Kisah Para Rasul 24 - Allah Wene Hurumbik Keron

It Yahudi aben at Paulus obam denggelfahon wene 24:1-9

¹ Eke fobik ininggik fuaben angge welatusareg, imam ap suon misig inuk Ananias etno inim, eke it Yahudi ap inowesi nin inim, eke at ap wene baltukon inuk Tertulus etno inim o Kaisarea waharusa. Waharuk atusareg, at Gubernur inuk Feliks etno il fam at Paulus obam denggeluog ulug surusa.

² Ariroho suruk atusareg wilil, at Tertulus etno wol harusama, waharuk atisireg, at Paulus obam denggeltuk wilil, “Hat Feliks ninowe suon-at welahen-o. Hat hindi enggaron hune etno fam weregma wene alem heako, tahun anggolo fano welatukuk-o. Ariroho fano weregma, nit ninibam etno fanoroho ninaso welatikinteg fam dag seheg eleg fano-at welatukuk-o.

³ Ariroho wilil, nintul nantul wa yig hituk atukuk etno hag, kidia ninowe wa ulug heahi war haptuk ahi.

⁴ Hat yi yabuk di yabuk anggolo suruk ahen ari fam, anden wene yaron yig hipmin fug-o. Wene ebe horohon-at hesanggo holukag ulug yig hipmin-o.

⁵ Eke at ap du narlog harlog dag-at sil nuruk hehe-o. At ebe it Nasrani ap inowe wilil, it Yahudi ap o ahik ya da epmano heal inaptuk-o.

⁶ Eke aren o Allah ibam seberepfiog ulug surukmu niren senetukuk-o. Niren senetukukseg, wene duroho suruk amuk eke duroho suruk am fug ulug ebahon etno fam at ebe aren baluog ulug weregma,

⁷ at Roma ap inowe inuk Lisias etno waharuk atisireg, winimug ulug nit ninanggelegmen lisoko walug larisi.

⁸ Lisoko walug laruk atisireg, at Lisias etnowen hat hil fam at Paulus obam denggelukag ulug yig nisarisi. Yig nisaruk atisimu, eke kidia niren obam denggeluog ulug waheon oke, niren yig himul beheon etno haren unema waruk apmihinmu, aren yig hirikonma, hiluk arikon-o,” ulug at ap wene baltukon inuk Tertulus etno yig ituk atisimu,

⁹ it Yahudi ap inim obog-at demat ehek ulug obam denggeltusa.

At Paulusen Feliks etno il fam wene at obam denggeltukon etno bukaloko yig epahon wene 24:10-23

¹⁰ At obam denggeltuk atusama, at Gubernur etnowen, “Hat Paulusen yig nisamihin-o,” ulug yig ituk atisimu, at Paulus etnowen yig ituk wilil, “Hat it aphe duma tahun anggolo inim wilil, inaren baltuk atikinon epmano hat hil fam wene nobam denggeleheson epmano bukaloko yig hipmin ari fano.

¹¹ Eke haren alem heahamihin etno hag, an o Yerusalemen sembahyang iog ulug larikikseg, ninggik dua belas hari welatikik.

¹² Epma wilil, o Allah ibam epma ap misig ninim winimug abeheg, eke it aphe wene uruk ambeg waharuson epmano inim, it o Yerusalem werehon epmano inim narlog harlog sukag ulug yig iseheg surukmu, it Yahudi aben inilanggen nearusa eleg-o.

¹³ Eke kidia nobam denggeleheson ari inim demat yig himuhup fug-o.

¹⁴ Eke kidia anden nahla bihion hat yig hirik-o. An kidia it ninetamuki Inikni Allah etno obam ebetuk wilil, At Yesus inuk fam Allah obam ebetuk ahion ari, iren dag ulug uruk-o. Ariroho urukon oke, eke an hag at Musaen ebahon etno inim, eke it nabien wene holal embebahon etno inim eberoko waruk ahi-o.

¹⁵ Eke At Allahen aphe fanowon inim, dahon inim iniluksoho minduhup isahuon it Yahudi aben demat ulug inindi ebetuk etno hag, anden ariroho-at ebetuk ahi-o.

¹⁶ Eke At Allah inim, it aphe inim obog-at inil fam nobabut fano-at welariog ulug suruk ahi-o.

¹⁷ Ariroho suruk wilil, eke o Yerusalem sohorep isalug, tahun anggolo o ahik ya da sil nuruk atikikseg, fobik it nomini uang dorat og isaruk wilil, Allah ake imbiog ulug suhuluk larikik.

¹⁸ Laruk atikikseg, nindi fano amag ulug sukon etno arat suruk atikikseg, o Allah ibamen Allah ake imbiog ulug surukmu, it obog inilanggen nearusa. Ariroho nearusa ari, aphe anggolo ninim wilil narlog harlog surukmu nearusa fug.

¹⁹ It Yahudi ap o Asiaon epmano-at ninim welatukuk oke, eke it epmano obog-at hat hambeg watlepseg, hil fam an nobam denggeltuson epmano yig hereheg, eke iren nobam denggeleheg selep ari fano.

²⁰ Fano oke, eke it ap dumen an it Yahudi ap inowesi inil fam dag sirikikon etno yig himukon-o.

²¹ Eke misig du it inil fam wilil irikikon etno ari anden, it aphe warehon etno At Allahen minduhup isahu ulug nindi ebetuk nealug naren baltuk ahep,” ulug yig isarikik. Ulug at Paulusen at Feliks etno yig itisi.

²² Yig ituk atisimu, at Feliks etno Yahudi wene fano ilukon oke, “Yoho arat ehe-o,” ulug irisi. Uruk atisireg, yig ituk wilil, “At Roma ap inowe inuk Lisias etno waruhumu, hawene fanoroho baluhuk,” ulug yig itisi.

²³ Yig ituk atisireg, at Paulus aso werehon etno yig ituk wilil, “At ebe hele warehon etno, selonggolongsoho welamag-o. Eke hiren winimug yig isa fug-o. At ominien yi angge di angge og irik wam ari fano at-o,” ulug at Paulus aso werehon etno yig itisi.

At Paulus etnowen it Feliks Drusila yig isebahon wene 24:24-27

²⁴ Eke fobik ininggik dorat welatusareg, at Feliks uhwe Drusila, Yahudi hweap etno walug waharisi. Waharuk atisireg, Paulus ayonggo imbirisireg, yig ituk wilil, “Haren At Yesus Kristus awene eberoko wawon etno yig nisamihin-o,” ulug yig ituk atisimu, inesanggo holtusa.

²⁵ Holtuk atusareg weregma, at Paulusen fano surukon etno inim, eke inindi aso welamon etno inim, eke fobik oag deloko imbisawon etno inim dindiloko yig isarukmu, at Feliks etno akol haruk atisireg yig ituk wilil, “Kidia arat ehenteg fam hibam lamihin-o. Fobik wene nesanggo holuk nindi atuk halug, hayonggo umbuhuk-o,”

²⁶ ulug yig ituk wilil at Paulus hele hibil nabukag ulug uang dot og nirikon ano? ulug ahla birisi. Ariroho ahla buruk wilil, at Feliks nintul nantul at Paulus etno ayonggo umbulug wene inim uruk atusa.

²⁷ Eke fobik it etano tahun biren welatusareg, at ap misig inuk Perkius Festus etno at Feliks ubulukmu Gubernur suon welamag ulug minduhupfuog ulug suruk iseheg, at Feliks etno it Yahudi ap inim dambuksoho welamag ulug at Paulus hele wareg-at sohorep isarisi.