Kisah Para Rasul 10 - Allah Wene Hurumbik Keron

At Petrusen Kornelius osi inim yig isebahon wene 10:1-33

¹ Eke o Kaisarea etno ap misig inuk Kornelius welapag. At etno it Italiaon Roma ap sehen senehon etno inebe seratus inowe welapag. Epma inowe wilil, ap etno Allah akol welapag.

² Ariroho wilil, at inim werehon epmano inim, Allah inuk suontepfeheg, it Yahudi ap inaharek elehon yi angge di angge og iseheg nintul nantul At Allah obam sembahyang eheg suruk apag.

³ Eke misihim hupmu jam tiga fam noho fulfal neken i og haruk wilil, At Allah malaikat misig at ambeg belabik waharukmu, ilanggen hebag.

⁴ Ilanggen haruk apareg, akoltoho weregma, at malaikat etnowen yig ituk wilil, “Kornelius wai,” ulug yig ituk apagma, aren, “Hat nongge yig niriog ulug wahen-o?” ulug yig ituk apagma, at malaikat etnowen, “Haren sembahyang eheg, aphe inabuen yi angge di angge og iseheg surukmu, At Allahen habua hearisi-o.

⁵ Eke ari halug, haren at Simon Petrus etno ayonggo lawag ulug ap biren henahan lahap isimin.

⁶ Eke at Petrus etno at Simon wam ahap denetukon etno ibam horog ik ayegma epma inim wereg-o,” ulug yig ituk apareg,

⁷ at malaikat etno laharuk apagma, at Kornelius etnowen it uma yabuk surukon biren inim, at anggimbu ap sehen senehon Allah wene warukon misig inim wol inaptuk apareg, waharuk apagma,

⁸ i og hebahon etno yig isaruk wilil, o Yope etno lahap isebag.

⁹ Lahap isaruk apagma, o sono hag kwalema laruk wilil, o Yope horog etno lebag. Laruk apareg, it etano kwalema weregma, at Petrus etno ilingge sembahyang iog ulug o isin fam lahabag.

¹⁰ Laharuk apareg, orom obok harukmu, esag ituk iseheg, nohorukmu,

¹¹ bohol healegke etnowen sum misig femag femag fikfag hele empat liloko belap irik waharukmu i og hebag.

¹² Haruk apareg, eke sum belap irik wapahon etno fam yi bak di bak, yi walo di walo, yi sue di sue obog-at fanggireg weregma, ilanggen hebag.

¹³ Haruk apareg weregma, eke fobik une misig yig ituk wilil, “Petrus wai. Minatlug misig waroko amin-o,” ulug yig ituk apagma,

¹⁴ at Petrus etnowen yig ituk wilil, “Eleg-o, Nowe, yi angge di angge obog uson ulug embebahon epmano an naruk ahi fug-o,” ulug yig ituk apagma,

¹⁵ eke fobik une misig yig ituk wilil, “At Allahen yalep ehekseg fam, haren uson ulug imbisa fug-o,” ulug yig epag.

¹⁶ Yig epahon etno dahagsoho inggik henahanam yig ituk apareg, sum etno suhuluk lisoko walug laharukmu ilanggen hebag.

¹⁷ Ilanggen haruk apareg, at Petrus etnowen, “Ebe hihion oke, keroho yig nerehek-o?” ulug ebereheg eleg apelegsoho weregma,

¹⁸ it ap at Korneliusen lahap isebahon etanowen, “At Simon ibam kema-o?” ulug hinog waruk apareg, olma wapag. Waharuk apareg, yig ituk wilil, “Ap inuk Simon Petrus etna o duma hinim welahep ano?” ulug yig ituk apareg weregma,

¹⁹ at Petrus etno an ebe belabik waharukmu hihi etno keroho yig nerehek, ulug indi ebetukmu, At Roh Kudus etnowen yig ituk wilil, “Kidia it ap henahan etno hat heag habil wahesa-o.

²⁰ Heag habil wahesa ari Anden-at lahap isa waharikikseg fam hat hebe minatlug ambimihinteg, hinim lalihip-o,” ulug yig epag.

²¹ Yig ituk apagma, at Petrus etno minatlug amburuk apareg, it ap etano yig isaruk wilil, “Hit an heag nabil wahep halug, nebe du welahi-o. Eke hit hinebe keroho ulug wahep-o?” ulug yig isaruk apagma, it etanowen yig ituk wilil,

²² “At ninowe Kornelius lahap nisa waharisimu wahe-o. Eke at Kornelius ebe etno fano wilil, At Allah inuk suontepfurukmu, it Yahudi ap epmanowen ninomin ulug fog suruk-o. Eke at Kornelius etno Allah malaikat misihen yig ituk wilil, at Petrusen wene yig hiriog ulug hibam wamagsoho ayonggo lawag-o,” ulug Kornelius yig epahon etno At Roh Kudusen fobik Petrus yig epag.

²³ Yig ituk apagma, at Petrusen it ap yonggo lebahon etano ninim nohul-o ulug yig isaruk apareg, at ibam etno inim nohobag. Nohoruk apareg, ilikia it Yope ap nin inim, eke it yonggo lebahon etano inim lebag.

²⁴ Laruk apareg, kwalema noholug misihim o Kaisarea etno wapag. Waharuk apagma, at Kornelius etno omini inimen inaso welapag.

²⁵ Inaso weregma, at Petrus etno ibam kiog ulug surukmu, at Kornelius etnowen ut kunuksoho indibahal fam at Petrus ambeg horogsoho wilil heahi wapag.

²⁶ Ariroho heahi watuk apagma, at Petrus etnowen inggik senoko minduhupfuruk apareg yig ituk wilil, “An ap atma, hat hebe minamin-o,” ulug awan yig ituk wilil, at Kornelius inim ibam etno kebag.

²⁷ Kuruk apareg, aphe anggolo aso weregma, isaruk apareg,

²⁸ yig isaruk wilil, “Nit Yahudi ap Allah wene waruk aheon epmano it aphe Allah wene waruk elehon inambeg lao hai oke, Allahen yi aphe di aphe inambeg lao ari usa eleg-o, ulug yig nitisi-o.

²⁹ Ariroho yig nitisireg fam, hiren wol naptikipmu, nambit ulug eleg-at wahi-o. Wahireg fam, hiren ari angge farim wol haptukuk ulug yig nimiek-o,” ulug yig isebag.

³⁰ Yig isaruk apagma, at Kornelius etnowen yig ituk wilil, “An nibamen o uwa etno hupmu jam tiga fam sembahyang uruk atikikseg weregma, ap misig asum huluon yihikon etno nolohotma binagsoho waharisireg,

³¹ yig nituk wilil, ‘Kornelius wai, hat sembahyang irikinon etno At Allahen esanggo holtisireg, haren inabuap sirikinon epmano iluk atisi-o.

³² Ariroho iluk atisireg fam, haren ap misig inuk Simon Petrus o Yope ap Simon wam ahap denetukon ibam ik ayegma inim wereg epmano wamag ulug yonggo lahap isin-o,’ ulug yig nitisimu,

³³ hat hebe wamag ulug it etna hambeg yonggo lahap isarikik-o. Lahap isarikikmu, nomin, hat nea wahen ari fano. Eke kidia At Ninowe Yesus etnowen duroho yig isimuk ulug yig hitukmu, haren yig nisamihinon etno ninesanggo holtulen ulug At Allah il fam nit obog wonggaloko welahe-o,” ulug at Korneliusen Petrus etno yig epag.

At Petrusen yig isebahon wene 10:34-43

³⁴ At Petrus etnowen yig isaruk wilil, “Kidia At Allahen yi aphe di aphe obog ilitoho-at ilanggen nisaruk hihi-o.

³⁵ Ariroho weregma, nit At ebe ninakoltoho wilil, fano mondog suruk nisalug, Aren nudaki ulug nit yi aphe di aphe kweanma werehon obog-at heahi war ninaptuk-o.

³⁶ Eke At Yesus Kristus yi aphe di aphe obog Ninowe inuk suon etnowen yig nisarukmu, wene fano wene dambuk ninaptukon etno bilin it Israel aphe yig isa waharisi etno hit hiniluk-o.

³⁷ Eke fobik at Yohanesen it yi aphe di aphe ikma belap inaptuk atisimu, o Galilea Yudea inim it obog-at Allah wene warusa etno hit hiniluk-o.

³⁸ Eke fobik At Allahen Yesus Nazaret ap etno At Roh Kudus inim, eke oag weregsoho suruk amon etno inim obog-at og itisi etno hit hiniluk-o. Eke fobik At Yesus etno Allah inim wilil, it uk warehon fano inabeheg, it setan inindimu werehon lisoko wilip iseheg o ahik ya da obog-at sil nuruk atisi-o.

³⁹ Ariroho sil nuruk wilil, it Yahudi ap wereg ambeg inim, eke o Yerusalem inim obog-at sil nurukmu, ninilanggen harukukseg, yig hisaruk ahe-o, eke fobik At ebe etno e fam lenggaloko umburusareg, watusa-o.

⁴⁰ Warepfuruson oke, eke At Allahen inggik henahanam-at welatisireg fam nit At awene yig isil nuruk amag ulug, At Allahen heako ninombisaharision etno-at ninilanggen hawag ulug At Allahen it aphe warehon wereg ambeg epmanowen iluksoho munduhupfirisi-o.

⁴¹ Minduhupfuruk atisimu, ik orom ninim narukuk-o.

⁴² Narukukseg weregma, Aren wene fano wene etno aphe obog yig isa lahup ulug yig nisarisi-o. Eke An Yesus etno At Allahen fobik yi aphe di aphe inilukon inim, warehon inim, obog-at oag del inabukag ulug minduhup naharisireg fam, hit aphe obog yig isil alu-o, ulug yig nisarisi-o.

⁴³ Ariroho yig nisarision etno it ap nabi epmanowen bilin At ahurumbik yig isaruk wilil, ‘It yi aphe di aphe At inuk eberoko waruk isalug, iren dag suruk atuson epmano inobam inapelegsoho At inuk fam apma imbisahu-o,’ ulug bilin it nabien ebahon epmano yig hisaruk ahi-o,” ulug at Petrusen yig isebag.

It aphe Allah wene waruk elehon epmano At Roh Kudus og isebahon wene 10:44-48

⁴⁴ At Petrus etnowen it aphe epmano awan yig isaruk heheg, it obog wene demat ulug holfahon epmano At Roh Kudus inobam belabik wapag.

⁴⁵ Belabik waharuk apagma, at Petrus inim, eke it Yahudi ap o Yopeyen inim wapahon epmano inimen, “Wi, it aphe duma Yahudi wene etno inapelehon oke, At Allahen Roh Kudus og isaruk-o,” ulug fog suruk apag.

⁴⁶ Fog suruk apareg, it aphe epmanowen inune holuk fugsoho uruk wilil, At Allah inuk suontepfurukmu inesanggo holfag. Inesanggo holtuk apareg, at Petrusen,

⁴⁷ “It aphe du nit Roh Kudus og nisarisi etno hag, og isehekma uruk du ikma belap inabuk hai buruk ahep?” ulug yig isaruk apareg,

⁴⁸ eke fobik at Petrusen, “Eleg-o, At Yesus Kristus inuk fam ikma belap inabul,” ulug belap inaptuk apagma, it epmanowen yig ituk wilil, “Hat hebe nininggik dorat ninim welamuhuk-o,” ulug yig epag.