-at Hinowe suon Kristus welahi-o, ulug it aphe duma enggal neken yig isarukmu ebe senetukuk-o,” ulug yig ituk apagma, eke at Pilatus etnowen hinog waruk wilil, “It Yahudi ap Inowe suon etno Hat-at ano?”

³ ulug hinog waruk apagma, At Yesus etnowen yig ituk wilil, “Ari demat ehen-o,” ulug yig epag.

⁴ Yig ituk apagma, eke at Pilatus etnowen it ap Allah unde suon inim, eke it aphe obog wonggalfahon epmano inim yig isaruk wilil, “At ap du alem ari dag sirisimu angginon etno obam imbiminen ulug nahla bihi fug-o,” ulug yig isebahon oke,

⁵ iren dahagsoho inune suon uruk wilil, “Eleg-o, Aren yig isarukmu, aphe inindi kahal atlug fobik dahan fahan suhup-o. Eke At bilin o Galilea epma yig isil laruk atisireg, epmen eke fobik o Yudea epma yig isarisi-o. Yig isaruk atisireg, eke kidia duma yig nisa waharisi-o,” ulug yig epag.

At Yesus etno walug Herodes ambeg imbik lebahon wene 23:6-12

⁶ Yig ituk apagma, at Pilatus etno esanggo holtuk apareg, yig isaruk wilil, “Ap du ebe Galilea ap ano?” ulug yig isaruk apagma,

⁷ eke iren yig ituk wilil, “At Yesus etno inowe Herodes wereg ambeg epmen waharisi-o,” ulug esanggo holtuk apareg, o ari sambit at Herodes etno o Yerusalem weregma, ambeg lahapfebag.

⁸ Lahapfuruk apagma, eke at Herodes etno At Yesusen sebahon epmano nintul nantul esanggo holtuk apareg, ebe ilanggen hiog ulug suruk wilil, “An nil fam sukfugangge misig sukag-o ulug ahla buruk apareg, kidia ebe nilanggen hamin-o,” ulug ahien suruk apag.

⁹ Ariroho ahien suruk apareg, at Herodesen Yesus etno yig ituk wilil, dahagsepfeheg hinog webahon oke, At Yesusen etno une dot yig epag fug.

¹⁰ Ariroho weregma, it ap Allah unde inowesi inim, eke it wene unde epmano inim diogsoho welapahon oke, fobik At Yesus wereg ambeg horogsoho waharuk apareg, wene dahon obam denggelfag.

¹¹ Denggeltuk apagma, at Herodes, osi sehen senehon epmano inimen At Yesus ahunda yatuk apareg, inambilik butuk uruk apag. Uruk wilil, inenggal-at sum fanowon wantepfuruk apareg, suhuluk at Pilatus ambeg lahapfebag.

¹² Lahapfuruk apagma, it Pilatus Herodes inim bilin healeg welapahon oke, ari fam dambuk ebag.

At Yesus etno wabuog ulug wene balfahon wene 23:13-25

¹³ Eke fobik at Pilatus etnowen it ap Allah unde suon inim, eke it inowesi suon epmano inim, eke it aphe werlekon obog inim wonggal inaptuk apareg, yig isaruk wilil,

¹⁴ “At ap duen aphe inindi kahaltuk ulug senoko nambeg walug wahepma, anden hit hinil fam aren balihireg oke, Aren alem dag sirisi ulug obam denggelehebon etno eleg atuk hihi-o.

¹⁵ Eke at Herodesen ariroho-at alem eleg atuk hehekseg, suhuluk nit ninambeg lahabik wahareg fam, ap du wabukon alem eleg atuk ari,

¹⁶ ebe yikangge akeleg-at waroko sohorep isamin-o,” ulug yig isebag.

¹⁷ Yig isaruk apareg weregma, eke it Yahudi ap epmano tahun nintul nantul esoho inuk Paskah etno esetuk wilil, hele warehon misig hibil nisimin-o ulug at Pilatus etno yig ituk isalug hibil iseheg, eke fobik esoho etno esetuk wilil, misig hibil nisimin-o ulug uruk isalug, misig hibil iseheg suruk apag.

¹⁸ Ariroho surukmu, it aphe obog wonggalfahon epmanowen inune suon uruk wilil, “Ap du wariek-o. Eke at Barabas etno hag hele hibiloko umbuk ninindi-o,” ulug uruk apag.

¹⁹ Uruk apareg weregma, eke at Barabas ap watukon enggarahun etno bilin o Yerusalem wilil dahan fahan suruk apagma, hele waroko aphe dag surukon imbisaruk ambeg epmano kolapfebag.

²⁰ Kolapfebagma, epmano wereg heheg, eke at Pilatus etnowen Yesus hele hibiloko umbuk ulug ahla buruk apareg, it aphe wonggalfahon epmano fobik inim dahagsoho yig isebag.

²¹ Yig isebahon oke, it epmanowen inune suon onggo yig ituk wilil, “Eleg-o, At ebe e fam lenggaloko umbulug warepfin-o,” ulug yig ituk apagma,

²² eke at Pilatus etnowen fobik inim yig isaruk wilil, “Aren alem dahon misig nongge sirisimu wabukag ulug uruk ahep-o? At ebe wabukon oke, alem eleg hihireg fam, ebe yikangge akeleg-at warepfulug hele hibiloko imbisamin-o,” ulug yig isebahon oke,

²³ it aphe epmanowen At Yesus e fam lenggaloko umbulug warepfukag ulug inune suon uruk apagma,

²⁴ fobik at Pilatus etno, “Yu-o, hiren ariroho ehepseg fam wabukag at-o,” ulug ebag.

²⁵ Uruk apareg, at ap enggarahun dahan fahan suruk wilil ap wapareg fam hele waroko kolapfebahon etno iren ap du hele hibil nisimin-o, ulug uruk apagma, at Pilatusen hele hibil isaruk apareg, At Yesus etno it inakelehen seko umbukag ulug og isebag.

At Yesus etno e fam lenggaloko embebahon wene 23:26-43

²⁶ Og isaruk apagma, it epmanowen Yesus walug laruk apareg, at Simon ibam Kireneon etno eyabukmuen yuhun-at o Yerusalem waharuk apagma, inim salkal uruk apareg, ma ulug ebe sen hebag. Ebe sen haruk apareg, e salib etno omalo fam embebag. Umburuk apareg, At Yesus ombolim walug lawag ulug yig epag.

²⁷ Yig ituk apareg, it aphe anggolo inim lebag. Laruk wilil, it hweap ninen obok yatil lebag.

²⁸ Obok yatil larukmu, At Yesus etno olohore dahagsoho yet isaruk apareg, yig isaruk wilil, “Hit hweap Yerusalemon du wai. An nobok yatuk sohorep isalug, hinonggareg hinudaki inobok yatuk amiek-o.

²⁹ Eke ariroho inobok yatuk hisalug, fobik it apheyen uruk wilil, ‘It hweap inudaki elegma, ag naruk elehon ari fano-o,’ ulug uruk amuhup-o.

³⁰ Ariroho uhup ari sambit, it aphe ninen dom yig ituk wilil, ‘Haren nit sebel ninabik ma-o, eke bunu duen herag ninabin-o,’ ulug yig isaruk amuhup-o.

³¹ Eke An nebe e ilukon neken welahion etno ariroho dahon nobam umburuk oke, eke hit e buhon neken welahebon ari dahon epmano keroho hinobam umburuk amuhup-o,” ulug yig isebag.

³² Yig isaruk apareg weregma, it ap biren dag suruk apahon etano At Yesus inim war inabukag ulug og inaplug wapag.

³³ Waharuk apag, o misig inuk Ungguluagsili epmano waharuk apareg, At Yesus etno e fam lenggalepfulug paku warepfebag. Warepfuruk apareg, it ap biren dag suruk apahon etano at misig inggik bikit fil, at misig inggik harebag fil e fam lenggaloko imbisebag.

³⁴ Imbisaruk apagma, At Yesus etnowen uruk wilil, “Nikni-o, it ap An dag seko nombahakeson duma keroho suruk ahe ulug inindi ebereheg eleg yuhun-at suruk du, Haren inobam inapelegsoho hapma imbisin-o,” ulug ebag. Uruk apagma, it epmanowen At asum etno fuloko huluog ulug helep esag esag suruk apareg, fuloko holebag.

³⁵ Holaruk apagma, it aphe nin o epmano minduhuk wilil, inilanggen haruk iseheg, it Yahudi ap inowesi suon epmanowen At ahunda yatuk wilil, “Ap du aphe inili waruk atision oke, At ebe Allahen Kristus ulug heako imbirisi halug, onggarehen ili holawag-o,” ulug uruk apagma,

³⁶ eke it sehen unde werehon epmanowen ariroho-at ahunda yabuog ulug suruk wilil, At ebe e fam lenggaloko embebag ambeg epmano waharuk apareg, e anggen ambusu etno heg hebag.

³⁷ Heg haruk apareg, yig ituk wilil, “Hat hebe it Yahudi ap Inowe suon-at halug, honggarehen hili hulimin-o,” ulug yig epag.

³⁸ Yig ituk apareg weregma, At ungguluag anduhumu epmano holal misig balfag ari, ‘Ap du ebe it Yahudi ap Inowe suon at-o,’ ulug holal baleg etno embebag.

³⁹ Umburuk apagma, eke at ap dag sebahon misig inim e fam lenggaloko imbisebahon etnowen At Yesus enggali watuk wilil, “Hat hebe Kristus-at halug, henggareg hili holaruk apmihinteg, nit ninili wimin-o,” ulug yig ituk apagma,

⁴⁰ eke at dag sebahon misig e femag fil lenggaloko embebahon etnowen omin etno winimug yig ituk wilil, “Hat Allah hakol haruk ahen fug ano? Nit obog e fam lenggaloko ninombisahakeson oke,

⁴¹ nit biren hag dag surukuk etno fam onggo ulug e fam lenggaloko ninombisahakesa-o. Eke At ap du hag dag sirisi fuhon oke, e fam lenggaloko embehesa-o,” ulug yig ituk apareg,

⁴² eke At Yesus etno yig ituk wilil, “Nowe Yesus wai, Hat Inowe suon neken waharuk aruhunteg, an nebe hapeleg atlug sohorep nahuk fug-o,” ulug yig epag.

⁴³ Yig ituk apagma, eke At Yesusen yig ituk wilil, “O yoho hat ninim At Allah weregma kulen ulug demat yig hituk ahi-o,” ulug yig epag.

At Yesus etno warapahon wene 23:44-49

⁴⁴ Yig ituk apagma, o ilingge bul jam dua belas fam mo ilanggen eleg atuk apagma, o ahik ya da epmano obog-at hup apareg oke, eke jam tiga fam nin o witebag.

⁴⁵ O witaruk apagma, sum o Allah ibam undama baharik misig fam supnihon etno hiroho kahal apag.

⁴⁶ Kahal atuk apagma, At Yesus etno une suon uruk wilil, “Nikni-o, An nahut Haren wimin-o,” ulug uruk apareg, warapag.

⁴⁷ Waratukmu it ap sehen seneg werehon inowe suon etno obog-at ilanggen haruk apareg, At Allah inuk suontepfuruk wilil, “At ap du demat fanowon welaha-o,” ulug uruk apag.

⁴⁸ Uruk apagma, it aphe obog yiroho diroho surukmu ninilanggen hulen ulug wonggalfahon epmanowen inilanggen haruk apareg, inindi ininggiken kik hebag. Kik haruk wilil, suhuluk inibam lebag.

⁴⁹ Inibam laruk apagma, eke it At ebe iniluk welapahon epmano inim, eke it hweap At ebe o Galileaen waharukmu ombolim mutlug nuruk apahon epmano inim At Yesus etno watukmu inebe yatmen yetoho welapag.

At Yesus etno waratuk apagma o wikelma kolapfebahon wene 23:50-56

^50-51 At Yesus etno waratuk apagma, ap misig inuk Yusuf, ibam it Yahudi ap inibam o misig inuk Arimateaon welapag. At etno obabut fano mondog wilil, indi seberoho welapag. Ariroho wilil, At Allah weregmen sukon etno aso welapag. Eke at ebe wene baltukon inowe-at oke, it ominien wabuog ulug wene baltukmu, at amberaken inim wene balfag fug.

⁵² Inim ebag fureg wilil, at etno at Pilatus ambeg laruk apareg, yig ituk wilil, “At Yesus ebe wareg etno og nimin-o,” ulug yig irik lebag.

⁵³ Yig irik laruk apareg, ebe wareg etno walug ambik wapag. Walug ambik waharuk apareg, sum anggeon etno fam daloko yinggilipfebag.

⁵⁴ Yinggilipfuruk apareg, o wikelma aphe warehon imbisaruk eleg ambeg epmano, sono nit sembahyang uhuk ulug, hari Jumat fam imbik lebag.

⁵⁵ Imbik laruk apagma, it hweap bilin At Yesus inim o Galileaen wapahon etano at Yusuf inim laruk apareg, aren Yesus ebe o wikelma imbik larukmu inilanggen hebag.

⁵⁶ Haruk apareg, suhuluk inibam lebag. Laruk apareg, At Yesus obam umbuog ulug e anggen ambusu inim, eke e engga amben fanowon etno inim fikfag dug sebag. Dug suruk apareg, o hari Sabat fam wene duroho suruk amuk eke duroho suruk am fug ulug ebahon etno iniluk wilil, yabuk seheg eleg-at bok welapag.