Kisah Para Rasul 21 - Allah Wene Hurumbik Keron

At Paulus etno o Yerusalem lebahon wene 21:1-16

¹ Heahi war inaptuk atukukseg, eke fobik sohorep isalug ikma so fam bikit o Kos etno larukuk. Laruk wilil, nininggik misig welatukukseg o Rodos etno larukuk. Laruk atukukseg, epmen o Patara larukuk.

² Laruk atukukseg, epmen so misig o Fenisia liog ulug surukmu haruk atukukseg, so etno fam kurukukseg, ninim larukuk.

³ Laruk wilil, o ik anggenma inuk Siprus etno nininggik harebag fil kolap hil hil o Siria larukuk. Laruk atukukseg, o Tirus ik ayegma epma so fam yi angge di angge werehon epmano wiliptukmu, nit so etno sohorep isalug,

⁴ it ninomini Allah wene warukon epmano heag inaptuk atukukseg, sembahyang misig ninim welatukuk. Ninim weregma, iren Roh Kudus fam hat Paulus o Yerusalem lahun fug-o ulug yig ituk atusama,

⁵ niren o duma arat welatukuk-o ulug sohorep isalug, so fam kuog ulug surukuk. Nit ariroho surukmu, it obog inuhwesi, inudaki inim inibam sohorep isalug, ik ayegma mondep nisahik larusama, epmen ninindibahal yungguksoho wilil, ninim sembahyang urukuk.

⁶ Sembahyang uruk atukukseg, heahi waroko it inibam suhuluk luog ulug suruk isalug, nit so fam kurukuk.

⁷ Kurukukseg laruk wilil, so etno fam o Tirusen o Ptolemais larukuk. Laruk atukukseg, it ninomini epma werehon ninim heahi waroko nininggik misig ninim welatukukseg, fobik sohorep isalug, o Kaisarea larukuk.

⁸ Laruk atukukseg, at Filipus Allah wene yig isaruk amag ulug it inebe sabiren angge o Yerusalemen bilin fuloko minduhup isaruson epmano misig ibam ninim welatukuk.

⁹ Eke at Filipus etno aholani inebe empat duhumon wilil iren Allah wene yig isaruk atusa.

¹⁰ Yig isaruk atusama, nit nininggik dorat ninim weregma, at ap misig Allah wene hurumbik yig isarukon inuk Agabus etno o Yerusalemen waharisi.

¹¹ Ninambeg waharuk atisireg, at Paulus aserlog holaruk atisireg, inggik iog homag sarisi. Homag saruk atisireg yig isaruk wilil, “An At Roh Kudusen yig nituk-o. Ap aserlog du unde etno anden niog homag sihi du ilitoho, fobik it Yahudi aben o Yerusalemen hele waroko it ap Allah wene inapelehon epmano og isahup-o,” ulug yig nisaruk atisimu,

¹² nit aphe obohen at Paulus etno abuen yig ituk wilil, “Hat o Yerusalem la fug-o,” ulug yig itukuk.

¹³ Yig ituk atukukmu, eke aren yig nisaruk wilil, “Hit nongge farim an nobok yatuk wilil, nindi dahap suruk ahep? An Yesus inuk fam weregma, it o Yerusalemen hele war nabuk fano at-o. Eke nebe nowabuk halug fano at-o,” ulug yig nisaruk atisireg,

¹⁴ o Yerusalem la fug yig itukukon etno ahlahirepfuruk atisimu, niren uruk wilil, “Ariroho ehekseg fam, At Allah indi ebetukon etno suhu at-o,” ulug urukuk.

¹⁵ Urukukseg, eke fobik nininggik dorat ninim welatukukseg, nit ninaharek dig dug holaruk atukukseg, o Yerusalem luog ulug surukuk.

¹⁶ Nit ariroho surukmu, it Kaisarea aphe Allah wene warukon ninen ninim lulen ulug suruk atusareg, og ninaplug ap inuk Manason ibam Sipruson Allah wene bilin warision etno ibam welamuk ulug mondep nisaharusa.

At Paulus etno Yakobus ha lebahon wene 21:17-26

¹⁷ Eke fobik o Yerusalem laruk atukukmu, it ninomini epmanowen inahien nisaruk wilil, heahi war ninaptusa.

¹⁸ Heahi war ninaptuk atusama, nohoruk atukukseg, at Paulusen og ninaplug at Yakobus etno it ap inaso werehon obog inim weregma inambeg bik isa larukuk.

¹⁹ Inambeg bik isa larukukmu, heahi war inaptuk atusama, At Allahen Paulus yig itukmu it Allah wene inapelehon inim wilil yabuk sirision epmano obog-at dindiloko yig isarisi.

²⁰ Yig isarukmu, it epmano inesanggo holtuk atusareg, it obohen At Allah inuk suontepfurusa. Suontepfuruk atusareg, at Paulus yig ituk wilil, “Ninomin-o, kidia nit dumen surukukon yig himul-o. It Yahudi ap epmano inebe beribu ribu Yesus inuk warusareg oke, it at Musaen wene duroho suruk amuk eke duroho suruk am fug ulug ebahon etno-at senetuk-o.

²¹ Ariroho surukmu, it ninen yig isaruk wilil, ‘At Paulus etnowen it Yahudi ap o ahik ya da Allah wene inapelegke yig isil nuruk-o. Ariroho yig isil nuruk wilil, hit Yahudi ap oke, at Musaen wene duroho suruk amuk eke duroho suruk am fug ulug ebahon etno sohorep isalug, hinudaki iniyunggul ambilik bal inabuk fug-o,’

²² ulug hat Paulusen yig isil nuruk atikinon epmano o Yerusalem waharikinmu, inesanggo holtusa. Halug ariroho holtusareg fam, keroho suk-o?

²³ Halug niren yig himulon etno-at simihin-o. Ap nit ninanggelegmon inebe empat etano inindi hosuog ulug suruk-o.

²⁴ Hat it hinim dambultihipseg, haren onggo umburukmu, hat it hinim hiniruk balsalihip-o. Balsaruk atlihipmu, it yi aphe di aphe obohen uruk wilil At Paulus Musaen wene duroho suruk amuk eke duroho suruk am fug ulug ebahon etno-at suruk heheg, nit ninenggal-at ninune dahon etno obam denggeltukuk-o, ulug uruk amuhup.

²⁵ It Yahudi ap ariroho uruk amuhubon oke, it bilin Allah wene inapeleg welatuson epmano hag, Allah wene waruk isalug, niren holal baloko og isarukuk. Eke holal etno fam wene umburuk wilil, ‘Wam kwanangge anggom ulug warehon etno na fug-o. Eke amep inim na fug-o. Eke wam amep wilibig eleg warehon na fug-o. Eke wanggik suk fug-o,’ ulug ariroho holal fam yig isarukuk,” ulug it ap inaso werehon etnowen at Paulus yig itusa.

²⁶ Yig ituk atusama, at Paulus ap inebe empat etano og inaplug larisireg, inim dambuksoho iniruk balsarusa. Balsaruk atusareg fobik at Paulus etno o Allah ibam kirisi. Kuruk atisireg, yig isaruk wilil, “O ari sul it imam aben hit hininuksoho Allah ake umburuk amuhupmu, hit hinindi dahon horoho imbisalug fano hinabuhup-o,” ulug yig isarisi.

At Paulus o Allah ibam etnowen senepahon wene 21:27-36

²⁷ Eke fobik ininggik sabiren angge welatusareg weregma, it ap Yahudi o Asia welatuson epmanowen at Paulus o Allah ibam weregma inilanggen haruk atusareg, ebe hog senetuk atusareg, it aphe wonggaltuson epmano yig isaruk wilil,

²⁸ “Hit Israel ap du maniek-o. Ap du o ahik ya da wene yig isil nuruk wilil, nit Israel ap inim, at Musaen wene duroho suruk amuk eke duroho suruk am fug ulug ebahon etno inim, eke o Allah ibam duma inim obog seberoho ninombisaharuk etno hag, eke kidia it ap Allah wene inapelehon epmano o Allah ibam og inabik wahareg, o du niren usa uruk aheon etno oke, hairepfehek-o,” ulug urusa.

²⁹ Ariroho uruson ari, at Paulusen at Trofimus, o Efesuson etno walug o werlekma larukon farim it epmano o Allah ibam imbik liog ulug suruk ano? ulug inahla buruk atusareg urusa.

³⁰ Ariroho uruk atusama, it apheyen o Yerusalem obog wonggaltuk atusareg, at Paulus ebe senoko o Allah ibam selema imbik larusa. Imbik laruk atusareg, o Allah ibam sok etno larepfurusa.

³¹ Larepfuruk atusareg, at Paulus etno wabuog ulug surukmu, o Yerusalem etnowen inahahe anggolo narlog harlog suruk atusama, it Roma ap inowe sehen senehon etno ayonggo umburusama,

³² esanggo holtuk atisireg, at omini sehen senehon nin inim og inaplug buahen it aphe wonggaltuson epmano inahla larusa. Laruk atusareg, it ap sehen senehon etnowen at Paulus ebe ili oko senetukmu, it aphe wonggaltuson epmano inilanggen isaruk atusareg, at Paulus yikangge wabuk sohorep isarusa.

³³ Sohorep isaruk atusama, it ap inowe sehen senehon etnowen at Paulus etno senoko hele bisuemanggen biren fam hele wabukag ulug yig isaruk atisareg, hinog uruk wilil, “Ap du inuk sa-o? Aren keroho sehek-o?” ulug hinog og inaptuk atisimu,

³⁴ at misihen nintoho eheg, eke at misihen nintoho eheg uruk atusama, aren ap du nongge sehek ulug apeleg welatisi. Apeleg welatisireg, osi yig isaruk wilil, “Halug ap du ebe senoko ninibam oag werehon etno fam imbiek-o,” ulug yig isarisi.

³⁵ Yig isaruk atisimu, at osi epmanowen Paulus ebe walug o yal helep fam belareg ambeg etno imbik waharuk atusama,

³⁶ it aphe inasineyen mug isaruk wilil, wabuog ulug amitmit urukmu, at ebe inomalo fam walug o etno imbik larusa.

At Paulusen yig isebahon wene 21:37–22:5

³⁷ At Paulus ebe o oag werehon etno fam imbik kuog ulug surukmu, at Paulusen it inowe etno yig ituk wilil, “An wene misig yig hirik-o,” ulug yig ituk atisimu, at it inowe sehen senehon etnowen yig ituk wilil, “Hat hune Yunani une uruk ahen hiyihi-o.

³⁸ Ari halug, hat hebe ap Mesiron misig etnowen it Roma ap inim wim abuhuken ulug bilin omini inebe empat ribu og inaplug o limu aphe eleg ambeg larision etno hat fug hiyihi-o,” ulug yig ituk atisimu,

³⁹ at Paulus etnowen yig ituk wilil, “Hat demat ehen-o. An o Tarsus o Kilikia etnowen nebe Yahudi ap-at endag atuk seyahon etno o Tarsus suon etno-at welahi-o. Ariroho wilil, anden aphe duma wene misig yig isaminen haren yig nimin-o,” ulug yig ituk atisimu,

⁴⁰ it inowe etnowen halug fano at-o, ulug yig ituk atisimu, at Paulus o yal helep fam belareg ambeg etno minatuk wilil, aphe inune eleg amag ulug yig isaruk atisimu, inune bok atusa.