Ibrani 7 - Allah Wene Hurumbik Keron

At Melkisedek etno Allah unde suon wilil akeleg neken-at welapag-o ulug yig isebahon wene 7:1-14

¹ At Melkisedek etno o Salem inowe suon wilil, At Allah itog mondog werehon etno unde welapag. Ariroho weregma, at Abraham etnowen it ap inowesi suon epmano warep isaruk apareg, iog suhuluk waharukmu, at Melkisedek inim salkal uruk apareg, at Melkisedek etnowen Abraham obam ahien embebag.

² Ahien obam umburuk apagma, at aharek nomaloen angge weregma, sohoen angge at ombataruk wilil, nomalo etno at Melkisedek og epag. Eke at Melkisedek etno inuk misig Inowe fano inaptukon ulug soaleg wilil o Salem inowe suon welapag etno fam, inuk misig Inowe fohot yaltukon ulug soaleg welapag.

³ Ariroho soaleg weregma, at Melkisedek etno ikni isina etamuki ininuk inim, eke at endag apahon etno inim, eke warapahon inim obog ninapeleg-o. Ninapeleg ari famen at ebe Allah amloho ilitoho neken atlug, nintul nantul Allah unde-at wereg-o.

⁴ Eke at etno suon welapag ari, hinindi ebetuk amiek-o. At ninetamu Abrahamen yi angge di angge obog huhul webahon etno nomalowon etno hag at Melkisedek og epag.

⁵ Eke it at Lewi etamuki epmano inebe Allah unde wereg isalug, at wene duroho suruk amuk eke duroho suruk am fug ulug ebahon etnowen it inawene uruk wilil, “It Israel aphe epmanowen inaharek nomalowon etno umburuk isalug, holaruk amuk-o,” ulug ariroho ebag etno fam, it Lewi ap epmano at Abraham etamuki-at oke, it inomini inungguluahon neken werehon epmanowen inaharek nomalowon etno umburuk isalug, holaruk-o.

⁶ Ariroho suruk oke, at Melkisedek etno ebe Lewi ap fug oke, at Abrahamen aharek nomalowon etno embebagma, holaruk apareg, at Abraham Allahen abug yig epahon etno obam ahien embebag.

⁷ Eke at misihen omin misig ahien obam umburuk halug ari, at omin etno doron wereg heheg, at ebe etno suon-at wereg-o.

⁸ Eke it ap Allah unde epmanowen aphe inaharek nomalowon etno holaruk ari, it ap inebe waramuhubon epmanowen-at holaruk-o. Ariroho holaruk oke, at ap Melkisedek etnowen Abraham aharek nomalowon etno holebag ari, at ap iluk werehon etnowen-at holebag ulug, at Alkitab etnowen yig nisaruk-o.

⁹ Ari halug, at Abraham etnowen aharek nomalowon og epag etno fam, it Lewi aben kidia it aphe nin inaharek nomalowon holarukon epmanowen inim og epag-o.

¹⁰ Eke at Lewi etno ebe awan endag ariog ulug, at etamu Abraham etno ahla neken wilil, at Melkisedek inim salkal ebag-o.

¹¹ Eke it Lewi ap etno Allah unde wereg heheg, At Allah wene duroho suruk amuk eke duroho suruk am fug ulug ebahon etno it Israel aphe yig isebag. Ari halug, it Lewi ap at Harun etamuki epmano Allah unde wilil, ineyabuk obog-at selepmen, at ap Allah unde misig, ungguluag werlekon-at oke, at Melkisedek Allah unde akeleg neken welapag etno hag akeleg neken werehon minatlep fug-o.

¹² Eke at ap misig ungguluag werlekon-at Allah unde welamag ulug minduhupfuruk halug, wene duroho suruk amuk eke duroho suruk am fug ulug ebahon etno inim-at keron heako ukag-o.

¹³ Eke ari halug, At Ninowe Allah unde suon misig minaruhu ulug ahurumbik ebahon etno ungguluag werlekon-at welapag-o. Eke it ap nin at ungguluahon Allah unde wilil, Allah ake hondok yaltuk apag fug-o.

¹⁴ Eke At Ninowe etno ungguluag Yehuda ap neken endag apag ari nit niniluk-o. Eke at Musa etnowen it ap nin Allah unde welamon inawene baltuk wilil, ap misig ungguluag Yehudaon inim welaruhu ulug ebag fug-o.

At Melkisedek Allah unde suon wilil ebe akeleg neken-at welapag etno hag at misig Allah unde suon akelehon neken-at minduhupfebag-o ulug yig isebahon wene 7:15-28

¹⁵ Eke wene alem uruk aheon etno kidia arat seleg atuk-o. Ariroho seleg atuk ari, at Melkisedek akeleg neken welapag etno hag, ap Allah unde misig minapag etno fam seleg atuk-o.

¹⁶ Eke At ap Allah unde minapahon ari, it apheyen wene duroho suruk amuk eke duroho suruk am fug ulug uruk etno fam minapag fug-o. Eke At ebe iluk itog mondog wilil oag weregsoho wereg etno fam, Allah unde apag-o.

¹⁷ Eke bilin Alkitab etno fam At ahurumbik uruk wilil, “At Melkisedek Allah unde akeleg neken welapag etno hag, Hat hebe hitog mondog wilil, nintul nantul Allah unde hakeleg neken welaruhun-o,” ulug ebag etno fam, it bilin Allah unde welapahon epmano inawene oag eleg atlug hai atuk apagma, sohorep isebag-o.

¹⁸ Eke at Musaen wene duroho suruk amuk eke duroho suruk am fug ulug ebahon etno fam yi angge di angge obog fanoroho sukon etno hai apag.

¹⁹ Ariroho hai apag famen, onggo Aren fano ninabuhu-o ulug wene fanowon etno-at yig nisaruk wilil, og ninaplug At Allah wereg ambeg horogsoho neken ninombisaharuk-o.

²⁰ Eke it ap nin epmano Allah unde welamag ulug minduhup isaruk wilil, At Allah inuk fam minduhup hisahake-o, ulug yig isebag fuhon oke,

²¹ At Yesus etno Allah unde welamag ulug minduhupfiog ulug, At Allahen yig ituk wilil, “An Hikni Allah ninuk fam demat ulug yig hituk ahi-o.

²² Eke Anden Hat hitog mondog wilil nintul nantul Allah unde welaruhunen-o,” ulug yig hirihion ari sohorep isalug, fobik akelehon yig hiruhuk fug, ulug Allahen At inuk fam yig epagma, At Yesus wene hurumbik keron fanowon etno unde wereg etno fam, fobik demat suhu ulug ninahla buruk ahe-o.

²³ Eke alem misig du wereg-o, it ap bilin Allah unde welapahon epmano inebe waraheg, ineyabuk eleg aheg suruk wilil, inebe anggolo welapag-o.

²⁴ Ariroho welapahon oke, At Yesus hag iluk itog mondog welaruhu ari fam, at eyabuk etno at misihen sukag ulug inggikmu umburuk eleg-o.

²⁵ Eke At ebe etno itog mondog wilil, kidia inim, fobik inim, it aphe inili wiog ulug og inaplug At Allah ambeg imbisa laheg, eke inake At Allah obam kino yig ereheg suruk wilil, ebe mondog iluk welaruhu-o.

²⁶ Ari halug, Ninowe Allah unde suon fanoroho ninaso werehon etno ari At Yesus at-o. Eke At ebe etno obabut akeleg neken-at wilil, dahan fahan seheg, dag seheg suruk eleg-o. Ariroho wereg ari, At ebe etno it aphe dag surukon inanggelegmen akelegma-at imbiog ulug, o boholma anduhunmu etlema imbik lahabag-o.

²⁷ Eke it ap kweanmon Allah unde suon welapag epmano hag, At Yesus ariroho wereg eleg-o. Eke it ap Allah unde suon werehon etnowen iren dag surukon etno eleg amag ulug bilin Allah ake embeheg, eke it yi aphe di aphe epmanowen dag surukon etno eleg amag ulug fobik Allah ake embeheg nintul nantul suruk etno hag, At Yesus ariroho suruk eleg-o. Eke At ebe etno Allah ake neken wararuhuken ulug onggarehen imig saruk apareg, Allah ake misig etno-at embebag-o.

²⁸ Eke at Musaen wene duroho suruk amuk eke duroho suruk am fug ulug ebahon etno fam, it ap nin inindi dahon-at oke, Allah unde suon welamag ulug minduhup isebag-o. Ariroho minduhup isebahon oke, at Musaen wene duroho suruk amuk eke duroho suruk am fug ulug ebahon etno bilin ebareg fam, fobik At Allahen Amloho yig ituk wilil, “Hat An ninuk fam demat minduhup hahaki-o,” ulug yig ituk apagma, At etno itog mondog indi fanowon-at wereg-o, ulug yig isebag.