Ibrani 4 - Allah Wene Hurumbik Keron

¹ Ari halug, At Allah ninim kelsaruk ambeg ninim kuhuk ulug ebahon etno nit-at hurumbik yig nisaruk-o. Eke hiren ap niron misig kirisi fug ehe ha nowen ulug hinakoltoho welamuk-o.

² Eke bilin it Israel aphe Allah wene inesanggo holtuk apag etno hag, nit wene fano wene etno ninesanggo holtukuk-o. Eke iren wene etno inesanggo holtuk apareg oke, eberoko webag fug etno fam, wene yig isarukon-at oke, inindi mot apag fug-o.

³ Mot apag fuhon oke, nit wene eberoko waruk aheon etno hag o At Allah ninim kelsahuk ambeg etno kuhuk at-o. Eke bilin At Allahen it aphe epmano asine isaruk wilil, “An nahla buruk atikikseg, nasineyen uruk wilil, it aphe du hag fobik o kelsahuk ambeg epma ninim kuhuk fug-o,” ulug ebag etno demat ebag-o. Ariroho ebag ari, At Allahen o kweanma duma arat wal hebareg ebag-o.

⁴ Eke at Alkitab etnowen o nininggik sabit etno fam yig nisaruk wilil, “At Allah etno yabuk obog suruk apareg, inggik sabit fam kelsebag-o,” ulug ebahon etno wereg heheg, eke fobik At Allahen uruk wilil,

⁵ “It aphe du hag fobik o kelsahuk ambeg epma ninim kuhuk fug-o,” ulug alem etno farim fobik inim-at dahagsoho ebag-o.

⁶ Eke it aphe bilin wene fano wene etno inesanggo holtuk apareg oke, eberoko webag fug etno fam, At Allah inim o kelsaruk ambeg epma kebag fug-o. Kebag fug etno fam, it nin At Allah inim o kelsaruk ambeg epma kuhubon wereg-o.

⁷ Ariroho wereg ari, At Allahen fobik dahagsoho yig isaruk wilil, “Hit o yoho At Allah une hinesanggo holtuk ahep-o,” ulug yig isebag etno fam inebe werehon epmano selegma atuk-o. Eke at Daud etnowen wene bilin eheon etno-at fobik ilitoho yig isaruk wilil, “O yoho At Allah une hinesanggo holtuk ahep halug, hit bilin hinindi arikepatalug welatikip etno hag welam fug-o,” ulug yig isebag.

⁸ Eke at Yosua etnowen it aphe og inaplug o At Allah inim kelsaruk ambeg epmano imbisa watlepmen, At Allahen o fobik kelsahuk ambeg epmano ninim kuhuk ulug elep fug-o.

⁹ Ari halug, At Allah inggik sabit fam kelsebag etno hag, nit Allah udakien kelsawon etno wereg at-o.

¹⁰ Eke At Allahen yabuk suruk apahon etno sohorep isalug, kelsebag etno hag, it yi aphe di aphe At Allah inim kelsaruk amuhubon etno ariroho-at ineyabuk sohorep isalug, kelsaruk amuhup-o.

¹¹ Ari halug, nit ariroho At Allah ninim kelsaruk amuhuken ulug, fanoroho suruk amuk-o. Eke it epmano inesanggo fanoroho holuk sohorep isalug, kebag fug etno hag, nit ariroho kuk sohorep isehe ha nowen-o.

¹² Eke At Allahen wene ebahon etnowen niniluk ninaptuk wilil, oag weregsoho-at suruk-o. Eke karog enggat femag femag werehon etno enggat wereg-at oke, eke At Allah wene etno hag, mondog enggat werehon-at wilil, aphe inindi fam inim, inomanggen fam inim, inoag abohe fam inim, kuruk-o. Ariroho kuruk wilil, it apheyen du nindi ulug inahla burukon etno inim, eke inindi ebetukon etno inim obog-at selegmaroho bukaloko oag deltuk-o.

¹³ Ariroho suruk heheg, alem misig At Allah ilanggen ha nowen ulug herahapfuk ari hai-o. Yi angge di angge obog wal hebahon epmano At il fam selegma mondog wereg-o. Ariroho wereg famen, niren suruk aheon epmano At Allah il fam obog-at bukaluhuk-o.

At Yesus etno Allah unde Inowe suon-at wereg-o ulug yig isebahon wene 4:14–5:10

¹⁴ Ari halug, wene demat ulug ebetuk aheon etno fanoroho seneg welamuk-o. Eke bilin At Allah unde suon etno At Allah ibam o baharik undamon etno fam kuruk apag etno hag, At Ninowe Allah unde suon Yesus, Allah Amloho etno At Ikni Allah wereg ambeg epmano-at lahabag-o.

¹⁵ Eke At Ninowe Allah unde suon etnowen nit ninoag elegsoho suruk aheon epmano ahmu nisaruk wereg-o. Ariroho wereg ari, nit ninindi kahalik waharuk etno hag, At indi kahalik wapahon oke, At dag sebag fug-o.

¹⁶ Ari halug, nit ninoag weregsoho welamuk-o. Ariroho wilil, At Allahen ninabua nisaruk ambeg epma-at laruk amuk-o. Ariroho laruk nisalug, fanoroho yalmag ninabukag ulug ahmu nisawon etno inim, eke ninabua nisawon etno inim obog-at heag sahuk-o.