Ibrani 11 - Allah Wene Hurumbik Keron

It aphe du inindi demat ulug ebetuk wilil welapag-o ulug yig isebahon wene 11:1-40

¹ Eke yi angge di angge fanoroho suhu ulug ninahla buruk aheon epmano inim, yi angge di angge haruk ahe fuhon epmano inim, niren demat ulug ninindi ebetuk ahe etno fam obog-at niniluk atuk-o.

² Eke it o amuk demat ulug inindi ebetuk apag etno fam, At Allahen ahien isaruk apag-o.

³ Eke bohol inim kwean inim At Allahen bilin wene uruk apareg, wal hebahon etno inim, eke Aren wal hebareg fam yi angge di angge haruk ahe fuhon epmanowen eke it yi angge di angge haruk aheon epmano werehepfebahon epmano inim niren demat ulug ninindi ebetuk ahe etno fam niniluk atuk-o.

⁴ Eke at Habel etno indimu demat ulug ebetuk wilil, Allah ake fanowon epmano umburuk apagma, At Allahen Kainen embebahon epmano sohorep isalug, at Habelen embebahon epmano waruk wilil, ap du hag obabut fano wilil embehek-o ulug ahien hebag. Eke at Habel etno ebe amuk warapahon oke, Aren indi demat ulug ebepahon etnowen yig nisaruk-o.

⁵ Eke at Henokh etno hag, indi demat ulug ebetuk apag etno fam, warapag fug-o. Waraheg eleg weregma, At Allahen walug lahabag. Walug lahabareg fam, it apheyen ebe eleg hebag-o. Eke at Alkitab etnowen yig nisaruk wilil, at Henokh etno awan walug lahiog ulug heheg, At Allah ahien neawag ulug suruk apag oke,

⁶ ap misig indi demat ulug ebetuk eleg halug, At Allah ahien neawag ulug suruk eleg-o. Eke it yi aphe di aphe At Allah ambeg wamuog ulug surukon epmano it obog At Allah demat wereg ulug inindi ebereheg, eke nin ebe heaharuk nisalug, onggo fanowon-at og nisahu ulug inahla beheg suruk amag-o.

⁷ Eke at Nuh etno hag, indi demat ulug ebetuk wilil, At Allahen fobik war inabuhuk-o ulug ebahon etno ilanggen hebag fuhon oke, esanggo holfag-o. At Allahen ebahon etno esanggo holtuk apareg, aren so etno o ilitoho falfag. Falepfuruk apareg, at uhwe udaki inim so fam epmano kebareg weregma, inili webag-o. Inili webareg fam, aren it aphe kweanma obog inili oko imbisebag-o. Eke at indi demat ulug ebepag etno fam, At Allahen ap du obabut fano hihi ulug ahien obam embebag-o.

⁸ Eke at Abraham etno Allahen yig ituk wilil, “Hat hudaki hetamuki unde welamuhup ambeg epmano-at lag-o,” ulug wol haruk apagma, indimuen demat ulug ebetuk apareg, esanggo holfag. Holtuk apareg, o lao ambeg epmano apelehon oke, arat lebag.

⁹ Eke at etno indi demat ulug ebetuk wilil, o bilin hurumbik yig epag ambeg epmano lebag. Laruk apareg, epma wilil, at ebe huso-at oke, i werehon neken welapag. Eke at udaki Ishak Yakub etno At Allahen hurumbik etno-at yig isebahon oke, inim o sum fam falfag ambeg epmano welapag.

¹⁰ Eke inibam sum fam falfareg oke, o suon andorli oag weregsoho falegma welamon At Allah akelehen indi kahaloko faluhu ambeg epmano-at welamuhuk-o, ulug ahla buruk wilil, aso welapag.

¹¹ Eke misig at Abraham etno ebe anggog apareg wilil, uhwe Sara etno udag endebuk hai heheg oke, At Allahen hurumbik yig nitision etno demat suhu-o ulug indi ebetuk apareg, namloho misig fobik endag sahuk at-o, ulug indi ebepag.

¹² Ariroho indi ebetuk wilil, ebe anggohon ine eleg apareg oke, at etno fobik udaki etamuki anggolo endag inapag. At udaki etamuki epmano inebe ik sorli, soholoal ilitoho ininggik wane suk fugsoho endag inapag.

¹³ Eke it aphe epmano inindi demat ulug ebetuk wilil, At Allahen hurumbik yig isebahon etno inilanggen halug eleg-at warapag. Inebe yatmen-at inilanggen yet heheg, eke hurumbik etno inindimu ebetuk wilil, inebe yatmen-at wa eheg suruk apareg, selegmaroho bukaloko uruk wilil, “O kweanma duma ap yatmon wereg etno hag, huso neken-at welahe-o,” ulug uruk apag.

¹⁴ Eke it etno o kweanma duma huso neken welahe ulug demat uruk isalug, etno fam inibam keron-at heahil sil nuruk ulug niniluk atuk-o.

¹⁵ Eke it etnowen inibam bilinon sohorep isebahon etno-at inindi ebetlepmen, fobik iniog suhuluk epma-at lelep-o.

¹⁶ Ariroho lelebon oke, it inibam boholmon fanowon etno-at heag suog ulug sebag-o. Ariroho heag suog ulug suruk apagma, At Allahen Hinikni an at-o, ulug yig isaruk wilil, ambit isebag fug-o. Aren it inibam suon etno-at fal inaptuk apag-o.

¹⁷ Eke At Allah etno indi demat ulug ebetuk halug, At Allahen aren baliug ulug yig ituk heheg, at Abraham etno amloho Ishak Allah ake waroko imbiug ulug sebag-o. Eke at Abraham etno bilin At Allahen hudaki hetamuki anggolo og hiruhuk ulug hurumbik yig epahon oke, at amloho misig-at endepahon etno Allah ake imbiug ulug sebag-o.

¹⁸ Eke bilin At Allahen yig ituk wilil, “At Ishak etnowen hetamuki anggolo endag hiruhu-o,” ulug abug yig epahon etno fam,

¹⁹ at Abraham ahla buruk wilil, anden namloho Ishak warepfuruk nealug, At Allahen minduhupfuhu at-o, ulug indimu demat ebetuk apareg fam, At Allahen amloho Ishak ilioko og epag-o.

²⁰ Eke at Ishak etno hag indi demat ulug ebetuk wilil, hit Yakub Esau ahien hinobam umbuhu-o, ulug hurumbik yig isaruk apag.

²¹ Eke at Yakub etno hag indi demat ulug ebetuk wilil, ebe horog warariog ulug suruk apareg, at Yusuf udaki epmano inobam ahien embebag-o. Ahien inobam imbiog ulug, ebe wanggun fam himbisoko minduhuk wilil, At Allah obam sembahyang uruk apag.

²² Eke at Yusuf etno hag indi demat ulug ebetuk wilil, ebe horog warariog ulug suruk apareg, yig isaruk wilil, “Hit Israel ap hinebe o Mesir dumen wilip amuhup-o,” ulug yig isaruk apareg, ebe warama sukon etno inim-at yig isebag.

²³ Eke it at Musa ikni isina epmano hag inindimu demat ulug ebetuk wilil, at ebe ket endoko herahapfebagma, bikalem henahan welapag-o. Ariroho weregma, udag ebe fanowon inilanggen haruk apareg, at Firaunen ebahon etno sohorep isawon inakol eleg-at welapag.

²⁴ Eke at Musa etno hag, ebe anggog atuk apareg, indi demat ulug ebetuk wilil, it apheyen an nebe farim ap du at Firaun ahalohowen endohowon etamu at-o, ulug yig num ari nambit-o, ulug ahla buruk wilil,

²⁵ an nebe it Allah udaki epmano ninim dahon ninobam umbuk ari fano. Eke ninggik dorat dag suruk wilil, nahien hao ari hai-o, ulug ahla bebag.

²⁶ Ariroho ahla buruk wilil, an At Kristus ahurumbik etno waruk nealug, inune dahon nobam umbuk ari fano oke, eke it Mesir ap epmano inaharek obog holao ari hai-o, ulug ahla buruk wilil, fobik At Allahen og umon etno aso welapag-o.

²⁷ Eke at Musa etno indi demat ulug ebetuk wilil, at Firaun etnowen winimug umon etno akol eleg-at welapag. Ariroho wilil, at ebe o Mesiren wilip apag-o. Wilip atuk apareg, At Allah ninilanggen haruk ahe fuhon etno ilanggen haruk neken wilil, an niog suhuluk lao nambit-o, ulug ahla bebag-o.

²⁸ Eke at etno indi demat ulug ebetuk wilil, esoho Paskah esebukon etno esetuk amuk-o, ulug abug selegmarepfuruk apareg, at aphe war inaptukon malaikat etnowen it Israel aphe inudaki manggia endohowon epmano war inabuk nowen ulug, hinibam o sok eleke wam amep are siuk-o, ulug yig isebag.

²⁹ Eke it Israel aphe epmano inindi demat ulug ebetuk wilil, ik Laut Merah etno kwalem larukke fano lealeg weregma lebag. Laruk apagma, it Mesir ap epmano ik baloko luog ulug suruk iseheg, iken og inapag-o.

³⁰ Eke it Israel ap epmano inindi demat ulug ebetuk wilil, o Yerikho etno ininggik sabiren angge fam dahag dahag suruk apagma, o Yerikho lehet helep fam falehon etno satnog sebag.

³¹ Eke at hwe misig yuhun-at wanggik surukon inuk Rahab etno indi demat ulug ebetuk wilil, it ap o inilanggen wenahik wapahon epmano inaohi esag inapag etno fam, it aphe Allah wene inesanggo holtuk apag fuhon epmano inim war inaptuk wilil, at hwe etno hag sohorep isebag.

³² Ari halug, it aphe obog inawene ihion ari yaron-at ik ano, sohorep isik ano? Eke at Gideon etno inim, eke at Barak etno inim, eke at Simson etno inim, eke at Yefta etno inim, eke at Daud etno inim, eke at Samuel etno inim, eke it nabi At Allah wene hurumbik yig isebahon epmano inim, it inawene epmano obog eleon oke, ebe anggolo famen o arat arikon-o.

³³ Eke it obog epmano hag inindi demat ulug ebetuk wilil, aphe o ahik suon nin inim wim abil laruk apareg, inebe obog-at seberoho imbisebag. Ariroho imbisaruk apareg, it epmanowen yabuk fanowon etno suruk wilil, At Allahen og hisahuk ebahon etno-at holeheg, eke it nin wam singa induag dokoroho inele abitep iseheg,

³⁴ eke hondoken iniog ulug suruk halug, nangguksepfeheg, eke it aphe ninen karog fam bal inabuog ulug suruk isalug, inili holeheg, eke inebe inoag elehon-at oke, inoag wereg aheg, eke wim aptuk wilil, inoag weregsoho abeheg, eke ap inim wim aptukon epmanowen inusuog ulug waharuk isalug muko wilip iseheg suruk apag-o.

³⁵ Eke it hweap nin epmano inindi demat ulug ebetuk iseheg, inudaki iniknisi inisasi war apahon epmano iniluksoho minduhup isaruk apareg, fobik og isebag. Eke it aphe nin epmano hag, ninebe fanoroho minduhup nisahaku ulug inahla buruk iseheg, it ninen hele war inaptuk wilil, “Hinili og hinabuk ano?” ulug yig isaruk apagma, it epmanowen, “Eleg-o,” ulug uruk apareg, warapag.

³⁶ Eke it nin hag, apheyen inune dahon inobam embeheg, eke hele lambisog fam war inabeheg, eke aphe dahon imbisaruk ambeg kolap iseheg,

³⁷ eke helep fam war inabeheg eke ininggik hele war inabeheg, eke kege fam inobahare balinabeheg, eke karog fam war inabeheg, eke inebe muko wilip iseheg, eke ariroho war inabuhuk ulug inabug baleheg, eke inobam dag seko imbiseheg, suruk iseheg welapag. Ariroho wilil, inaharek mondog elehen inasum wam kambing domba ahap wanteheg suruk apag.

³⁸ Ariroho suruk wilil, it inebe o kweanma duma wereg iseheg, it aphe kweanmon nin epmanowen inambit isaruk apag. Inambit isaruk apagma, it epmano hite wilip atuk apareg, o limu aphe eleg ambeg epmano inim, eke o bunu hureg ambeg epmano inim, eke o wikelma epmano inim, eke bun elma epmano inim herag arik lebareg welapag.

³⁹ Eke it obog epmano inindimu demat ulug ebepag etno fam, du Allah udaki at-o ulug selegma apag-o. Ariroho selegma apahon oke, At Allahen ap misig og hisahuk ulug hurumbik yig isebahon etno inilanggen hebag fug-o.

⁴⁰ Eke At Allahen at misig ahurumbik yig isebahon etno nit kidia welahe du fam lawag ulug ahla bebag-o. Ariroho ahla bebareg fam, it aphe bilin hurumbik yig isebahon epmano atog neken nit-at welahe-o.