Kisah Para Rasul 12 - Allah Wene Hurumbik Keron

It Allah wene warukon epmano war inabil lebahon wene 12:1-5

¹ Eke fobik at inowe Herodes etno it Allah wene warukon epmano war inabiog ulug lebag.

² Laruk apareg, at Yakobus Yohanes owe etno karog fam waroko embebag.

³ Waroko umburuk apagma, it Yahudi ap epmano inahien surukmu isaruk apareg, eke fobik it Yahudi ap epmanowen roti su atuk elehon etno narukmu at Petrus etno hele waroko embebag.

⁴ At Petrus etno hele waroko aphe dag surukon imbisaruk ambeg epmano kolapfuruk apareg, aso welamag ulug ap inebe enam belas epmano lehet walkiko minduhup isebag. Minduhup isaruk apareg, at Herodes etnowen o hari Paskah esebuhukon etno nalug at Petrus etno it Yahudi ap inil fam selegmen enggali wabuhuk ulug ahla bebag.

⁵ Ahla buruk apareg weregma, at Petrus etno o aphe dag surukon imbisaruk ambeg epmano wereg heheg, it Allah wene warukon epmanowen at ake Allah obam sembahyang uruk apag.

At Petrus etno o aphe dag surukon imbisaruk ambeg epmanowen wilipfebahon wene 12:6-19

⁶ Eke at Herodes etnowen o sono enggali wabuhuk ulug ahla buruk weregma, at Petrus etno hele bisuemanggen fam inggik iog dambuksoho hele waroko umburuk apareg, it ap aso welamon epmano femag femag wereg iseheg,

⁷ At Allah malaikat misig hetnogsoho o baharik at werehon etno fam waharuk apareg, o etno selegsepfebag. Selegsepfuruk apareg, at Petrus etno omalo seneg wilil, aplohoksoho ilukepfuruk apareg yig ituk wilil, “Hat dulum minamin-o,” ulug yig ituk apagma, hele etno abusag-at hibiloko ambebag.

⁸ Hibiloko amburuk apagma, at malaikat etnowen yig ituk wilil, “Haserlog fikfag iluhun waroko wansalug, hiog eset inim wansimin-o,” ulug yig ituk apagma wantebag. Wantaruk apagma, at malaikat etnowen yig ituk wilil, “Hasum selemon wantaruk apmihinteg, ninim lulen ma-o,” ulug yig ituk apagma,

⁹ at Petrus etno mutlug laruk apareg, ahla ebetuk wilil, “An ni og haruk ahi ano, demat malaikat mutlug laruk ahi ano?” ulug ahla buruk apareg,

¹⁰ it at aso werehon epmano nohoruk iseheg, at etno heal iseheg bikbog sok elma horogsoho lebareg weregma, sok etno abusag-at hut atuk apagma, at ebe walug selema wilip apag. Wilip atuk apareg, kwalema inim laruk wilil, at malaikat etno Petrus il fam hetnogsoho eleg apag.

¹¹ Eleg atuk apagma, at Petrusen ahla buruk wilil, “Wi, an ni neken wilik waharukmu hihion etno demat wilik wahi-o. Eke At Ninowe etnowen omalaikat misig belabik wahama, an nebe at Herodesen it Yahudi ap inil fam ninggik seneg wilil enggali wabuhuk irision etno oke, nili oko wilip nahik waha-o,” ulug ahla bebag.

¹² Ahla buruk apareg, hwe inuk Maria, at Yohanes Markus isina ibam etno liog ulug suruk heheg, at hwe etno ibam epmano aphe anggolo wonggaloko sembahyang ebag.

¹³ Sembahyang uruk wilil weregma, at Petrus etno waharuk apareg, sok kik haruk apagma, at hwe etno anggimbu inuk Rode etnowen sok husiog ulug lebareg,

¹⁴ at Petrus etno une yig itukmu esanggo holtuk apareg, sok etno hut halug eleg suhuluk it sembahyang uruk ambeg inambeg waharuk apareg, yig isaruk wilil, “At Petrus etno wahareg, sok elma wereg-o,” ulug yig isaruk apagma,

¹⁵ it epmanowen yig ituk wilil, “Hat nenek suruk wilil uruk ahen ano?” ulug yig ituk apagma, at anggimbu hole Rode etnowen, “Eleg-o, at ebe demat une uruk hihi-o,” ulug yig isaruk apagma, it epmanowen yig ituk wilil, “Ari halug, at ebe ahut hehen-o,” ulug yig epag.

¹⁶ Yig ituk apagma, at Petrus etnowen sok kik hebag. Kik haruk apagma, it epmanowen ahut haruk apareg, at olohore inilanggen bikharuk wilil, “Wi, du Petrus at-o,” ulug inakol hebag.

¹⁷ Inakol haruk apagma, at Petrus etno inggiken, “Hinune eleg amiek-o,” ulug yig isaruk apareg, eke fobik at ebe o aphe dag surukon wereg ambeg epmanowen Yesusen wilipfebahon etno dindiloko yig isaruk apag. Yig isaruk apareg, at Yakobus, omini nin inim yig isa aliek-o, ulug yig isaruk apareg sohorep isalug o misig lebag.

¹⁸ O epmano lebareg fam, o witaruk apagma, it at aso welapahon epmanowen ebe eleg haruk apareg, “At Petrus kema laha-o?” ulug heaharuk apagma,

¹⁹ at Herodes etnowen yig isaruk wilil, “Hit fanoroho heahiek-o,” ulug yig isebahon oke, heahabag fug. Heahalug eleg weregma, at Herodes etnowen it aso welapahon epmano inobam hinog waruk apareg, iren eleg uruk apagma, it epmano war inabukag ulug at omini nin yig isebag. Yig isaruk apareg, at Herodes etno o Yudea sohorep isalug, o Kaisarea etno wapareg welapag.

At Herodes etno warapahon wene 12:20-25

²⁰ Eke fobik at Herodes etno it Tirus Sidon aphe inim healeg mondog weregma, it epmano wonggaltuk apareg, at Herodes ambeg luog ulug suruk apag. Ariroho suruk apareg, at Blastus Herodes ibam aso werehon etno inim dambultuk apareg, Herodes ambeg lebag. Laruk apareg, yig ituk wilil, “Hat hibamen nintul nantul ninaharom og nisa waharuk isalug, hat ninim healeg welahe ari sohorep isalug, ninim dambuksoho welamuk-o,” ulug yig epag.

²¹ Yig ituk apagma, o misihim at Herodes etno asum fanowon etno wantaruk apareg, ahe belareg suon etno fam horieg wilil, it aphe obog wonggalfahon epmano wene yig isaruk apag.

²² Yig isaruk apareg weregma, it aphe epmanowen, “Wi, aben uruk hag yig nisaruk eleg wilil, at allahen uruk hag yig nisaruk-o,” ulug inune suon-at yig epag.

²³ Yig ituk apagma, at Herodes Allah inuk suontepfuruk elegma, Allah malaikat misig hetnogsoho inambeg waharuk apareg, at Herodes etno uk obam imbiog ulug mumet haruk apagma, fobik at Herodes etno kolanggenen naruk heheg warapag.

²⁴ At etno waratuk apagma, Allah wene etno o ahik ya da obog-at su apag.

²⁵ Eke fobik it Barnabas, Saulus etanowen uang walug lebahon epmano it aphe epmano og isaruk apareg, at Yohanes Markus etno walug o Yerusalemen iniog suhuluk wapag.