Kisah Para Rasul 15 - Allah Wene Hurumbik Keron

It mondep isebahon epmano o Yerusalem wilil wene baltuk apahon wene 15:1-21

¹ Fobik it ap nin o Yerusalemen Antiokhia waharuk apareg, o epma it aphe Allah wene warukon epmano yig isaruk wilil, “At Musaen hinudaki iniyunggul ambilik baliuk ulug yig isebahon etno baltuk eleg hisalug, fobik hinili wahu fug-o,” ulug yig isaruk apagma,

² alem ari fam it aphe epmanowen Paulus Barnabas inim winimug aptuk apagma, it ninen uruk wilil, “It Paulus Barnabas etano o Antiokhia ap nin inim alem ari fam it mondep isebahon epmano hinog og inabukag ulug o Yerusalem lawag-o,” ulug it Allah wene warukon epmanowen lahap isaruk apagma,

³ it etano o Fenisia, Samaria epmano laruk wilil, “It Allah wene inapelehon epmano obog-at warusa-o,” ulug yig isaruk apagma, inomini obog inahien hebag.

⁴ Inahien haruk apagma, it etano o Yerusalem kuruk apareg, it Allah wene warukon inim, eke it mondep isebahon inim, it ap inaso werehon epmano inim dambuksoho wene uruk apag. Wene uruk wilil, At Allah inim sil nuruk wilil suruk apahon epmano dindiloko yig isaruk apag.

⁵ Yig isaruk apagma, it Farisi ap Yesus wene warukon nin minatuk apareg, yig isaruk wilil, “It Yahudi ap iniyunggul ambilik baltuk etno hag, it iniyunggul ambilik balukag-o, ulug at Musaen wene duroho suruk amuk eke duroho suruk am fug ulug ebahon etno inesanggo holtug sukag ulug yig isimuk-o,” ulug yig isebag.

⁶ Yig isaruk apagma, it mondep isebahon inim eke it ap inaso werehon epmano inim wene ari baluog ulug wonggalfag. Wonggaltuk apareg, inune anggolo uruk apagma,

⁷ at Petrus etno minatuk apareg yig isaruk wilil, “Nomini-o, it Allah wene waruk elehon epmano yig isarukmu inesanggo holtug eberoko wawag ulug At Allahen amuk hit hinanggelegmen minduhup nahabag etno hiniluk-o.

⁸ Eke At Allahen yi aphe di aphe inindi ebetukon epmano iluk wilil, bilin nit Roh Kudus og nisarisi etno hag, it Allah wene waruk elehon inindi fano inabukag ulug Roh Kudus og isarisi-o.

⁹ Eke it epmano nit ninim ilitoho welamag ulug ninombisaharisimu, it epmano At awene eberoko waruk atusama, iren dag suruson epmano inapelegsoho apma imbisarisi-o.

¹⁰ Ari halug, nit ninetamuki ninim komo yig nisebahon wene etno suruk atukuk fuhon oke, it nin komo yig nisebahon wene etno inobam imbisawag ulug uruk ahep du, keroho At Allah aren baltuk ahep-o?

¹¹ Eleg-o, nit At Yesus onggo eleg og nisebag etno fam ninili waruk-o. Eke it ari fam-at inili waruk-o,” ulug at Petrusen yig isebag.

¹² Yig isaruk apagma, it Barnabas Paulus etano At Allah inim sil nuruk wilil it Allah wene waruk eleg ambehen elalintoho sukfugangge sebahon epmano dindiloko yig isarukmu, inune eleg-at inesanggo holfag.

¹³ Inesanggo holtuk apagma, at Yakobus etno minatlug yig isaruk wilil, “Nomini-o, an nune holiek-o.

¹⁴ At Simon bilin ehek ari, At Allahen it Allah wene waruk elehon inanggelegmen At udaki ful inaptision epmano yig nisehek-o.

¹⁵ Eke bilin it nabien wene holal embebahon epmano fam ilitoho-at yig nisebahon etno ebe Alkitab fam weregma yig hisamin-o,

¹⁶ eke At Allahen, ‘Fobik suhuluk waruhukseg, at Daud ibam mialehon etno ubulukmu keron misig faluhuk-o.

¹⁷ Eke it yi aphe di aphe o ahik ya da obog Anden nudaki-o ulug inayonggo umburuk aruhukmu, iren Ninikni-o ulug nombolim mug naplug lahup-o,’

¹⁸ ulug At Allahen amuk hurumbik ebahon etno wereg-o,” ulug at Yakobusen yig isaruk apareg,

¹⁹ eke fobik misig yig isaruk wilil, “It aphe Allah wene inapelehon epmano waruk isalug, niren angginon etno inobam umbuk fug buruk ahi-o.

²⁰ Eke niren holal baloko og isaruk wilil, wene alem empat dia hiren suk fug ulug yig isuk; ari alem kwanangge anggom ulug waroko umburukon epmano na fug-o. Eke wanggik suk fug-o. Eke yi angge di angge amep eleg warehon na fug-o. Eke amep ebe inim na fug-o, ulug alem holal baloko umbulug og isa fano-o.

²¹ Eke at Musaen wene duroho suruk amuk eke duroho suruk am fug ulug ebahon etno o amuk it Yahudi ap wene uruk ambehen o sembahyang fam yig nisaruk wilil, awene etno o ahik ya da yig nisaruk wereg-o,” ulug at Yakobus etnowen yig isebag.

It mondep isebahon epmanowen holal baloko og isebahon wene 15:22-35

²² Yig isaruk apagma, it mondep isebahon epmano inim, eke it ap inaso werehon epmano inim, it Allah wene warukon obog inim wene baltuk apareg, nit obog ninanggelegmen it ap misig misig fuloko imbisalug, it Paulus Barnabas inim o Antiokhia epma lahap isul-o, ulug uruk apareg, at Yudas, inuk Barsabas inim eke at Silas inim it biren etano inobabut fano isaruk apareg, heag inapag. Heag inaptuk apareg, holal etno og isebag.

²³ Holal etno og isuog ulug wene holal umburuk wilil, “Hit ninomini o Antiokhia, Siria, Kilikia epma wilil, Allah wene hinapeleg welatikipseg warikibon epmano nit hinomini At Yesusen mondep nisahebahon inim, eke nit ap inaso werehon inimen heahi war hinaptuk ahe-o.

²⁴ Eke hit epmon ap misig misig iren uruson etno fam hinindi kahaltusa ulug ninesanggo holtukuk ari, niren yig isarukukmu urusa fug-o.

²⁵ Ari halug, alem ari fam nit ap obog wonggaltuk atukukseg, ap misig misig heako hinambeg lahap isa wahe-o.

²⁶ Eke it ninomini Barnabas Paulus At Ninowe Yesus Kristus eyabuk inakol elegsoho suruson etno inim-at lahap isa wahe ari,

²⁷ it Yudas Silas inimen inune fam yig hisawag ulug lahap isa wahe-o.

²⁸ Eke At Roh Kudus etno ninim ninahla bulug, wene alem empat anggin elehon eta hiren wawag ulug yig hisaruk ahe.

²⁹ Ariroho yig hisehereg fam, wam kwanangge anggom ulug waroko umburukon epmano na fug-o. Eke amep inim na fug-o. Wam amep eleg warehon na fug-o. Eke wanggik suk fug-o, ulug wene yig hiseheon du waruk wilil, hit hinebe fano-at welamag ulug yig hisehe-o.

³⁰ Ari arat nomini,” ulug holal baloko etno og isaruk apareg, it ap etano lahap isaruk apagma, o Antiokhia etno wapag. Waharuk apareg, it Allah wene warukon epmano obog wonggalepfulug holal baloko etno og isebag.

³¹ Og isaruk apagma, wane suruk wilil, wene holal embebahon etno haruk apareg, wene ari anggin elehon fanowon etno-at yig nisehesa-o, ulug inahien hebag.

³² Inahien haruk apagma, it Yudas Silas Allah wene yig isarukon etano inomini inim ininggik anggolo wilil, it epmano inoag wereg amag ulug, Allah wene yig isaruk apag.

³³ Yig isaruk apagma, kwalem fano-at lawag ulug it inomini epmanowen lahap isaruk apagma, iniog suhuluk inibam lebag.

³⁴ Laruk iseheg, at Silas etno duma welaruhuk ulug ahla buruk apareg, bok apag.

³⁵ Bok apareg weregma, it Paulus Barnabas inim o Antiokhia etno wilil, it nin inimen Allah wene etno yig iseheg, eke yi wene di wene obog-at yanggul iseheg suruk apag.

It Paulus Barnabas etano winimug aptuk apareg inakeleg sik apahon wene 15:36-41

³⁶ Eke fobik at Paulusen Barnabas etno yig ituk wilil, “Nit bilin o ahik ya da Allah wene yig isarukuk ambeg epmano it ninomini inebe keroho wereg ulug bik isa lahuk-o,” ulug yig ituk apagma,

³⁷ at Barnabas etnowen yig ituk wilil, “Nit at Yohanes Markus ninim lahuk-o,” ulug yig ituk apagma,

³⁸ at Paulus etnowen, “Eleg-o, at iog suhuluk liog ulug o Pamfilia epmen sohorep nisahalug akeleg-at larision etno ninim lahuk fug-o,” ulug yig ituk apagma,

³⁹ inim winimug aptuk apareg, inakeleg sik-at laruk wilil, at Barnabas etnowen Yohanes Markus walug ik so fam o Siprus etno lebag.

⁴⁰ Laruk apagma, eke at Paulus etnowen Silas walug liog ulug surukmu, it inomini epmanowen kwalem fano-at lawag ulug inake sembahyang uruk wilil, At Allah kino yig ituk apagma, lebag.

⁴¹ Laruk apareg, o Siria, Kilikia inim ya keheg sil laruk wilil, it Allah wene warukon epmano inindi oag wereg amag ulug yig isaruk apag.