Galatia 3 - Allah Wene Hurumbik Keron

Nit At Allah obam ebetuk nisalug alem dahon ninobam werehon etno elehepfuruk-o ulug yig isebahon wene 3:1-14

¹ Hit Galatia ap urunangge du wai. Hit wene demat uruk ahebon etno hinapeleg amag ulug at sen enggal-at yig hisarisi-o? Eke At Yesus Kristus e fam lenggaloko warepfebahon etno hinil fam fikfag yangguloko yig hisarusa fug ano?

² Ari halug, eke misig du yig nimiek-o, hit it Yahudi aben wene duroho suruk amuk eke duroho suruk am fug ulug ebahon etno ilitoho suruk hisalug, At Roh Kudus etno og hisarisi ano, eke wene fano wene etno hinesanggo holtug eberoko waruk hisalug og hisarisi ano?

³ Eke hit keroho ulug urunanggeroho uruk ahep-o? Eke atog bilin At Roh Kudus etno oag fam suruk atikibon oke, eke atog fobik hit hinoag fam suruk amuhuk buruk ahep ano?

⁴ Eke yi angge di angge hinobam umburuson epmano werlek-at ninombisaharusa ulug hinahla buruk ahep ano? Ari eleg-o. Werlek-at hinombisaharusa fug-o.

⁵ Eke At Allahen Roh Kudus etno og hiseheg, eke hinanggelegmen sukfugangge seheg suruk ari, it Yahudi aben wene duroho suruk amuk eke duroho suruk am fug ulug ebahon etno suruk hisalug suruk ano, eke wene fano wene etno hinesanggo holtug eberoko waruk hisalug suruk ano?

⁶ Eke at Abraham awene etno Alkitab fam weregma yig nisaruk wilil, “At etno Allah obam ebetuk apag etno fam, At Allahen alem dahon obam werehon epmano elehepfebag-o,” ulug ariroho yig nisaruk halug,

⁷ it aphe At Allah obam ebetukon epmano obog at Abraham etamuki neken wereg-o ulug hinahla buruk amuk-o.

⁸ Eke Alkitab fam yig nisaruk wilil, “It ap Allah wene inapelehon epmano fobik At Allah obam ebetuk isalug, alem dahon inobam werehon epmano At Allahen elehepfuhu-o,” ulug hurumbik Alkitab fam yig isebag-o. Ariroho yig isaruk apareg, wene fano wene hurumbik etno at Abraham yig ituk wilil, “Hat hetamu misig endag aruhu etno fam, At Allahen aphe kweanmon obog ahien inobam umbuhu-o,” ulug yig ituk apagma, at Abraham etnowen At Allah obam ebetuk apag. Ebetuk apagma, At Allah ahien obam embebag.

⁹ Eke At ahien Abraham obam embebag etno hag, it yi aphe di aphe obohen At Allah obam ebetuk isalug, ahien inobam umburuk-o.

¹⁰ Eke it obog Yahudi aben wene duroho suruk amuk eke duroho suruk am fug ulug ebahon etno suog ulug surukon ari wene homali neken inobam wereg-o. Eke ari halug, alem ari fam Alkitab etnowen yig nisaruk wilil, “It obog Yahudi aben wene duroho suruk amuk eke duroho suruk am fug ulug ebahon etno obogsoho suruk eleg isalug, wene homali etno inobam umburuk-o,” ulug ariroho yig nisebag halug, it aphe obog Yahudi aben wene duroho suruk amuk eke duroho suruk am fug ebahon etno ilitoho suruk isalug, etno fam At Allahen alem dahon inobam werehon epmano elehepfuhu fug-o.

¹¹ Eke ari halug at Alkitab etnowen yig nisaruk wilil, “It aphe At Allah obam ebetukon epmano hag alem dahon inobam werehon epmano At Allahen elehepfuhumu, iniluk mondog welamuhup-o,” ulug yig nisaruk-o.

¹² Eke it Yahudi aben wene duroho suruk amuk eke duroho suruk am fug ulug ebahon etno eberoko waruk amuk ulug yig nisaruk eleg-o. Eke it Yahudi aben wene duroho suruk amuk eke duroho suruk am fug ulug ebahon obogsoho fikfag suruk amuhubon halug, iniluk welamuhup-o, ulug Alkitab fam weregma yig nisaruk-o.

¹³ Eke At Kristus etno wene homali nit ninobam werehon etno At obam ombatebareg fam, it Yahudi aben wene duroho suruk amuk eke duroho suruk am fug ulug ebahon etnowen homali ninobam embebahon etno elehepfebag-o. Eke ari halug, at Alkitab etno fam yig nisaruk wilil, “At ap misig e fam lenggaloko werehon halug, homali etno obam wereg-o,” ulug yig nisarukon etno wereg halug, At Kristus etno ninake ariroho sebag.

¹⁴ Eke ariroho sebag arien, At Allahen Abraham etno amuk yig ituk wilil, “An nahien it aphe inobam umbuhuk-o,” ulug hurumbik yig epahon etno it ap Allah wene inapelehon epmano ahien inobam umbukag ulug At Kristus Yesus ariroho sebag-o. Eke At Allahen Roh Kudus og isahuk ulug abug yig isebahon etno nit At obam ebetuk aheon epmano og nisawag ulug At Kristus ebe ariroho sebag.

Wene duroho suruk amuk eke duroho suruk am fug ulug ebahon etno awan yig isaruk elegma At Allahen Abraham abug yig epag-o ulug yig isebahon 3:15-20

¹⁵ Nomini-o, an wene misig ap kweanmonen suruk etno ilitoho neken yig hisamin-o. It ap birenen ariroho suhuk ulug wene baltuk isalug, fobik at ap misihen wene urukukon etno anden suhuk fug ulug uk ari hai-o.

¹⁶ Eke amuk At Allahen Abraham etno yig ituk wilil, “Hat hetamu hinim ariroho hinombisahaku-o” ulug hurumbik yig epag etno, etamuki anggolo farim yig epag fug-o. We hetamu ebag ari, at misig Kristus etno farim ebag-o.

¹⁷ Eke wene ebe du farim yig hisihi-o, “At Allah Abraham inim wene baltuk wilil, hit fobik demat og hisahuk-o,” ulug yig ituk apagma, eke fobik empat ratus tiga puluh tahun welapareg, wene duroho suruk amuk eke duroho suruk am fug ulug ebahon etno iniluk apag-o. Eke ariroho iniluk apareg fam, At Allahen Abraham abug yig epahon etno elegsoho imbisebag eleg-o.

¹⁸ Eke wene duroho suruk amuk eke duroho suruk am fug ulug ebahon etno fam hinombisahakuk elepmen, demat og hisahuk ulug abug yig itlep fug-o. Ariroho yig itlep fuhon oke, eke demat og hisahuk ulug At Allahen Abraham abug yig epahon etno fam fobik ahien haruk wilil ilitoho og epag-o.

¹⁹ Eke ari halug, wene duroho suruk amuk eke duroho suruk am fug ulug ebahon etno nongge farim yig isebag-o? Eke ari, it apheyen dag surukon epmano du dag-o ulug bukal amag ulug yig isebag-o. Eke wene duroho suruk amuk eke duroho suruk am fug ebahon ari, at Abraham etamu abug yig epahon etno ebe awan waharuk eleg heheg yig isebag-o.

²⁰ Eke wene duroho suruk amuk eke duroho suruk am fug ulug ebahon etno it malaikaren at ap hirohowon etno belap irik wapagma, aren it aphe obog og isebag. Eke it ap wene baltukon epmano it femag fil eleg halug, ap hirohowon etno ebe bulmu wereg eleg-o. Eke At Allah etno ebe misig-at wereg-o.

Alem du niniluk amag ulug wene duroho suruk amuk eke duroho suruk am fug ebahon etno yig isebag-o ulug yig isebahon wene 3:21–4:7

²¹ Eke ari halug, wene duroho suruk amuk eke duroho suruk am fug ulug ebahon etno inim, eke At Allahen og hisahuk ulug abug yig nisebahon etno inim healeg neken wereg ano? Ari eleg-o. Eke komo yig nisebahon etno misig fam aphe niniluk amag ulug yig niselepmen, komo wene yig nisebahon etno ilitoho solomen etno fam alem dahon ninobam werehon epmano At Allahen elehepfelep-o.

²² Eke at Alkitab etnowen yig nisaruk wilil, “It yi aphe di aphe kweanmon obog dag-at suruk-o,” ulug yig nisaruk etno fam, it aphe At Yesus Kristus obam ebetukon etno At Allahen og hisahuk ulug abug yig nisebahon etno og isaruk-o.

²³ Eke At Yesus Kristus obam ebebukon etno ebe awan eleg heheg, wene duroho suruk amuk eke duroho suruk am fug ulug ebahon etno fam ninebe hele waroko neken ninombisaharisi-o. Eke At Yesus etno arat waharuk apagma, At obam ebebukon epmano arat selegma atisi-o.

²⁴ Eke ari halug, At Kristus etno awan waharuk eleg heheg, wene duroho suruk amuk eke duroho suruk am fug ulug ebahon etno nit yanggul nisarukon neken welatisi-o.

²⁵ Ariroho welatision oke, eke nit At Kristus obam ebetuk nisalug, alem dahon ninobam werehon epmano At Allahen elehepfukon etno aso wilil, nit yanggul nisarukon neken welatisi-o. Eke At Kristus obam ebebukon etno o ari sambit arat seg atisimu, at yanggul nisarukon etno fobik yanggul nisao sohorep isarisi-o.

²⁶ Eke At Kristus hinim wilil obam ebetuk ahep etno fam At Allah udaki-at welahep-o.

²⁷ Eke hit hinebe At Kristus hinim welamag ulug ikma belap hinaptusareg fam, At Kristus obabut fanowon etno holarikip-o.

²⁸ Eke ari halug, it Yahudi ap inim, eke it bilin Allah wene inapeleg welatuson epmano inim, eke it ap inanggimbu, iniknisi epmano inim, eke ap inim, hweap inim, it dahan fahan wereg eleg-o. Eke hit At Kristus Yesus hinim misig-at welahep etno fam obog ilitoho-at welahep-o.

²⁹ Eke hit hinebe At Kristusen angge welahep halug, at Abraham etamuki neken welahep-o. Eke hit at Abraham etamuki neken welahep halug, At Allahen og hisahuk ulug abug yig epahon etno hit-at og hisahu-o.