Kisah Para Rasul 14 - Allah Wene Hurumbik Keron

It Paulus Barnabas etano o Ikonium wene yig isebahon wene 14:1-7

¹ It Paulus Barnabas etano o Ikonium wilil, it Yahudi Allah wene uruk ambeg epmano kuruk apareg, wene yig isaruk apagma, it Yahudi ap inim eke it Allah wene inapelehon inim anggolo-at eberoko waruk apag.

² Waruk apagma, eke it Yahudi ap nin wene du ninambit ulug ebahon epmanowen it Allah wene inapelehon epmano yig isaruk wilil, “Iren wene urukon wa fug-o,” ulug inindi kahaltuk apag.

³ Inindi kahaltuk apagma, it mondep isebahon epmano o epma ininggik anggolo inim wilil, At Yesus wene etno inakol elegsoho yig isebag. Yig isaruk iseheg, At Yesus etnowen iren urukon demat inahla bukag ulug inoag weregsoho imbisaruk apagma, elalintoho sukfugangge suruk apag.

⁴ Sukfugangge suruk apagma, it aphe epmano it nin minggiroko it Yahudi ap inune weheg, eke it nin minggiroko it mondep isebahon epmano inune weheg suruk apag.

⁵ Ariroho suruk apagma, it Allah wene inapelehon inim eke it Yahudi ap inim eke it inowesi suon epmano inimen wene baltuk wilil, it ap mondep isebahon du inenggali hawag ulug helep fam warep isuk-o, ulug wene baltuk apagma,

⁶ it mondep isebahon epmano inesanggo holtug, o Likaonia hite laruk apareg, epmanowen o Listra o Derbe o ahik ya da epmano ya keheg sil laruk wilil,

⁷ wene fano wene etno yig isil nuruk apag.

O Listra Derbe epmanowen wene yig isebahon wene 14:8-20

⁸ Eke it etano o Listra waharuk apagma, ap misig isina ahlen iog oag elehon endag apareg, kwalem lao haien bok wilil, at Paulusen ebahon etno esanggo holtuk apag.

⁹ Esanggo holtuk apareg, at etnowen niog fano nabukag ulug wene etno eberoko waruk apagma, at Paulus etnowen aren baltuk apareg, ilanggen fikfag wenaharuk apag.

¹⁰ Ilanggen fikfag wenaharuk apareg, une suon yig ituk wilil, “Hiog kik halug minamin-o,” ulug yig ituk apagma, ap etno minatuk apareg lebag.

¹¹ Lebareg weregma, it aphe obog at Paulusen sebahon etno inilanggen haruk apareg, it epmano inune o Likaonia ap inune fam anggolo sahaltuk wilil, “Kidia it kwanangge epmano aphe neken atuk ahesareg, ninambeg ambik wahesa-o,” ulug uruk apareg,

¹² at Barnabas inuk Zeus, eke at Paulus wene yig isaruk haruk apareg, inuk Hermes soal inapag.

¹³ Soal inaptuk apagma, at kwanangge Zeus etno aren angge usama horog lehet selema fil etno wereg heheg, at Zeus yi angge di angge og itukon ap uson etnowen it mondep isebahon etano og isuog ulug wam sapi inim, e anggen fanowon inim og inaplug wapag.

¹⁴ Og inaplug waharuk apagma, at ap uson etno it aphe obog inimen ininuksoho og isulen ulug inahla bebahon etno it Barnabas Paulus inesanggo holtug inasineyen inasum libiltuk apareg, aphe inanggelegma laruk wilil, “Hit hinahahe eleg amiek-o,” ulug inune suon yig isaruk wilil,

¹⁵ “Nit ninebe aphe-at oke, hit keroho ulug yi angge di angge uson epmano nininuksoho og nisuog ulug suruk ahep-o? Ariroho suruk ahebon oke, ebe uson etno hiren elegsoho umbukag ulug wene fano wene etno yig hisa wahe ari, At Allah iluk mondog werehon etnowen bohol inim, kwean inim, ik inim, eke yi angge di angge inim obog-at wal hebahon epmano inuk wahuben ulug yig hisa wahe-o.

¹⁶ Eke o amuk At Allahen yi aphe di aphe obog inobam dombog suruk amag ulug sohorep isebahon oke, inabuen yi angge di angge fanowon-at og isebag-o.

¹⁷ Eke it apheyen At Allah demat wereg-o ulug inindi At obam ebetuk amag ulug boholmen osit og iseheg, eke inindi inahien hawag ulug orom anggolo og iseheg suruk wereg-o. Eke nit ninanggom ulug waroko og nisa fug-o,” ulug it mondep isebahon etanowen ariroho yig isaruk apagma,

¹⁸ it aphe epmanowen wam waroko og isuog ulug sebahon oke, sohorep isebag.

¹⁹ Sohorep isaruk apagma, it Yahudi ap o Antiokhia, o Ikonium epmanowen waharuk apareg, o Listra etno wapag. Waharuk apareg, aphe obog epmano dahal inaptuk wilil, at Paulus ebe helep fam warepfuruk apareg, ebe mondog waraha ulug inahla buruk wilil, lehet selema fil imbik wilip apag.

²⁰ Imbik wilip atuk apagma, it Allah wene warukon epmano waharuk apareg, at ebe bulmu weregma, it selema wal kiko wereg iseheg, at ebe minatuk apareg, o etno suhuluk kebag. Kuruk apareg, noholug at Barnabas inim o Derbe etno wapag.

It Paulus Barnabas etano suhuluk o Antiokhia lebahon wene 14:21-28

²¹ It Paulus, Barnabas etano o Derbe wene fano wene etno yig isaruk apagma, it obohen wene etno eberoko webag. Waruk apagma, it etano iniog suhuluk o Listra laheg, Ikonium laheg suruk apareg, fobik o Antiokhia etno lebag.

²² Laruk apareg, it aphe o epma Allah wene warukon epmano inesanggo watuk wilil, “Hit At Allah weregma kuhuben yi wene di wene dahon epmano hinobam umburuk iseheg, At Yesusen wene ebahon epmano fanoroho eberoko waruk amuk-o,” ulug yanggul isaruk apareg,

²³ it obog aphe inaso welamag ulug ap inaso werehon nin heako minduhup isil lebag. Minduhup isaruk apareg, orom nenggeg eleg wilil, At Allah obam ebetuk isaruk apareg, At Allahen inaso welamag ulug sembahyang ebag.

²⁴ Sembahyang uruk apareg, o Pisidia etno kebag. Kuruk apareg, o Pamfilia etno lebag.

²⁵ Laruk apareg, eke fobik o Perga wene etno yig isaruk apareg, fobik o Atalia etno lebag.

²⁶ Laruk apareg, it etno ikma so fam o Antiokhia etno lebag. Ari, it bilin o epmen Allah wene yig isil lawag ulug inake sembahyang uruk apareg lahap isebag etno fam iniog suhuluk lebag.

²⁷ Laruk apareg, o Antiokhia epma it Allah wene warukon epmano obog-at wonggal inaptuk apareg, it etanowen At Allah inim wilil sil nuruk apahon epmano dindiloko yig isaruk apag. Yig isaruk wilil, “At Allahen it aphe At awene inapelehon epmano eberoko wawag ulug og isarisi-o,” ulug dindiloko yig isaruk apareg,

²⁸ ininggik anggolo it aphe Allah wene warukon epmano inim welapag.