Filipi 4 - Allah Wene Hurumbik Keron

Hit duroho welamuk-o ulug yig isebahon wene 4:1-9

¹ Hit nomini nindi hunduhukon wai. Hit bik hisa wamon nahla buruk wilil, nahien hisaruk ahi-o. Eke hit hag Allah wene yig hisarikikon etno eberoko warikip-o, nomini. Eke At Ninowe awene etno waruk wilil, ariroho suk ulug yig hisihion etno ilitoho suruk wilil hinoag weregsoho suruk amuk-o.

² Eke hit Euodia, Sintikhe At Allahen yig nisaruk etno ilitoho hinindi misig-at wilil hit nehe hehe neken welamuk-o.

³ Eke hat nomin ninim Allah yabuk suruk atukukon etnowen it hweap biren eta yalmag inabin-o. Eke it hweap epmano inim, eke at Klemens inim, eke it nomini nin ninim Allah yabuk surukukon epmano iniluk welamag ulug At Allahen holal imbirision etno hit obog-at wene fano wene etno yig isil lawag ulug ninim yabuk sat anggolo surukuk-o.

⁴ Eke At Allahen og hisaruk etno fam hinindi hinahien haruk amuk-o. Eke hit hinindi hinahien haruk amag ulug misihim inim dahagsoho yig hisaruk ahi-o.

⁵ Eke it aphe obog hinune fanoroho-at yig isaruk amuk-o. At Ninowe wamon etno horog fanggog uruk-o.

⁶ Eke yi angge di angge epmano fam hinindi seneni ebebuk fug-o. Eke At Allah wa ulug yig ituk wilil, du angge og ninim-o ulug At Allah obam kino uruk wilil sembahyang uruk amiek-o.

⁷ Eke At Allah ninim dambuk ninabukon wene etno waruk ahe oke, nin ebebuk ninapeleg atukon etno At Allahen og nisarukmu, nit At Kristus Yesus obam ebetuk niseheg, ninindi etno inim, eke ninahla buruk aheon epmano inim At ninim healeg welaheon etnowen dahap suk nowen ulug fanoroho sen ninabuhu-o, nomini.

⁸ Eke yi angge di angge fanowon inim, eke ari suk fano ulug urukon etno inim, eke demat urukon etno inim eke fanoroho surukon etno inim eke motoho surukon etno inim eke sabele elehon etno inim eke ninindi hunduhuk welamon etno inim eke it apheyen ari fano ulug suontepfukon etno inim eke yi angge di angge arion-at huluog ulug hinindi ebetuk amuk-o.

⁹ Eke an nuneyen yig hisaruk wilil, dahan fahan seheg eleg ilitoho suruk atikik etno hag, hit ariroho yanggul hisaruk wilil yig hisarikikon etno dahan fahan seheg eleg ilitoho-at suruk amiek-o. Ariroho suruk hisalug, At Allah ninebe dambuk ninaptukon etno hinim welamuhup-o.

At Paulusen wa ulug yig isebahon wene 4:10-20

¹⁰ Eke At Ninowe etnowen naso weregma, nindi nahien anggolo haruk ahi-o. Eke hiren at Paulus fano welamag ulug yi angge di angge og imuk ulug hinahla birikibon epmano arat og nituk atikipmu, kidia selegma atisi-o. Eke bilin ariroho-at og nimuog ulug hinahla birikibon oke, hai atisi-o.

¹¹ Eke hit fanoroho naso welatikip fug ulug yig hisaruk ahi fug-o. Eke yi angge di angge epmano an erlog-at wereg-o ulug nahla bukon etno arat niluk atisi-o. Eke yi angge di angge eleg welamon etno inim, eke yi angge di angge obog anggolo werehon epmano inim, obog-at niluk atisi-o.

¹² Eke orom nin nahumsoho nenggeg, eke nin obok heheg surukon etno inim eke yi angge di angge anggolo welaheg, nin eleg aheg surukon etno inim obog-at niluk atisireg fam, nintul nantul an erlog-at wereg-o, ulug nahla buruk ahi-o.

¹³ Ariroho nahla buruk wilil, o ahik ya da epmano sil nuruk neyeheg, At Kristusen oag werehon etno og nitukmu, yi seheg di seheg noag weregsoho-at suruk ahi-o.

¹⁴ Ariroho suruk ahion oke, kidia an yi angge di angge epmano elegma, hiren yalmag naptikip ari fano-at sirikip-o.

¹⁵ Eke amuk wene fano wene etno yig isil laruk wilil, o Makedonia etno sohorep isalug larikikmu, hit Allah udaki o Filipi welahebon epmano hinakelehen-at yalmag naptikip etno hiniluk-o. Eke anden yi angge di angge og isawag ulug hiren og nitikip-o.

¹⁶ Eke an o Tesalonika wilil yi angge di angge elegma, hiren nintul nantul og nirik waharikip-o.

¹⁷ Eke an yi angge di angge heahil sil nuruk ahi fuhon oke, eke hiren og nitikip etno fam, it Filipi aphe anggen fanowon yihiruk ari, At Allahen onggo og isahu ari nahla buruk ahi-o.

¹⁸ Eke hiren nombaharikibon etno arat og nitisimu, kidia yi angge di angge obog-at wereg-o. Eke hiren yi angge di angge nombaharikibon epmano at Epafroditus etnowen og nirik waharisireg fam, kidia an naharek obog-at wereg-o. Eke hiren an nombaharikibon epmano ambusu amben fanowon neken At Allah ake ulug umburuk atikipseg fam, At Allah ahien hisahu-o.

¹⁹ Eke At Nikni Allah, yi angge di angge obog unde werehon etnowen At Kristus Yesus inuk fam Aren angge erlog-at og hisahu-o.

²⁰ Eke At Ninikni Allah inuk-at nintul nantul suontepfuruk amuhuk-o, ulug an demat yig hisaruk ahi-o.

At Paulusen holal atog umburuk wilil heahi war inapahon wene 4:21-23

²¹ Eke it Allah udaki At Yesus Kristusen angge etno obog-at heahi war inaptuk amuk-o. Eke it nomini duma ninim welaheon epmanowen heahi war hinaptuk-o.

²² Eke it Allah udaki duma werehon inim, eke it Kaisar omini nin epmano inimen heahi war hinaptuk-o.

²³ Eke At Ninowe Yesus Kristus etnowen hinabua hisaruk wilil hinim welamag ulug yig hisihi-o.