Ibrani 6 - Allah Wene Hurumbik Keron

¹ Ari halug, At Kristus awene alem-at yig nisaruson etno dot awan wereg heheg, wene ebe undamon it inanggohonen inahla burukon etno niniluk amag ulug yanggul saruk amuk-o. Eke niren dag suruk atukukon sohorep isawon etno inim, eke At Allah obam ebebukon etno inim niniluk atukukseg, o andorli neken arat umburukukseg fam, fobik inim umbuk ari hai-o.

² Eke ikma belap inaptukon wene etno inim, eke aphe inungguluag ininggik sen inaptukon etno inim, eke fobik it aphe warehon minduhup isahuon epmano inim, eke o epma mondog welamag ulug oag del inabuhuon epmano inim, alem ariroho sukon etno obog-at niniluk-o.

³ Ariroho niniluk wilil, alem nin niniluk amag ulug suruk amuk-o. Eke At Allahen fano uruk halug, ariroho suruk amuhuk at-o.

⁴ Eke it aphe Allah wene iniluk heheg, mondog sohorep isarukon ari, fobik inim ioba yatuk wilil, nit dag sehe ulug bukalukon etno hai aruhu-o. It aphe ariroho surukon epmano, bilin At Allahen o seleg etno og isarukmu, boholmen og isarukon etno inahientoho waruk isalug, At Roh Kudus etno inindimu kuruk atisi-o.

⁵ Eke it epmanowen Allah wene ari fanowon at-o, ulug inahla buruk wilil, fobik oag weregsoho-at suhuon etno arat iniluk atisi-o. Ariroho sukon etno obog-at iniluk atision oke, fobik fanowon etno sohorep isalug, fobik nit dag sehe ulug ioba yatuk wilil inindi ebebukon etno hai aruhu-o.

⁶ It aphe ariroho surukon etnowen At Allah Amloho etno misihim inim e fam lenggaloko umburuk wilil, selegmaroho enggali warepfuruk-o. Ariroho suruk isalug, inebe inili wawon etno hai aruhu-o.

⁷ Eke kwean etno osit nintul nantul waharuk halug fanoroho nenggeg, eke it i angge kwean etno fam yatukon epmano anggen fanowon yihikeg suruk halug, At Allah ahien obam umburuk-o.

⁸ Eke kwean etno famen e dahon ayeg werehon etno inim, hohol angge inim wilip atuk halug, At Allahen kwean etno homali neken imbiog ulug suruk heheg, ebe hondoken elehepfuhu-o, ulug ariroho uruk aheon oke,

⁹ hit hag hinindi oag weregsoho welahep ari, nit niniluk-o, nomini. Eke hit hinebe hinili wawag ulug at ahien fanoroho hinobam umburuk ari niniluk-o.

¹⁰ Eke At Allahen dahan fahan suruk eleg-o. Ari halug, hit yabuk fanowon suruk atikibon etno inim, eke At Allah hinindi hunduhuk wilil hinomini At Kristus awene warukon epmano inabuen yi angge di angge nintul nantul og isaruk atikibon epmano inim obog-at apeleg aruhu fug-o.

¹¹ Eke hit hinarug fanoroho suruk ahebon etno mondog-at suruk amag ulug ninindi hisaruk wilil yig hisehe-o. Eke hit hinarug fanoroho suruk hisalug, hiren fanowon og nisahu ulug hinahla buruk ahebon etno og hisahu at-o.

¹² Eke hit hinaboraliroho suhup halug, nit ninambit-o. Eke it ap nin, inindimu fanoroho ebetuk wilil, dahon etno inobam umburuk iseheg yuhun-at wereg isalug, At Allahen og hisaruk-o ulug abug ebahon etno holuog ulug wereg etno hag, hit ariroho-at welamag ulug yig hisehe-o.

At Allahen Abraham etno demat og hiruhuk ulug yig epag-o ulug yig isebahon wene 6:13-20

¹³ Eke bilin At Allahen ariroho og hiruhuk ulug at Abraham etno abug yig ituk wilil, “An abug yig hirihion etno demat og hiruhuk-o,” ulug yig epahon etno, eke At Allahen ariroho yig iriog ulug, ap suon misig elehen At Allah onggareg inuk fam og hiruhuk ulug yig epag-o.

¹⁴ Ariroho yig ituk wilil, “An nahien hobam umburuk aruhukseg, hetamuki anggolo-at endag hemag ulug og hiruhuk-o. Ariroho suhuk ulug yig hirihi ari, demat suhuk-o,” ulug yig epag.

¹⁵ Yig ituk apagma, at Abraham etno indi seberoho wilil, og umon etno aso weregma, At Allahen abug yig epahon etno arat og epag-o.

¹⁶ Eke at ap misihen at omin misig demat og hiruhuk ulug abug yig ituk wilil, at owe suon misig inuk fam demat abug yig ituk-o. At owe suon misig inuk fam abug yig ituk halug, at omin etnowen demat og niruhu ulug ahla buruk-o.

¹⁷ Eke At Allahen ariroho og hisahuk ebahon etno it epmanowen demat og nisahu-o. Aren enggal-at ulug sohorep nisahaku fug-o, ulug inahla bukag ulug aren yig isaruk wilil, “An og hisahuk yig hisihi ari, An ninuk fam demat yig hisihi-o,” ulug yig isebag.

¹⁸ Ariroho yig isebag etno hag, Aren hurumbik urukon etno inim, eke At inuk fam urukon etno inim yig nisaruk halug, At Allahen enggal-at ulug imbisahu fug-o. Ari halug, nit At Allahen ninili wawag ulug obam ebetuk aheon etno ninindi oag weregsoho wilil, Aren og hisahuk ulug yig nisebahon etno aso welahe-o.

¹⁹ Eke so etno iken walug la nowen ulug hele fam liloko umburuk etno hag, niren demat og nisahu ulug ninahla buruk ahe etno fam, ninindi oag weregsoho welahe-o. Eke bilin At Allah unde suon etno o Allah ibam epmano baharik undama misig sum songsohon etno heal halug, nintul nantul kurukmu, it aphe epmanowen demat nit ninake suruk-o, ulug inahla bebag etno hag,

²⁰ At Yesus etno Ninowe Allah unde suon wilil, o At Allah wereg ambeg boholma laharuk apareg, nit ninake suruk-o. Eke bilin at Melkisedek Allah unde akeleg neken-at welapag etno hag, At Yesus Ninowe Allah unde suon akeleg neken-at nintul nantul welaruhu-o.