Kisah Para Rasul 20 - Allah Wene Hurumbik Keron

At Paulus etno o Makedonia Akhaya wapahon wene 20:1-6

¹ Wilip isaruk atisimu, inibam larusa. Laruk atusama, at Paulusen it Allah wene warukon epmano wonggal inaptuk atisireg, hinindi oag weregsoho welamuk-o, ulug heahi warep isalug, o Makedonia waharisi.

² Waharuk atisireg, o epmano ya keheg wene yig isil nuruk wilil, it aphe obog inesanggo watil nuruk atisi. Inesanggo watil nuruk atisireg, fobik o Akhaya waharisi.

³ Waharuk atisireg, epma bikalem henahan welatisi. Bikalem henahan welatisireg, fobik o Siria liog ulug suruk wilil, it Yahudi aben nowabuog ulug suruk-o, ulug hurumbik iluk atuk atisireg, suhuluk o Makedonia wariog ulug suruk atisimu,

⁴ at Sopater Pirus amloho, Bereaon etno inim, at Aristarkhus eke Sekundus Tesalonikaon etno inim, at Gayus Derbe ap etno inim, eke at Timotius inim, eke it Tikhikus, Trofimus o Asia ap etano inim,

⁵ ninolohotma waharusareg, o Troas ninaso welatusa.

⁶ Ninaso weregma, nit roti su atuk elehon etno esoko narukukseg, o Filipien ikma so fam kurukukseg, nininggik fuaben angge o Troas waharukukseg, heahi waroko sembahyang misig ninim welatukuk.

At Paulus etno fobik o Troas wapahon wene 20:7-12

⁷ Eke fobik o sono hari Minggu ulug it ninomini ninim hari Sabtu fam hupmu orom nawon kubuog ulug wonggaltuk atukukseg, at Paulusen it aphe yig isaruk wilil, at ebe o sono liog ulug suruk atisireg fam, hubanggo homanoho ilimbul yig nisarisi.

⁸ Yig nisarukmu, o umbo wonggaltukuk ambeg etno minyak lampu anggolo fisaho weregma,

⁹ udag elege inuk Eutikhus etno o ele baleg ambeg horie irisi. Horie irisireg weregma, at Paulus etnowen wene yaron-at yig isarukmu, at udag Eutikhus etno nohoen kun kan suruk wilil, fobik mondog nohoruk atisireg, selema fil o baharik henahan sohantoho bule ambirisi. Amburuk atisimu, iren ebe leko hambogsoho waruk atusareg, bikharuk atusa, arat waratisimu, ebe waraha-o ulug inilanggen harusa.

¹⁰ Ebe wareg haruson oke, at Paulus etno yal belarehon fene amburuk atisireg, ut kunuk ulug udag warehon etno fikfag wenaharuk atisireg, yig isaruk wilil, “Hit hinindi hinakol ha fug-o. Ebe iluk wereg-o,” ulug yig isalug umbo laharisi.

¹¹ Laharuk atisireg, orom kuruko og isarukmu, narusa. Naruk atusama, at Paulus etnowen wene hupmu yig isarision etno atog ilikia o healtuk heheg yig isaruk atisireg larisi.

¹² Laruk atisimu, it epmanowen udag elege bule ambirision etno iluksoho inibam walug laruk atusareg, inindi inahien harusa.

It epmano o Troasen o Miletus wapahon wene 20:13-16

¹³ Eke fobik ikma so fam kuruk atukukseg, o Asos waharuk atukukmu, at Paulus etno so fam ninambeg kirisi. Eke at Paulusen yig nisaruk wilil, “Hit ikma so fam o Asos aliek-o. Eke an fobik kweanke niog fene hinambeg waruhuk-o,” ulug yig nisarisimu, nit so fam ikma kurukukseg,

¹⁴ o Asos epmen at Paulus ninambeg kukag ulug waharukukmu, at ebe ninim atlug o Metilene waharukuk.

¹⁵ Eke epmen kwalema nininggik misig noholug o Khios waharukuk. Epmen nininggik misig noholug o Samos waharukuk. Eke epmen kwalema nininggik misig noholug o Miletus waharukuk.

¹⁶ Eke epma at Paulusen o hari Pentakosta fam Yerusalem epma lao nindi oke, o Asia kwean fene lawim, kwalema nininggik anggolo nohoke ha nowen, ikma so fam bikit o Yerusalem lahuk-o ulug ahla buruk atisireg, o Miletus epmanowen o Yerusalem bikit luog ulug surukuk.

At Paulusen it Efesus ap inaso werehon epmano heahi war inaptuk apareg inesanggo wapahon wene 20:17-38

¹⁷ Eke fobik at Paulus o Miletus epmanowen it Efesus ap inaso werehon epmano nambeg wamag-o ulug inayonggo lahap isarisimu,

¹⁸ waharuk atusama yig isaruk wilil, “An bilin o Asia waharikikseg, hit ninim wilil yabuk suruk atikikon hiniluk-o.

¹⁹ An At Ninowe anggimbu etno nindi seberoho ioba yatuk wilil, yabuk etno suruk atikikon oke, it Yahudi aben nowabuog ulug surukmu, angginon etno nobam wereg heheg, yabuk sirikik-o.

²⁰ Eke o selegmen inim, hinibamen inim yalmag hisiog ulug Allah wene yanggul hisaruk wilil, wene misig yig hiseheg, misig herako ombateheg suruk atikik fug-o.

²¹ Eke it Yahudi ap inim, it bilin Allah wene inapeleg welatuson inim obog-at iren dag surukon epmano inobam inapelegsoho imbisalug At Allahen apma imbisahureg fam, At Ninowe Yesus inuk eberoko wawag, ulug obog-at yig hisarikik-o.

²² Eke kidia At Roh Kudus une yig nitukmu nesanggo holtuk wilil, o Yerusalem liog ulug suruk ahion du, iren ari angge nobam umbuhup ulug an napeleg-o.

²³ Eke an o ahik ya da sil nuruk neyeheg, At Roh Kudusen yig nituk wilil dahon hobam hombahalug, o it aphe dahon imbisaruk ambeg epma kolap hahakup ulug hurumbik yig nitisi-o.

²⁴ Ariroho yig nitisimu, an nebe niluk wilil, nili holao ulug yig hisaruk ahi fug-o. Eke At Ninikni Allahen ninabua nisarukon wene fano wene etno it aphe obog yig isawag ulug At Ninowe Yesusen an nebe etno minduhup naharisi-o. Ariroho yig nitisi famen an neyabuk og nitision etno-at suhuk ulug nahla buruk ahi-o.

²⁵ Eke At Allah weregmen sukon wene etno yig hisaruk wilil, hit obog ninim welatukuk-o. Eke fobik an nebe etno hit obohen hinilanggen neahup fug-o,” ulug yig isaruk atisireg, yig isaruk wilil, “Eke kidia alem misig yig hisamin-o.

²⁶ An bilin At Allahen surukon epmano obog-at dindiloko yig hisarikikon oke, hat misig fobik hili wahu fug etno, an nobabut fam suhu eleg-o.

²⁷ Hinonggareg hinakeleg hinobabut fam hinili wao sohorep hisahaku-o.

²⁸ Eke hinonggarehen hinindi aso welahep etno hag, At Roh Kudusen aphe inaso welamag ulug minduhup hisaharision etno aphe inaso fanoroho welamuk-o. At Allah Amloho waratisi etno fam At udaki heako imbisarision epmano inaso fanoroho welamuk-o.

²⁹ Eke fobik an sohorep hisahalug lahukmu, it aphe nin wam eli neken hinindi kahaluog ulug hinambeg wamuhupseg, it aphe Allah udakion epmano inindi kahalik wamuhup-o.

³⁰ Inindi kahalik wamuhupmu, it ap nin hiron-at waharuk amuhupseg, it Allah udaki epmano inindi kahalukag ulug inenggal wene yig hisa wamuhup-o.

³¹ Ariroho suruk isalug, an tahun henahan wilil nintul nantul ioba yatuk wilil, hit obog yanggul hisaruk atikikon epmano fanoroho hinindi ebetuk amuk-o.

³² Eke kidia anden At Allah hinabua hisarukon etnowen hinaso welamag ulug At apma hinombisaharuk ahi-o. Ariroho hinombisaharukmu, eke Aren hinindi oag werehep hisaharuk wilil, At udaki ahien isaruk etno hag, hit ariroho-at ahien hisahu-o.

³³ Eke anden ap misihen angge perak, emas, sum, onggo ulug holarikik fug-o.

³⁴ An ninggik fam yabuk surukmu, onggo og nituson etno fam an nomini ninim ninaharom onggo baltikik etno hit hiniluk-o.

³⁵ Ariroho ninggiken yabuk surukmu, it inaharek elehon epmano yi angge di angge og isaruk amuhuken ulug yig hisarikik-o. Eke ariroho yanggul hisaruk atikikseg, At Ninowe Yesusen ebahon etno nindimu ebetuk wilil, aphe inaharek holawon etno ninapma seberoho umbulug, yi angge di angge niren og isaruk wilil, ninahien haruk amuhuk-o, ulug At Yesusen ebahon epmano nindi ebetuk wilil, an nebe hit hinanggelegma welatikik-o,” ulug at Paulusen it Efesus ap inaso werehon epmano yig isarisi.

³⁶ Yig isaruk atisimu, it obog inindibahal yungguksoho wilil, sembahyang urusa.

³⁷ Sembahyang uruk atusareg, ioba yatuk wilil heahi watusa.

³⁸ Ari aren bilin an nebe neahup fug-o ulug yig isarisi etno fam inindi dag atuk atusareg, at etno so fam liog ulug surukmu mondepfurusa.