Kolose 4 - Allah Wene Hurumbik Keron

¹ Eke hat ap misig suon wilil, hanggimbu heyabuk surukon etno yikangge war inabeheg, eke winimug yig iseheg suk fug-o. Eke hat hune fanoroho-at yig isahun-o. Eke an Nowe boholma werehon etnowen ilanggen nearuk-o, ulug hahla buruk amuk-o.

Hit duroho welamuk-o ulug atog fam yig isebahon wene 4:2-6

² Eke hit nintul nantul sembahyang uruk amuhup-o. Eke Ninikni Allah wa ulug sembahyang uruk amuhup-o.

³ Hit ariroho sembahyang uruk wilil, At Paulusen it aphe Allah wene fanoroho yig isaruk amag ulug hinindi ebetuk wilil, nake sembahyang uruk amiek-o.

⁴ Eke an At Kristusen wene ebahon etno yig isarukmu sen naptusareg, aphe hele waroko kolap inaptuk ambeg epmano kolap naharusama, At Kristus inuk etno selemen motoho yig isaruk amag ulug an nake sembahyang uruk wilil, Allah kino yig ituk amuk-o.

⁵ Eke it Allah wene awan waruk elehon epmano yig isaruk wilil, kidia yig isuk fano-o, ulug hinahla buhupseg, orog-at yig isaruk amuhup-o.

⁶ Eke hinambilik butuk eheg eleg-at it yi aphe di aphe wene yig isaruk wilil, hinune fanoroho yig isaruk amuhup-o.

At Paulusen holal atog umburuk wilil heahi war inapahon wene 4:7-18

⁷ Eke ninomin Tikhikus Allah yabuk eberegsoho ninim nintul nantul suruk aheon etnowen at Paulus duroho wereg ulug yig hisahu-o.

⁸ Eke hit hinindi dag atukon etno fano amag ulug wene etno it duroho wereg ulug yig hisahu ari, ariroho yig isahunen ulug anden lahapfuruk ahi-o.

⁹ Eke at ninomin Onesimus hit hinot etno inim-at lahapfuruk ahi-o. Ari halug, it obog duroho wereg-o ulug yig hisahup-o.

¹⁰ Eke at Aristarkhus ninim hele waroko kolap ninaptuson etnowen wahinaniog ulug heahi war hinaptuk-o. Eke at Barnabas omin Markus etno duroho heahi wabuhup ulug arat holal imbirikikon etno inim,

¹¹ eke at Yosua inuk misig Yustus etno inimen wahinaniog ulug heahi war hinaptuk-o. It inebe henahan etano Yahudi ap-at oke, Allah wene demat ulug eberoko warusareg, Allah yabuk ninim suruk wilil yalmag naptusa-o.

¹² Eke At Yesus Kristus anggimbu hinomin Epafras etnowen wahinaniog ulug heahi war hinaptuk-o.

¹³ Eke hit Allah wene hinoag weregsoho uruk wilil, At Allah une holeg welamuhuben ulug, aren hit hinake nintul nantul At Allah inuk fam sembahyang uruk-o.

¹⁴ Eke hit hineyabuk at aborali elegsoho suruk etno an niluk-o. Eke it Laodikia, Hierapolis ap epmano ineyabuk ariroho-at suruk ulug yig hisaruk ahi-o. Eke at Lukas, niren angge ap fano inaptukon etno inim, eke at Demas etno inimen wahinaniog ulug heahi war hinaptuk-o.

¹⁵ Eke nit ninomini o Laodikia werehon epmano wahinaniog ulug yig isimuk-o. Eke at hwe Nimfa etno inim, it Allah udaki at ibam ambeg waharukon epmano inim, wahinaniog ulug yig isimuk-o.

¹⁶ Eke an holal bal hisihion du wane suruk amuhupseg, it Laodikia apheyen wane sukag ulug og isa alu-o. Eke hit it Laodikia aphe inambeg holal imbirikikon ari wane suhuken ulug inambeg kino uhup-o.

¹⁷ Eke at Arkhipus etno, Allah yabuk suruk amag ulug yig hitision etno fanoroho-at suhun-o, ulug yig imuk-o.

¹⁸ Eke an Paulusen heahi war hinaptuk ahi-o, ulug holal ari an ninggiken-at balihi-o. Eke an hele wareg welahion etno hinapeleg am fug-o. Eke At Allahen hinabua hisawag ulug yig hisihi-o.