Kisah Para Rasul 22 - Allah Wene Hurumbik Keron

¹ Bok atusama, at Paulusen it Yahudi inune fam yig isaruk wilil, “Niknisi, nowesi-o, hit obog hinil fam wene misig bukaloko yig hisaminen hinune bok amiek-o,” ulug yig isaruk atisimu,

² it epmano inahut laruk wilil, “Wi ap du nit Yahudi ninune fam-at yig nisaruk-o,” ulug mondog inele abitoho inune ilik eleg-at bok atuk atusama, at Paulusen yig isaruk wilil,

³ “An nebe o Tarsus Kilikia etnowen Yahudi ap-at endag atuk seyareg oke, o Yerusalem dumen at Gamaliel etnowen yanggul nituk wilil, it ninetamukien wene duroho suruk amuk eke duroho suruk am fug ulug ebahon etno fikfag yanggul nepag-o. Eke hit Allah yabuk suk ulug kidia hinahla buruk ahep etno hag, an Allah yabuk suk ulug ariroho-at nahla buruk seyag-o.

⁴ Eke it bilin Yesus wene webahon epmano mondog war inabiog ulug suruk wilil, ap inim hweap inim obog hele war inaplug o aphe dahon imbisaruk ambeg epma kolap isaruk seyag-o.

⁵ Ariroho yig hisihion ari, it imam ap suon inim, it Yahudi ap inowesi inimen demat uruk ulug iniluk-o. It Yahudi ap inowesi epmanowen holal baloko og nituk apagma, an nebe it ninomini Yahudi ap o Damsyik werehon epmano inambeg lalug, holal etno og isahuken ulug suruk wilil it aphe obog Yesus wene warukon epmano hele waroko og inaplug o Yerusalemen war inabukag ulug nahla buruk aheyareg, o Damsyik laruk seyag-o,” ulug at Paulusen yig isarisi.

At Paulusen yig isaruk wilil An Allahen nindi werehep naharisi-o ulug yig isebahon wene 22:6-16

⁶ At Paulusen yig isaruk wilil, “An o Damsyik waharuk wilil, o ilingge bul kwalema horog fanggog ik waharikikseg fam, boholmen o seleg misig hetnogsoho nobam belabik waharisimu,

⁷ kweanma ying atuk atikikseg weregma, boholmen une misig yig nituk wilil, ‘Saulus wai. Hat nongge farim An nowariog ulug waharuk ahen-o?’ ulug yig nitukmu nesanggo holtuk atikikseg,

⁸ eke anden yig ituk wilil, ‘Nowe, Hat sen yig nituk ahen-o?’ ulug yig ituk atikikmu, At une etnowen yig nituk wilil, ‘Hat An Yesus Nazaret ap etno nowariog ulug waharuk ahen arien yig hituk ahi-o,’ ulug yig nitisi.

⁹ Eke it ap ninim waharukukon epmano o seleg nobam belabik waharukmu, inilanggen haruson oke, eke une yig nitukmu, inesanggo holtusa fug.

¹⁰ Holeheg eleg weregma, eke anden yig ituk wilil, ‘Nowe-o, an keroho sik-o?’ ulug yig ituk atikikmu, At Nowe etnowen yig nituk wilil, ‘Hat minatlug o Damsyik wapmihinmu, haren sukon At Allahen ahla bebahon etno dindiloko yig himukon-o,’ ulug yig nituk atisimu,

¹¹ o seleg belabik waharision etno fam nilanggen bug atikikseg weregma, it ninim waharukukon epmanowen ninggik senoko og naplug o Damsyik nombahik waharusa.

^12-13 Nombahik waharusareg weregma, o Damsyik epma ap misig inuk Ananias Allah wene holtug bilin wene duroho suruk amuk eke duroho suruk am fug ulug ebahon etno esanggo holtukmu, it Yahudi ap obohen ap du fano ulug uruk atuson etno nambeg waharisireg, yig nituk wilil, ‘Nomin Saulus wai. Hat hilanggen fenggen amin-o,’ ulug yig nituk atisimu, nilanggen fenggen atuk atikikseg, at ebe yetsoho weregma,

¹⁴ at etnowen yig nituk wilil, ‘It ninetamuki Inikni Allahen ahla bebahon etno hat hiluk amag ulug fuloko hombaharisi-o. Hombaharisireg fam, At anggimbu obabut fanowon hilanggen haruk weregma, At une fam yig hitukmu holtikin-o.

¹⁵ Eke hilanggen haruk wilil, hesanggo holtikinon etno it yi aphe di aphe obog inesanggo holtuk amag ulug yig isil nuruk aruhun-o.

¹⁶ Ari halug, nit kidia keroho ulug bok welamul-o? Hat hebe kidia minatuk apmihinmu, ikma belap habikon-o. Ari haren At Yesus inuk waruk wilil, dag suruk atikinon epmano sohorep isalug, hindi dahon ho habukag ulug ikma belap habikon-o,’ ulug at Ananias etnowen yig nitisi,” ulug eke at Paulusen yig isarisi.

At Paulusen yig isaruk wilil an At Allahen aphe Allah wene inapelehon epmano yig isil nuruk amag ulug wol naptisi-o ulug yig isebahon wene 22:17-29

¹⁷ At Paulusen yig isaruk wilil, “Eke an o Yerusalem niog suhuluk waharikikseg, o Allah ibam epmen sembahyang uruk wilil weregma, At Allahen yig nitukmu ni og harikik.

¹⁸ At Allahen yig nituk wilil, ‘Haren it aphe duma An nawene etno yig isarukmu, inesanggo holtuk eleg ari, hat o Yerusalem sohorep isalug, lamihin-o,’ ulug yig nituk atisimu,

¹⁹ eke anden yig ituk wilil, ‘Nowe-o, eke anden it hat hawene warukon epmano o Allah wene uruk ambehen muko wilip isalug, hele waroko yikangge war inaptikik etno it obog iniluk-o.

²⁰ Eke at Stefanus hat hawene yig isarukon etno watukmu, nilanggen isaruk atikikseg, anden fano watuk ahep ulug it ap watukon epmano inasum aso welatikik-o,’ ulug anden At Allah yig ituk atikikmu,

²¹ eke Aren yig nituk wilil, ‘Hat hebe it aphe Allah wene waruk elehon epmano inambeg lahap hahakireg fam, kidia lag-o,’ ulug At Allahen yig nitukmu holtikik-o,” ulug at Paulusen yig isarisi.

²² Yig isaruk atisimu, it aphe epmano ari fam inesanggo holtuk atusareg, inune suon uruk wilil, “Ap du iluk welam hai-o. Kidia waroko imbiek-o,”

²³ ulug uruk atusareg, inasum loloko ininggikmu bindog bandog suruk wilil, kwean yinggi epmano hik ha laharuk atusa.

²⁴ Hik ha laharuk atusareg weregma, it Roma ap inowe sehen senehon etnowen osi yig isaruk wilil, “At Paulus ebe nit ninibam oag werehon etno fam imbik maniek-o. Imbik waharuk atlihipseg, it Yahudi ap nongge farim inune suon yig ituk ulug nit niniluk amagsoho hele etno fam yikangge wariek-o,” ulug yig isaruk atisimu,

²⁵ at ebe hele waroko umbulug yikangge wabuog ulug weregma, at Paulusen it inowe etno epma minduhuk wereg haruk atisireg yig ituk wilil, “An Roma ap hit hinomin-at wilil dag suruk atikik fuhon oke, yikangge nowabuk ari fano buruk ahen?” ulug yig ituk atisimu,

²⁶ at inowe misig etno eke at inowe suon anduhunmu werehon etno ambeg laruk atisireg yig ituk wilil, “Hat nongge suruk ahen-o? At ap wabuog ulug seheon etno at ebe Roma ap-at hehe-o,” ulug yig ituk atisimu,

²⁷ eke at inowe suon etno fobik at Paulus ambeg waharuk atisireg yig ituk wilil, “Hat hebe Roma ap-at ano, an yig nimin-o,” ulug yig ituk atisimu, at Paulusen, “Yu-o, an Roma ap at-o,” ulug yig itisi.

²⁸ Yig ituk atisimu, at inowe suon etnowen yig ituk wilil, “An uang anggolo fam onggo baltikikseg, Roma ap atikik-o,” ulug yig ituk atisimu, at Paulusen yig ituk wilil, “Eke an bilin Roma ap-at endag atuk seyag-o,” ulug yig itisi.

²⁹ Yig ituk atisimu, eke it ap at Paulus hinog wuog ulug suruson epmanowen at sohorep isalug, wilip atusa. Wilip atuk atusama, at inowe suon etnowen, “Wi, ap du Roma ap-at heheg bisuemanggen fam hele watikik-o,” ulug akol atisi.

At Paulusen it Yahudi ap inowesi suon epmano yig isebahon wene 22:30–23:11

³⁰ Eke fobik ininggik misig noholug, at Roma ap inowe suon etno ahla buruk wilil, “It Yahudi aben at Paulus obam inune dahon etno keroho ulug yig ituk-o?” ulug inunema wiog ulug suruk wilil, at Paulus hele warehon etno hibilipfuruk atisireg, it imam ap suon inim, it Yahudi ap inowesi suon inim obog-at wonggalik wamag-o, ulug yig isaruk atisireg, at Paulus inolohotma minduhupfirisi.