Ibrani 10 - Allah Wene Hurumbik Keron

¹ Eke it Yahudi aben wene duroho suruk amuk eke duroho suruk am fug ulug ebahon etno fobik suhuon ilitoho neken-at ebahon oke, ebe demat fano inaptukon neken eleg-o. Eke yi angge di angge Allah ake ulug umburukon ari, tahun nintul nantul suruk wilil, ilikia hupmu-at umburukon oke, ari fam it aphe At Allah ake imbik waharukon epmano fam inindi fano inaptuk eleg-o.

² Eke it aphe At Allah ake imbik waharukon epmanowen dag surukon epmano demat inobam inapelegsoho elehap inaplepmen, iren an dag suruk ahi-o ulug selegma bukaloko ukon etno sohorep iselepsehen, fobik Allah ake imbik watlep fug-o.

³ Ariroho imbik watlep fuhon oke, it apheyen nit dahon ulug inahla buruk etno fam, eleg amag ulug tahun nintul nantul Allah ake umburuk-o.

⁴ Ariroho umburuk oke, wam kambing amep inim, sapi kulog amep inim etnowen it apheyen dag surukon epmano inobam inapelegsoho elehap inaptuk eleg-o.

⁵ Elehap inaptuk eleg etno fam, At Kristus o kweanma duma ambik wariog ulug ahla bebareg, At Allah yig ituk wilil, “Yi angge di angge Allah ake umburukon epmano inim, eke wam waroko Allah ake hondok yalukon epmano inim wao ari hambit haruk ahen oke, eke An nebe etno hag Allah ake ulug nombaharikin-o.

⁶ Eke it apheyen dag surukon epmano eleg amag ulug, wam waroko hondok yaltukon epmano hambit haruk ahen-o.

⁷ Ariroho hambit haruk healug, eke Anden yig hituk wilil, Allah wai. An nahurumbik etno wene holal baleg wereg etno fam, kidia haren du suhu ulug hahla buruk ahenon etno-at ilitoho siog ulug wahi-o, Nikni,” ulug yig epag.

⁸ Ariroho yig epag ari, it apheyen wene duroho suruk amuk eke duroho suruk am fug ulug ebahon etno fam, At Allah ake anggolo-at umburuk iseheg, Aren uruk wilil, “Yi angge di angge Allah ake umbukon etno inim, eke wam waroko Allah ake hondok yaltukon epmano inim hambit haruk wilil, it apheyen dag surukon epmano eleg amag ulug wam waroko hondok yalukon epmano inim-at hambit haruk ahen-o,” ulug yig epag.

⁹ Yig ituk apareg, eke fobik yig ituk wilil, “Allah wai. Kidia Haren du suhu ulug hahla buruk ahenon etno-at ilitoho siog ulug wahi-o, Nikni,” ulug yig epag. Ariroho yig ituk apagma, it apheyen bilin Allah ake ulug embebahon epmano At Allahen sohorep isalug, ubulukmu At Kristus ebe Allah ake umbukon ulug welapahon etno embebag-o.

¹⁰ Eke At Yesus Kristus etno At Allahen du suhu ulug ahla bebahon etno ilitoho suruk wilil, At ebe nit obog ninonggo inggik misihim-at Allah ake ombatebag etno fam, niren dag suruk aheon epmano sohorep isalug, ninindi ho ninaptuk-o.

¹¹ Eke it Yahudi ap Allah unde epmano o nintul nantul yabuk suruk wilil, ininggik anggoloam-at Allah ake umburuk oke, Allah ake umburuk ari fam it apheyen dag surukon epmano eleg atuk eleg-o.

¹² It apheyen dag surukon epmano eleg amag ulug At Kristus etnowen misihim-at Allah ake ombataruk wilil, aphe obog inonggo baltuk apareg, At Allah inggik bikit fil horie ik lahabag-o.

¹³ Laharuk apareg, At Allahen it At inim healeg werehon epmano At iog apma imbisawon etno aso wereg-o.

¹⁴ Ari halug, At Kristus etnowen misihim-at Allah ake embebareg fam, Aren it aphe dag surukon etno inindi ho inaptukmu, initog mondog fano welamag ulug imbisebag-o.

¹⁵ Ariroho imbisebahon etno At Roh Kudus inimen yig isaruk wilil, “Fobik it aphe etno ninim wene ariroho baltuk amuhukseg, ninim dambuluhuk-o.

¹⁶ Ninim dambulig wilil, Anden wene duroho suruk amuk eke duroho suruk am fug ulug yig isahukon etno inindimu holal neken baloko umbuhuk-o,” ulug yig isebag-o.

¹⁷ Ariroho yig isaruk apareg, eke fobik yig isaruk wilil, “Iren dag suruk atuson epmano inobam inapelegsoho imbisahuk-o,” ulug ebag etno hag,

¹⁸ iren dag suruk atuson epmano arat inobam inapelegsoho imbisebag etno fam, fobik it apheyen dag surukon epmano eleg amag ulug Allah ake nin umburuk eleg-o.

Nit nintul nantul At Allah ambeg waharuk amuk-o ulug ebahon wene 10:19-39

¹⁹ Nomini-o, At Yesus etno nit ninake warapareg fam, nit o misig inuk Mondog Usabaharik welapag etno hag werehon etno fam kukag ulug ninasok hut nisebag-o.

²⁰ Ariroho hut nisebag etno fam, ninonggalem keron misig yahap nisaharuk wilil, bilin sum saleg welapahon etno healep nisahabag-o. Ariroho healep nisahabag ari, at ebe og nisebag etno fam ninebe niniluk ninaptuk-o.

²¹ Eke At Allah unde suon misig At ibam aso werehon etno nit Ninowe-at wereg-o.

²² Ari halug, nit ninindi seberoho wilil, wene du demat ulug ebetuk nisalug, Aren nit dag suruk ahe ulug ninahla buruk aheon epmano ho ninabeheg, eke ninebe ik sabele elehon etno fam kume war ninabeheg suruk ari famen, nit ninindi fanoroho At Allah ambeg waharuk amuk-o.

²³ Eke At Allahen og hisahuk ulug ebahon etno demat og nisahu ulug ninahla buruk wilil, fanowon og nisahu ulug uruk aheon etno ninindi eberegsoho welamuk-o.

²⁴ Eke nit nit ninindi hunduhuk wilil, nabua habua suruk aheon etno fanoroho suruk amuhuken ulug, nit nit fanoroho ninesanggo war war uruk amuk-o.

²⁵ Eke it nin inebe dambuksoho wonggaluk sohorep isaruk etno hag, nit ariroho suruk am fug-o. Eke At Ninowe wamon etno arat fanggog ik waharuk-o, ulug hinahla buruk ahep etno fam hit hit hinindi oag werehepataruk amuk-o.

²⁶ Eke nit wene demat uruk amon etno arat niniluk atukukseg oke, fobik dag suk ninahla buruk wilil suruk nisalug, At Allah ake misig etnowen ninobam ninapelegsoho apma ninombisahaku fug-o.

²⁷ Ariroho ninombisaharuk eleg halug, nit ninebe o dagma ninombisahaku ulug ninakoltoho welamuk-o. Eke niren dag suruk aheon epmano sohorep isaruk eleg nisalug, it nin At Allah inambit harukon epmano ninim ninoag deloko o hondok olokma-at ninombisahaku-o.

²⁸ Eke it ap biren henahanen ap du dag sirisi-o ulug urukon etno alem etno eleg atuk eleg halug, at dag surukon etno abua heheg eleg-at wilil, at Musaen wene duroho suruk amuk eke duroho suruk am fug ulug ebahon etno esanggo holtuk elehon halug, wabukag ulug oag deloko umburuk-o.

²⁹ Ari halug, at ap misihen At Allah Amloho etno ambit heheg, eke At Yesus amep fam aphe inindi dahon horep isalug At Allah inim dambulukon etno hai ulug seberoho embeheg, eke At Roh Kudus ninabua nisarukon etno abug baleheg surukon halug, onggo mondog-at wabukag ulug oag deloko umbukon etno hinindi ebetuk amuk-o.

³⁰ Eke At Allahen uruk wilil, “An onggo og nemag ulug yig isahuk-o,” ulug uruk apareg, eke fobik uruk wilil, “It yi aphe di aphe An napma werehon epmano oag deloko imbisahuk-o,” ulug ebag-o.

³¹ Ariroho ebareg fam, At Allah iluk werehon etno inggiken war hinabuk ari hinakol haruk amuk-o.

³² Ari halug, hiren nit bilin ariroho welatukuk ulug hinindi ebetuk amuk-o. Eke o ari sambit At Allahen o seleg Aren angge etno og hisarisireg fam, it ninen dahon epmano hinobam umburuson oke, hinindi oag weregsoho-at welatikip-o.

³³ Ariroho welatikipseg fam, fobik aphe obog inil fam selegma-at hinobam denggeleheg, eke dahon nin hinobam embeheg suruson oke, hit hinindi hinahlahiroho wilil, it nin dahon inobam umburuson epmano nit ninim-at ninobam umbukag-o, ulug hinim dambuksoho welatikip-o.

³⁴ Eke hinebe hele waroko aphe dahon imbisaruk ambeg epmano-at welatikip-o. Eke hinaharek diloko holaruk isalug, hinahientoho-at wilil, fanowon itog mondog welamon etno-at og nisahu-o ulug hinahla buruk wilil, hinahientoho welatikip-o.

³⁵ Ari halug, hinindi oag weregsoho-at welamuk-o. Ariroho wereg hisalug onggo fanowon etno anggolo-at og hisahu-o.

³⁶ Eke At Allahen og hisahuk ulug ebahon etno huluog ulug hiren At ahla burukon etno suruk amuk-o, ulug hinahla buruk wilil hinindi seberoho-at welamuk-o.

³⁷ Eke alem ari fam at Alkitab etnowen uruk wilil, “Dot welatlug fobik At waruhuk ulug urukon etno waruhu ari, At ebe orog-at waruhu fug-o.

³⁸ Eke it An nudaki inobabut fanowon epmano demat ulug buruk amuhup etno fam iniluk welamuhup-o. Eke it An nudakion epmano at misig nambit ulug olohore wilip atuk halug, An nahien hahuk fug-o,” ulug ariroho ebag-o.

³⁹ Eke nit hag, ninambit ulug ninolohore wilip atuk ahe fug etno fam, fobik o dagma luog ulug welahe fug-o. Nit ninindi demat ulug ebetuk ahe ari fam, fobik Aren ninili wahu-o, ulug ebag.