Kisah Para Rasul 16 - Allah Wene Hurumbik Keron

At Paulus etno it Titus Silas inim lebahon wene 16:1-5

¹ Nin eke at Paulus etno o Derbe inim, o Listra inim lebag. Laruk apareg weregma, ap Allah wene warukon misig inuk Titus etno isina Allah wene warukon ungguluag Yahudi hwe weregma, eke ikni ungguluag Yunani ap welapag.

² Ariroho weregma, it o Listra Ikonium inimen at Titus etno obabut fano hehe, ulug urukmu isaruk apareg,

³ at Paulus etnowen Titus walug liog ulug suruk heheg, it Yahudi ap obog epmanowen at Timotius ikni Yunani ap at-o ulug it Yahudi ap obog inilukmu, iyunggul ambilik balfag.

⁴ Baltuk apareg, o sili obog ya keheg suruk wilil, it mondep isebahon inim, eke it ap inaso werehon epmano inim o Yerusalemen komo yig isebahon epmano dindiloko yig isaruk apareg, ari ilitoho suk fano ulug inesanggo wapag.

⁵ Inesanggo watuk apareg weregma, it aphe Allah wene warukon epmano inindi oag wereg atuk wilil, inebe anggolo apag.

At Paulus o Troas etnowen i og hebahon wene 16:6-10

⁶ Eke fobik it etano o Frigia Galatia inim yig isil nurukmu, At Roh Kudusen yig isaruk wilil, “Hit o Asia wene yig isa fug-o,” ulug yig isaruk apagma,

⁷ it etano o Misia horog etno waharuk apareg, o Bitinia kuog ulug surukmu, At Yesus Roh Kudus etnowen, “O epma la fug-o,” ulug yig isaruk apagma,

⁸ o Misia etno laruk apareg, fobik o Troas wapag. O Troas etno waharuk apareg, hubanggo nohoruk wilil at Paulus i misig og hebag.

⁹ I og haruk apag, duroho yig itukmu hebag it Makedonia ap misig minapareg, yanggap suruk wilil, “Hat o Makedonia duma nit yalmag ninabik waruhun-o,” ulug yig itukmu i og hebag.

¹⁰ I og haruk apareg, ahla buruk wilil, ari hihi ari, At Allahen o Makedonia wene fano wene etno yig isawag ulug wol nabehek hihi-o, ulug nahla buruk atikikseg, nit etno o Makedonia luog ulug yi angge di angge dig dug holaruk atukukseg larukuk.

It etano o Filipi weregma at hwe Lidia etno Allah wene demat ulug eberoko webahon wene 16:11-15

¹¹ Nin eke ik so fam o Troas epmen sohorep isalug laruk atukukseg, o Samotrake waharukuk. Waharuk atukukseg, epma noholug, fobik o Neapolis waharukuk.

¹² Waharuk wilil, so etno sohorep isalug, o Filipi kwean Makedonia fam, it Roma ap unde wereg ambeg etno waharukuk.

¹³ Waharukukseg, nininggik dorat ninim wilil o sembahyang fam o sili etno sohorep isalug, it Yahudi ap ninim sembahyang uog ulug, o ik ayegma epmano amburukuk. Amburuk atukukseg, horie ulug weregma it hweap epma wonggaltuk atusama, ninim wene urukuk.

¹⁴ Ninim wene urukukon etno at misig inuk Lidia, ibam Tiatiraon etno at ebe sum huluon fanowon at ambeg onggo baltukon welatisi. Eke at hwe etno Allah wene warukon oke, At Allahen fikfag esanggo warepfirisimu, at Paulusen irision etno indimu eberoko warisi.

¹⁵ Waruk atisimu, at inim eke at ibam werehon aphe epmano inim ikma belap inaptusa. Ikma belap inaptuk atusama, at hwe etnowen yig nisaruk wilil, “Hit demat hwe du Yesus wene eberoko waruk ulug buruk ahep halug, hit an ninim nibam epma welamuhuken maniek,” ulug une oag weregsoho yig nisaruk atisimu, o epma ninim welatukuk.

It etano o Filipi hele waroko kolap isebahon wene 16:16-40

¹⁶ Eke o misihim sembahyang uruk ambeg luog ulug suruk atukukseg, at hole inanggimbu setan indimu kurukmu, it aphe werlekonen suhubon hurumbik yig isarukon epmano ninim salkal urukuk. At hole ninim salkal urukukon etno aren hurumbik yig isarukon etno fam ikni uang anggolo og ituk atisireg,

¹⁷ at hole etno fobik nit Paulus ninim ninombolim waharisireg, une suon uruk wilil, “It ap At Allah suon anggimbu werehon du hinilanggen isimiek-o. Iren fobik hinili wawag ulug wene etno yig hisaruk-o,”

¹⁸ ulug at hole etnowen nintul nantul uruk atisimu, at Paulus etno indimuen ambit heheg, olohore dahagsoho yet haruk atisireg, at setan etno yig ituk wilil, “Hat setan hole du ahla welahenon du At Yesus Kristus inuk fam wilip amin-o,” ulug yig ituk atisimu, at setan etno arat wilip atisi.

¹⁹ Wilip atuk atisimu, at hole etno iknisi epmanowen ariroho urusa, nit uang og nisarukon etno wilip aha du sen og nisahu-o, ulug inindi ebetuk atusareg,

²⁰ it Paulus Silas inim senoko imbisaruk atusareg, og inaplug it inowesi wene alem heaharuk ambeg epmano imbisa larusa. It inowesi Roma ap inambeg imbisa laruk atusareg, yig isaruk wilil, “Ap du inebe Yahudi ap-at oke, ninibam dumen dahan fahan suruk wilil,

²¹ niren suruk ahe fuhon epmano yanggul nisaruk-o. Eke nit Roma aphe halug, iren suk urukon etno suhuk fug-o,” ulug yig isaruk atusama,

²² it aphe wonggalehon epmanowen inusuog ulug surukmu, it inowesi suon epmanowen it Paulus Silas inasum libiloko imbisaruk atusareg, inebe lambisog war inabukag ulug yig isarusa.

²³ Lambisog waroko o it aphe dahon imbisaruk ambeg epma kolap isarusareg, sok elma yaha fanoroho welamag ulug yig isarusa.

²⁴ Yig isaruk atusama, at inaso werehon etno esanggo holtuk atisireg, inebe o baharik misig undama kolap isalug, iniog e angginon ele forehon etno fam hele keteroho waroko kolap isarisi.

²⁵ Kolap isarisimu, eke fobik hubanggo homanoho ilimbul it Paulus Silas etano sembahyang uruk wilil, Allah inuk fam di uruk atusama, it kolap isaruson epmanowen inesanggo holeg welatusa.

²⁶ Ariroho weregma, hetnogsoho o yugul suon misig suruk atisimu, o aphe dahon imbisaruk ambeg etno o andorli helep fam falehon etno satnog sirisi.

²⁷ Satnog suruk wilil, sok obog husig weregma, at inaso werehon etno iluk atlug ilanggen haruk atisireg, wi, aphe obog kolap isarukuk epmano wilip ahesa, ulug ahla buruk atisireg, ebe onggarehen watiog ulug enggarog lisuruk atisimu,

²⁸ at Paulusen une suon yig ituk wilil, “Hat honggarehen wata fug-o. Nit ninebe obog duma welahe-o,” ulug yig ituk atisimu,

²⁹ at inaso werehon etnowen yig isaruk wilil, “Eral walug maniek-o,” ulug kuruk atisireg, akolen inggik iog elekelek suruk wilil, it Paulus Silas inapma yungguksoho horie irisi.

³⁰ Horie uruk atisireg, fobik minatlug it etano ininggik senoko selema wilip isaruk atisireg, yig isaruk wilil, “Niknisi-o, an nili wawag ulug keroho sik-o?” ulug yig isaruk atisimu,

³¹ it etanowen yig ituk wilil, “Hat homini hinim hinindi Yesus obam ebetuk atlihipmu, hinili wikon-o,” ulug yig ituk atusareg,

³² at omini inim Yesus wene etno yig isaruk atusa.

³³ Yig isaruk atusama, o hubanggo homanoho ilimbul-at oke, at inaso werehon etnowen og inaplug ibam laruk atisireg, inusuruson ukmu epmano aren fanoroho imbisaruk atisimu, at omini inim obog ikma belap inaptusa.

³⁴ Ikma belap inaptuk atusama, it Paulus Silas inim at ibam welamag ulug og inaplug larisireg, inaharom menag isarisi. Ariroho inim wilil, “Nit Allah wene wehe-o,” ulug at omini inim inahientoho welatusa.

³⁵ Ariroho welatusareg, o witaruk atisimu, it Roma ap inowesi epmanowen lahap isaruk wilil, “Ap du wilip amag-o,” ulug it inaso werehon etno yig isaruk atusama,

³⁶ at etnowen Paulus yig ituk wilil, “Hat Silas hinim wilip amag ulug it ninowesi epmanowen yig nisa wahesa-o. Halug ariroho ehesareg fam hit wilip atlihipseg laruk wilil, kwalemma fanoroho-at alu-o,” ulug yig itisi.

³⁷ Ariroho yig itision oke, at Paulus etnowen it inowesi epmano yig isaruk wilil, “Eleg-o, nit Roma ap oke, nit ninobam dag sirikip ulug yig nisalug eleg-at selemen lambisog war ninaptuk atusareg, it ap dag surukon imbisaruk ambeg epmano kolap nisaharusa-o. Ariroho surusareg fam, eke kidia herako wilip nisahuog ulug ehesa ari ninambit-o. It Roma ap inowesi epmano it inebe-at ninambeg waharuk amukonteg, wa ulug wilip nisaharuk halug fano,” ulug at Paulusen it inaso werehon etno yig isarisimu, iren it Roma ap inowesi yig isarusa.

³⁸ Yig isaruk wilil, “Hit Roma ap du it Paulus Silas etano ap hiron-at oke, yuhun-at dahon etno inobam imbirikip-o,” ulug yig isaruk atusama, it Roma ap inowesi epmano inakol harusa.

³⁹ Inakol haruk wilil, it Paulus Silas inambeg laruk atusareg, yig isaruk wilil, “Hit war hinabuk sohorep isawim, nit dag surukukseg fam kidia fanoroho wilip amiek-o,” ulug yig isaruk atusama,

⁴⁰ it Paulus Silas etano aphe dahon imbisaruk ambehen wilip atuk atusareg, at Lidia ibam larusa. Larusareg, omini inim heahi war inaptuk wilil, inindi inahien haon etno yig isalug, o misig larusa.