Ibrani 5 - Allah Wene Hurumbik Keron

¹ Eke it ap nin Allah unde wilil, nit farim Allah yabuk suruk amag ulug, inomini inanggelegmen heako minduhup isaruk-o.

² Minduhup isarukmu, it apheyen dag surukon epmano eleg amag ulug iren Allah ake umburuk-o. Eke it inebe inindi oag eleg neken-at wereg-o.

³ Ariroho wilil, it aphe nin inapelegsoho wilil dahan fahan surukon etno inahmu isaruk am ari fano-o.

⁴ Eke at misig onggarehen an Allah unde ninuk suon welaruhuken ulug ful saruk eleg-o. At Harun Allah unde suon welamag ulug wol hebag etno hag, At Allahen-at ap nin Allah unde suon welamag ulug wol isaruk-o.

⁵ Ari ilitoho At Kristus etno onggarehen At Allah unde ninuk suon welaruhuken ulug imig sebag fug-o. Ariroho imig seheg eleg weregma, At Allahen yig ituk wilil, “Hat An Namloho-at welahen-o. Hat hebe etno kidia-at endag habihi-o,” ulug yig ituk apareg,

⁶ eke fobik yig ituk wilil, “Hat hebe Allah unde mondog-at welaruhun-o. Ariroho welaruhun ari, at Melkisedek bilin At Allah unde wilil akeleg neken welapag etno hag, Hat ariroho-at welaruhun-o,” ulug yig epag.

⁷ Eke At Yesus etno ebe o kweanma iluk wilil, At Allah obam sembahyang kino eheg eke une suon eheg, ioba yareheg suruk wilil, At ili wawon etno obam kino yig epag-o. Yig epag ari, At indi seberoho wilil, obam ebetuk apagma, At une urukon etno Allah esanggo holfag-o.

⁸ Eke At ebe Allah Amloho-at oke, dahon etno obam embebareg fam, alem At Allah une esanggo holtuk amon etno iluk apag-o.

⁹ lluk atuk apagma, At ebe it yi aphe di aphe obog-at yanggul isarukon welamag ulug minduhupfebareg fam, it yi aphe di aphe At une inesanggo holtuk isalug, inilioko iniluk welamon etno-at og isaruk amag ulug inggikmu embebag-o.

¹⁰ Inggikmu umburuk apareg, At Allahen yig ituk wilil, “Hat at Melkisedek Allah unde inowe suon wilil, akeleg neken-at welapag etno hag, Hat Allah unde Inowe suon hakeleg neken-at welaruhun-o,” ulug yig ituk apareg, minduhupfebag.

Allah wene fanoroho ebetikibon etno sohorep isehep ha nowen hinindi fanoroho aso welamuk-o ulug yig isebahon wene 5:11–6:12

¹¹ Eke alem ari fam niren anggolo yig hisawon oke, hit hinindimu orog-at ebetuk ahep etno fam keroho yig hisuk neken ninapeleg atuk-o.

¹² Eke hit o amuk At Allah wene waruk atikipseg fam, hinebe yanggul isarukon-at welatlebon oke, at misihen Allah wene ebe alem neken-at yanggul hisahu ari fano-o. Eke hiren naruk angge arikon epmano nelebon oke, hit we ag ambusu neken-at nao ari fano-o.

¹³ Eke it ag ambusu narukon ari, udag doron neken-at wereg-o. Eke it udag doron ari, inindi eleg wilil, du fano du dag ulug inapeleg-at wereg-o.

¹⁴ Eke it naruk angge arikon narukon ari, ap inanggohon neken wereg-o. Eke it ap inanggohon etno hag, inindi wereg wilil, du dag du fano ulug fultukon etno iniluk atisi-o.