Ibrani 12 - Allah Wene Hurumbik Keron

Nit Ninikni At Allah-at wereg-o ulug yig isebahon wene 12:1-11

¹ Eke nit hag, it aphe inindimu demat ulug ebetuk apahon epmanowen yig nisaruk isalug, ninonggarehen ninonggalem halepateheg, eke alem dag sukag ulug ninobam waharukon epmano elehepfeheg, eke ninonggalem yanggul nisebahon epmano ninahlahiroho laheg suruk amuk-o.

² Ariroho suruk wilil, nit ninindi demat ulug ebetuk amuhuken At Yesus ninolohot fil lebahon etno-at ninilanggen fikfag wenaharuk amuk-o. Eke At etno An e fam lenggaloko nowabuhup ulug akolen bok apag fug-o. Eke At etno An fobik nahien anggolo hahuk-o, ulug ahla buruk wilil, e fam lenggaloko waramon etno ari hai ulug ahla ebebuk sohorep isalug fanowon unug epahon etno holaruk apareg, At Allah horieg wereg ambeg inggik bikit fil horieg wereg-o.

³ Eke At Yesus etno it ap dahonen inambit haruk wilil, inune dahon obam embebahon epmano hinindi ebetuk amuk-o. Ariroho ebetuk wilil, hinindi oag weregsoho welamuhuben hinahlahiroho-at welamuk-o.

⁴ Eke hit hinebe etno bilin alem dag surukon epmano hinim wim aptuk wilil, mondog ninusukag ulug hinahla buruk wilil suruk atikip fug-o.

⁵ Ariroho hinahla buruk atikip fuhon oke, At Allahen hit At udaki epmano hinindi oag weregsoho welamag ulug yig hisebahon etno hinapeleg atikip ano? Eke At Allahen yig hisaruk wilil, “Nudaki-o, Anden winimug hisaruk wilil, hinesanggo holukag ulug yig hisaruk ahion ari, hiren ari hai ulug hinambit nearuk wilil ebebuk fug-o.

⁶ Eke Anden hit aphe hinobam nindi hunduhuk welahion etno hinesanggo holukag ulug-at yig hisaruk ahi-o. Eke it aphe An nudaki ulug endag inaptuk ahion ari, we yikangge lambisog dorat war inaptuk ahi-o,” ulug yig hisebag-o.

⁷ Ari halug, At Ninikni etnowen-at ninesanggo war ninaptuk ulug hinindi hinahlahiroho wilil, fanoroho welamuk-o. Eke hit hinebe At Allahen hinesanggo war hinaptukon ari fam, it du An nudaki-at wereg ulug selegmaroho yig hisaruk-o. Eke at ikni etnowen amloho etno yikangge watuk eleg buruk ahep ano? Ari eleg-o.

⁸ Eke At Allahen udaki inesanggo holukag ulug inesanggo war inaptuk etno hag war hinaplep fugmen, ari fam nit ninebe At Allah udaki welahe fug-o, ap werlekon udaki neken-at welahe ulug welatlep-o.

⁹ Eke it niniknisi kweanmon epmanowen yikangge ninusuruk isalug, inapma kunuk uruk ahe ari ebe doron at-o. Eke Ninikni boholmon etno apma-at seberoho welamuhuk ari hag alem suon at-o. Ari halug, niren At apma seberoho wereg nisalug, niniluk welamon etno-at og nisahu-o.

¹⁰ Eke nit ninebe udag doron wereg niseheg it niniknisi kweanmon epmanowen yuhun-at inahla buruk wilil yikangge ninusuruson oke, At Allahen ninesanggo war ninaptuk ari, ninobabut fano atlug At ebe fano mondog wereg etno hag ninebe fano welamag ulug-at ninesanggo war ninaptuk-o.

¹¹ Ariroho ninesanggo war ninaptuk halug niren ninahla buruk wilil, ariroho war ninaptuk ari, ninindi fano amag ulug-at war ninaptuk eleg-o. Eke ninindi dag amag ulug-at war ninaptuk-o, ulug ninahla buruk aheon oke, ninesanggo war ninaptuk etno fam fobik At apma seberoho wilil, fanoroho ninesanggo holtuk nisalug, Aren onggo fanowon ari, ninobabut motoho wilil, ninindi fanoroho welamon etno-at og nisahu-o.

Hit hinobabut ariroho welamuk-o ulug yig isebahon wene 12:12-29

¹² Ari halug, hininggik hiniog elekelek suruk ahebon etno oag weregepataruk amuk-o.

¹³ Ariroho suruk wilil, hinonggalem motoho-at yag saruk amuk-o. Ariroho yag saruk amuhup halug, hiniog dahon epmano sowani yako wateheg eleg, fano-at lahup-o.

¹⁴ Eke hit it yi aphe di aphe obog hinim dambuksoho welamuhuben hinobabut fanoroho-at suruk amuk-o. Hinobabut fanoroho suruk amuhup fug halug, At Ninowe etno hinilanggen hahup fug-o.

¹⁵ Eke hit obog At Allahen hinabua hisaruk heheg, at misig nambit ulug wilip am nowen hit hit hinesanggo war war uruk amuk-o. Eke hit e bim engga fag halug olok haruk ahep etno hag, at hinomin misig indi minduhukon halug, hit obog hinindi olok am nowen hit hit hinindi ayeg war war uruk amuk-o.

¹⁶ Eke at Esau etno manggia-at endag apareg fam, wene ap manggien uruk amon etno unde welatlebon oke, orom dorat farim onggo baltuk wilil, at ebe fobikon neken apag-o. Eke at obabut dahon wilil, dahan fahan suruk apag etno hag, hit ariroho sehep ha nowen fikfag welamuk-o.

¹⁷ Eke at Esau etno fobik nikni ahien nobam umbukag ulug suruk apahon oke, ebe fobikon neken apag etno fam sohorep isebag-o. Ariroho suruk apagma, at etno nin wene ap manggien uruk amon etno keroho holele ulug ioba yatuk wilil, suruk apahon oke, aren bilin sebahon etno alem elehepfukon hai apag etno hit hiniluk-o.

¹⁸ Eke it Israel aphe dom Sinai alma demat lebag etno hag, hit larikip fug-o. Eke at dom Sinai fam epmen hondok ambulpul laharukon etno inim, eke o hik werehon etno inim, eke hiahne suon etno inim,

¹⁹ eke binggon suon une etno inim, eke une misig etno inim obog-at hinilanggen haruk eleg wilil, hinesanggo holtuk atikip fug-o. Eke it Israel aphe epmano hag bilin une etno inesanggo holtuk apareg, inakolen fobik inim yig nisa fug-o, ulug uruk apag.

²⁰ Eke une etnowen yig isaruk wilil, “Wam misig dom ari alma lalug fag haruk halug, helep fam wabukag-o,” ulug urukmu inesanggo holtuk apareg, inakolen sebag.

²¹ Inakolen surukmu, at Musaen alon werehon etno ilanggen haruk apareg uruk wilil, “An kidia nakolen elekelek suruk ahi-o,” ulug ebag-o.

²² Eke hit hag dom Sinai alma epmano laruk atikip fuhon oke, dom Sion ari At Allah iluk mondog werehon etno ibam, o Yerusalem boholmon, it malaikat inebe anggolo beribu-ribu wereg ambeg epmano hag horogsoho waharikip-o.

²³ Ariroho waharikip ari, At Allah udaki manggia endohowon, boholma ininuk holal baleg werehon epmano inahien haruk wilil wonggalik waharuk ambeg etno-at waharikip-o. Eke misig, At Allah it yi aphe di aphe inoag del inaptukon epmano inim, eke it aphe fanowon inobabut fano inapahon inahurangge epmano inim wereg ambeg epmano-at waharikip-o.

²⁴ Eke misig, At Yesusen wene hurumbik keron yig nisaruk wilil, At Allah ninim dambuksoho ninombisahabahon etno inim, eke At amep deloko embebahon etno inim wereg ambeg waharikip-o. Ariroho waharikibon oke, at Habel amep etnowen wene dahon-at yig hisaruk heheg, At Yesus amep etnowen hag wene fanowon-at yig hisaruk-o.

²⁵ Ari halug, hit hinobabut fikfag wilil, At wene urukon etno une hinambit ha fug-o. Eke ap misig bilin Allah wene o kweanma dumen yig isarukmu, une inesanggo holtuk wilil, inambit haruk apahon epmano hite wilip amuog ulug sebahon oke, hai apag-o. Ari ilitoho nit At boholmen une yig nisarukon etno ninesanggo holuk sohorep isalug, ninolohore wilip amuhuk halug, nit ariroho-at hite wilip amulen ulug suhukon oke hai aruhu-o.

²⁶ Eke o ari sambit bilin At une etnowen o kweanma duma aplohok sebahon oke, kidia hurumbik yig nisaruk wilil, “Fobik Anden o kweanma duma inim eke boholma inim obog-at aplohok suhuk-o,” ulug ebag-o.

²⁷ Eke une fobik suhuk ulug ebag ari fam, yi angge di angge wal hebahon epmano obog-at aplohoksepfuhukseg, elehapsuhuk-o. Eke yi angge di angge mondog aplohok suhuk fuhon epmano welamuhup at-o, ulug hurumbik etno selegma-at yig nisaruk-o.

²⁸ Eke nit hag At Allah apma welamon aplohok suk fuhon etno-at og nisaruk ari fam wa ulug uruk amuk-o. Ariroho uruk amuhuk ari, At Allahen ninabua nisaruk wilil, ahmu nisawag ulug ninindi seberoho wilil, ninakoltoho At Allah obam sembahyang uruk amuk-o.

²⁹ Eke At Ninikni Allah ari, hondok ninakol haruk ahe etno hag alon werehon-at wereg-o.