Kolose 1 - Allah Wene Hurumbik Keron

1:1-2

¹ Nomini, hit o Kolose welahebon du wai. An Paulusen holal du hinombisaharuk ahi-o. Eke At Allah ahla burukmu, an At Yesus Kristus awene yig isarukon-at welahi-o. Eke at nomin Timotius ninimen holal du bal hisaruk ahe-o.

² Eke hit Allah udakion epmano hinibam o Kolose wilil ninomini welahep halug, At Ninikni Allahen hinabua hisaruk wilil hinim welamag ulug yig hisehe-o.

At Paulusen wa ulug sembahyang ebahon wene 1:3-14

³ Eke niren hit hinake sembahyang uruk wilil, At Allah Ninowe Yesus Kristus Ikni etno-at nintul nantul wa ulug yig ituk ahe-o.

⁴ Ari, hit At Kristus Yesus obam ebetikibon etno inim, eke Allah udakion hinindi hunduhuk welahebon etno inim obog-at ninesanggo holtukuk-o.

⁵ Eke hit o amuken wene fano wene hinesanggo holtikipseg fam, boholmen fano ninabuhu-o, ulug hinindi ebetuk wilil, demat ulug uruk ahep-o.

⁶ Eke wene fano wene ari o ahik ya da ya laheg da laheg suruk halug, hit weregma-at waharisi-o. Waharukmu, At Allah ahien inobam umburuk halug, hit ariroho-at hinesanggo holtikipseg fam At Allah ahien hinobam umburuk-o.

⁷ At ninomin Epafras etnowen yig hisarukmu, eberoko warikip-o. Eke at Epafras etno niren yig itukmu, At Kristus eyabuk eberoko suruk etno fam,

⁸ Roh Kudus hinindimu kuruk atisimu, hinim hinindi hunduhuk welatikibon epmano yig nisarisi-o.

⁹ Ariroho yig nisarisimu holtukukseg fam, nintul nantul hit hinake sembahyang uruk ahe-o. Ariroho uruk ahe ari, At Allahen ariroho siuk ulug yig nisarukon etno hiniluk ulug sembahyang uruk ahe-o. Eke At Roh Kudus etnowen hinindi kahaloko yig hisaruk wilil, hiniluksoho yig hisawag ulug sembahyang uruk ahe-o.

¹⁰ Eke hiniluk wilil, At Allahen ariroho siuk ulug ebahon etno-at suruk amuhup-o. Eke at ahien hinobam umbuhu-o. Eke hiren yi seheg di seheg suruk wilil, anggen fanowon yihikup-o. Eke kidia At Allah ebe hiniluk welahep ari, fobik mondog hiniluk aruhu-o.

¹¹ Eke At Allah oag wereg halug, hit hinoag weregsoho welamuk-o. Eke it ninen hit seberep hisahuog ulug waharuk amuhupmu, hit hinahla bugsoho wilil, minduhuk welamuhup-o.

¹² Eke At Ninikni Allahen hit At udaki inim o seleg wereg ambeg epma hinombisaharisireg fam, hinahien haruk wilil, wa ulug yig ituk amuk-o.

¹³ Eke o hik oag weregsoho wereg ambeg epmanowen wilip nisahik wapareg, At Amloho wereg ambeg epmano ninili oko kolap ninaptisi-o.

¹⁴ At Amloho indi hunduhukon etno ninili wawag ulug og nisebareg fam, Aren nit dag suruk aheon epmano sohorep isalug ninapelegsoho apma seberoho imbisarisi-o.

At Kristus Allah Amloho wilil yabuk suruk apahon wene 1:15-23

¹⁵ At Allah ninilanggen haruk ahe fuhon ahut etno At Kristus-at wereg-o. Eke yi angge di angge obog wal hebahon epmano At Amloho misig aron etno apma-at wereg-o.

¹⁶ At Allah amloho inimen o kweanma boholma yi angge di angge obog wal haruk wilil, yi angge di angge haruk aheon epmano inim, eke haruk ahe fuhon epmano inim, yi angge di angge inahut inim, eke yi ap di ap suon epmano inim wal hebag-o. At Kristus etno inimen wal haruk wilil, eke yi angge di angge epmano At Kristus og iriog ulug wal hebag-o.

¹⁷ Yi angge di angge obog epmano awan wal haruk elegma, At etno akeleg-at welapag. Eke Aren oag werehon etno og isarukmu, yi angge di angge inobam dombog inoag weregsoho-at wereg-o.

¹⁸ Eke it At Kristus awene warukon epmano At ebe neken wereg-o. Eke inungguluag ari At Kristus wereg-o. Eke niniluk atukon etno inim alem At Kristus-at wereg-o. At Amloho manggia etno it aphe warehon wereg ambeg epmanowen minapareg, yi angge di angge obog alem at-at wereg-o.

¹⁹ Eke At Ikni Allah etno ahla buruk wilil, At Kristus an hahon-at wereg-o, ulug yig nisaruk-o.

²⁰ Ari halug, At Allahen yi angge di angge obog epmano nimin dambuluhuken-o, ulug ahla buruk apagma, At Allah Amloho e fam lenggaloko embebagma, warapag etno fam, it apheyen yi dag di dag surukon epmano onggo At Kristusen balfag-o. Eke At Kristusen ariroho sebag etno fam, At Allah yi angge di angge inim, eke yi aphe di aphe inim, eke kweanmon inim, boholmon inim dambulfag-o.

²¹ Ari hiren bilin yi dag di dag sukon hinahla buruk wilil, suruk atikipseg fam, huso neken At Allah hinim healeg welatikip-o. Ariroho welatikibon oke, eke kidia At Allah Amloho warapag etno fam, hinebe At Allah udaki atikip-o.

²² Hinebe At udaki atikipseg fam, hinindi dahon sohorep isalug, hinobabut motoho hinombisaharuk atisireg, at olohotma hinombisaharisi-o.

²³ Eke wene fano wene etno waruk wilil, yahuk korlag suruk eleg hisalug, fobik fano hinabuhuon etno og hisahu, ulug hurumbik etno yig hisarusa. Eke an Paulus wene fano wene etno anggimbu neken wilil, yig isil larikik-o. Eke it ninen o ahik ya da yig isil laruk-o.

At Paulusen hit hinindi yabuk suruk ahi-o ulug yig isebahon wene 1:24–2:5

²⁴ Eke an hit hinake neken dahon etno nobam umburukon oke, nahientoho welahi-o. Nahientoho wilil, At Kristus etno udaki inake bilin war ariog ulug indi dag apag etno hag, an atog ilitoho neken kidia nindi dag atuk ahi-o.

²⁵ Ari At Allahen an neyabuk og nepareg fam, Allah wene uruk amon etno sumbut hisaruk ahi-o.

²⁶ Eke hit hinake-at neyabuk og nepahon etno fam, Allah wene amuk heraho welapahon etno selegma bukaloko yig hisaruk ahi-o. Hit at udakion etno wene du yig hisaruk ahi-o.

²⁷ Eke wene amuk heraho welapahon etno yi aphe di aphe bukaloko yig isawag ulug suon, fanowon-at wereg-o. Eke wene fanowon yig nisarukon etno ebe du at-o, At Kristus hinindimu wereg halug, At ebe ilitoho Allah hinim suon-at welamuhup-o.

²⁸ Ari fam, At Kristus inuk etno aphe obog-at yig isaruk ahe-o. Eke At Kristus etnowen aphe obog fano inaptuk amag ulug inesanggo wareheg, eke wene yanggul iseheg suruk ahi-o.

²⁹ Eke an noag weregsoho welamag ulug At Kristusen oag werehon etno og nituk halug, hinindi yabuk etno an noag weregsoho-at suruk ahi-o.