Ibrani 13 - Allah Wene Hurumbik Keron

Hit At Allah ahien hisawag ulug duroho welamuk-o ulug yig isebahon wene 13:1-19

¹ Eke hit At Kristus hinim hinindi hunduhuk wilil, it hinomini hinim ariroho-at hinindi hunduhuk welamuk-o.

² Eke it ap huso hinibam waharuk isalug, hinim fanoroho welamon etno hinapeleg am fug-o. Eke it ap nin bilin welapahon epmanowen ap huso ninambeg waheson du malaikat ulug inapeleg oke, inim fano welapag-o.

³ Ari halug, it aphe hele waroko imbisarusa epmano, nit ninim-at hele wareg neken welahe-o, ulug inabua suruk wilil, inobam hinindi ebetuk amuk-o. Eke misig, it aphe nin dahon inobam umburuson epmano nit ninim neken-at ninobam umburusa ulug, inabua suruk wilil, inobam hinindi ebetuk amuk-o.

⁴ Ariroho suruk wilil, hweap hinahuni hinim fano dambuksoho welamuk-o. Ariroho wilil, hweaben ap werlekon hinim seheg, eke aben hweap werlekon hinim seheg suruk am fug-o. It aphe nin yuhun-at surukon ari At Allahen oag deloko imbisahu-o.

⁵ Eke hiren hinaharek erlog wereg heheg, uang nin obam umbukon ulug nindi nindi il nuruk am fug-o. Eke At Allahen yig hisaruk wilil, “Anden sohorep hisaharuk aruhuk fug-o,” ulug ebag etno fam,

⁶ hinindi oag weregsoho welamuk-o. Ariroho wilil, niren duroho uruk amuk-o, “At Ninikni etno ninim wilil, aben dag seko ninombisahukon etno ninakol hahuk fug-o,” ulug uruk amuk-o.

⁷ Ariroho uruk wilil, it hinowesi bilin Allah wene yig hisaruson epmano inobam hinindi ebetuk amuk-o. Ari halug, hiren it bilin duroho welatusareg, waratusa ulug inobam hinindi ebetuk wilil, iren inindi demat ulug ebetuk atusa etno hag, hit ariroho-at ebetuk amuk-o.

⁸ Eke At Yesus Kristus etno bilin welapareg oke, kidia wereg at-o, eke fobik itog mondog-at welaruhu-o.

⁹ Eke it ap ninen wene urunanggeroho dahan fahan yig hiseheg mug inaplug la fug-o. At Allahen ninabua nisarukon wene etno hag hinindi oag werehep hisahuk ari fano-o. Eke At wene yi angge di angge nao usa-o, ulug urukon etnowen aphe inindi fano inaptuk eleg-o. Ariroho suruk eleg ari fam, aren hit hinindi oag werehep hisahuk ari hai-o.

¹⁰ It bilin o sum fam faleg ambeg Allah unde welapahon epmanowen Allah ake nit og nisebahon epmano nao ari hai-o.

¹¹ Eke it Yahudi ap Allah unde suon epmanowen o inuk Mondog Usabaharik etno it apheyen dag surukon epmano eleg amag ulug wam amep etno walug Allah ake neken imbik waharuk apahon oke, eke wam inebe epmano hag lehet selema fil-at hondok yaltuk apag-o.

¹² Ariroho sebag etno hag, At Yesus etno At amep fam it aphe dag surukon epmano ninindi ho ninabiog ulug At ebe lehet selema fil-at warapag-o.

¹³ Eke At ebe etno lehet selema fil wereg ari fam, nit ninebe epmano At ambeg wilip atlug ninim ninenggali haruk amuk-o.

¹⁴ Eke o kweanma duma hag nit ninibam mondog neken wereg eleg ari famen, nit o fobik mondog welaruhuon etno-at heahil sil nuruk ahe-o.

¹⁵ Eke At Yesus etnowen nit ninake suruk apag etno fam, niren At Allah ake di At inuk suontepfukon etno-at uruk amuk-o. Ariroho uruk wilil, ninuneyen nintul nantul At obam wa eheg, inuk suontepfeheg suruk amuk-o.

¹⁶ Eke hiren fanoroho suruk amon etno hinapeleg am sohorep isalug, hit hit nabua habua suruk amuk-o. Ariroho suruk wilil, At Allah ake umburuk etno hag suruk hisalug, ahien hisahu-o.

¹⁷ Eke hit it hinowesien yig hisarukon epmano hinesanggo holtuk wilil, ilitoho suruk amuk-o. Eke it hinowesi epmano yabuk duroho surukuk ulug At Allah il fam bukaloko yig imuhup etno fam, it kidia kelseheg eleg-at hinindi aso wereg-o. Eke hiren it inune hinesanggo holtuk hisalug, it inahientoho-at suruk amuhup-o. Eke hiren holtuk eleg hisalug, it epmano inindi inambitoho suruk wilil, hit hinindi yabuk fanoroho suruk amuhup fug-o.

¹⁸ Eke hiren nit ninake sembahyang uruk amuk-o. Eke nintul nantul fanoroho-at suruk amuk ulug ninahla buruk ahe etno fam, alem misig dahan fahan surukuk ulug ninahla buruk ahe fug-o.

¹⁹ Eke an nebe etno At Allahen fobik inim dulum-at hinambeg lahap nabik wamag ulug sembahyang uhuben ulug yig hisihi-o.

An kidia sembahyang uruk ahi ulug yig isebahon wene 13:20-21

²⁰ At Allahen Ninowe Yesus etno it aphe warehon wereg ambeg epmanowen iluksoho minduhupfebag-o. Eke At Yesus etno udaki inake warapag ari, it aphe At Allah inim fano dambuksoho welamon etno oag weregsoho embebag-o. Ariroho umburuk apareg, At ebe etno anggom domba inaso wilil, Inowe suon-at wereg-o.

²¹ Eke hiren At Allah ahla burukon etno ilitoho suruk amuhuben, At Allah aphe obog dambuk inaptukon etnowen yi angge di angge fanowon epmano og hisawag ulug yig hisehe-o. Eke nit ninebe At Yesus Kristus ninim hunduhuk wereg nisalug, At ahla buluhen-at ninindi yabuk suruk aruhureg, ari fam ahien hawag ulug ehe-o. Ari ehe ari, nintul nantul At Kristus inuk-at suontepfuruk amuk-o, ulug demat yig hisehe-o.

Holal atog arat balfahon wene 13:22-25

²² Nomini-o, hit hinindi oag wereg amag ulug an wene yig hisihion du hinindi seberoho wilil, hinesanggo fanoroho holtuk amag ulug yig hisihi-o. Eke an holal ari ebe yaron neken bal hisihi fug-o.

²³ Eke at ninomin Timotius o aphe dahon imbisaruk ambeg epmanowen hele hibiloko wilipfurusa ari hit hiniluk amag ulug-at yig hisihi-o. Eke at etno ebe dulum-at waharuk halug, an ninim-at hinambeg bik hisa wamuhuk-o.

²⁴ Eke it hinowesi obog epmano inim, eke it Allah udaki obog epmano inim obog-at heahi war hinaptuk ulug yig isimuk-o. Eke it hinomini o Italia werehon epmanowen heahi war hinaptuk-o.

²⁵ Ariroho yig hisihi ari, At Allah etno hit obog-at hinabua hisaruk amag ulug yig hisihi-o.