Ibrani 3 - Allah Wene Hurumbik Keron

At Yesus etno suon at Musa doron wereg-o ulug yig isebahon wene 3:1-6

¹ Nomini, Kristus udaki du wai, nit hit ninim At Allahen wol nisebareg fam, At Yesus etno wene demat uruk aheon etno unde wilil inuk suon welamag ulug lahabik waharision etno hinilanggen haruk amiek-o.

² Eke at Musa etno o Allah ibam wilil, nintul nantul yabuk fanoroho suruk apag etno hag, At Allah Amloho Yesus yabuk du suruk amag ulug fuloko embebahon etnowen arug fanoroho suruk apag-o.

³ Eke at ap misihen o faltuk halug, o etno dorat fog suruk oke, at ap o faltukon etno hag anggolo-at fog suruk-o. Ariroho fog suruk etno hag, at Musa inuk dorat suontepfuruk oke, At Yesus inuk hag mondog anduhunmu neken-at suontepfuruk amuk-o.

⁴ Eke o etno obog aben faltuk oke, At Allahen hag yi angge di angge obog-at wal hebag-o.

⁵ Eke at Musa etno o Allah ibam wilil, yabuk fanoroho suruk apahon oke, at ebe Allah anggimbu wilil, yi wene di wene Allahen fobik uhu-o, ulug hurumbik-at yig isebag-o.

⁶ Ariroho yig isebahon oke, At Kristus etno hag Allah Amloho atma, At ibam unde wilil fanoroho aso wereg-o. Eke nit ninindi oag weregsoho wilil, Aren fanoroho suhu-o, ulug ninindi ebetuk aheon etno hag, At ibam neken welahe-o.

Nit Allah udaki epmano kelsaruk amuhuk-o ulug ebahon wene 3:7–4:13

⁷ Eke At Roh Kudus etnowen yig nisaruk wilil, “O yoho At Allah une hinesanggo holtuk ahep halug,

⁸ hit bilin o limu epmanowen At Allah aren baluog ulug hinindi arikepatarikipseg, Allah une ninambit ulug welatikip etno hag welam fug-o.

⁹ Eke At Allahen yig hisaruk wilil, ‘O limu epmanowen hinetamukien An naren baluog ulug sebag ari, An nebe empat puluh tahun wilil noag weregsoho suruk aheyahon etno inilanggen hebareg oke, naren baluog ulug-at sebag-o.’

¹⁰ Iren ariroho suruk apagma, Anden winimug isaruk atikikseg, uruk wilil, ‘It aphe duma inahla ebetuk etno, nintul nantul dahan fahan-at ebetuk-o.

¹¹ Ariroho ebetuk wilil, An nawene etno fanoroho eberoko warusa fug-o,’ ulug ariroho nahla buruk atikikseg, nasineyen uruk wilil, ‘It aphe du hag fobik o kelsahuk ambeg epma ninim kuhuk fug-o,’ ulug At Allahen ariroho yig isebahon etno kidia nit Alkitab etnowen yig nisaruk-o,” nomini.

¹² Ari halug, hit hinindi dahon wilil, wene eberoko walug eleg-at At Allah iluk werehon etno sohorep isehe ha nowen ulug hinonggarehen hinindi aso fanoroho welamuk-o.

¹³ Eke dag sukon etnowen hinindi kahalik waharuk halug, ninindi dahapatehe ha nowen ulug nintul nantul hit hit hinesanggo war war uruk amuk-o. Eke at Alkitab etnowen yig nisaruk wilil, “O yoho At Allah une etno hinesanggo holtuk ahep ulug yig nisebag halug, nintul nantul-at ariroho uruk amuk-o.”

¹⁴ Eke nit bilin ninindi oag weregsoho wilil Allah wene warukuk etno hag, nintul nantul-at senebuhuk halug ari, At Kristus omini-at welamuhuk-o.

¹⁵ Eke at Alkitab etnowen yig nisaruk wilil, “O yoho At Allah une hinesanggo holtuk ahep halug, hit bilin hinindi arikepatarikipseg, Allah une ninambit ulug welatikip etno hag welam fug-o,” ulug ariroho yig nisarukon etno ebe heahul-o.

¹⁶ Eke it At Allah une holtug ninambit-o ulug yig epahon epmano sandehen ebag buruk ahep-o? Ari it aphe o Mesir weregma at Musaen og inaplug wilik wapahon epmanowen-at ebag-o.

¹⁷ Eke At Allah empat puluh tahun wilil winimug yig isebag ari, sandeg winimug yig isebag buruk ahep-o? Ari it aphe dag suruk apareg, o limu epma warapahon etno-at winimug yig isebag-o.

¹⁸ Eke At Allahen An nahla buruk atikikseg nasineyen uruk wilil, it aphe du hag fobik o kelsahuk ambeg epma ninim kuhuk fug-o, ulug ebag ari, it sandeg farim ebag buruk ahep-o? Ari it At awene ninambit ulug ebahon epmano farim-at ebag-o.

¹⁹ Ariroho ebag ari, it etno inindimuen demat ulug eberoko webag fug etno fam o kelsaruk ambeg epma kuk hai apag hehe-o.