Filipi 3 - Allah Wene Hurumbik Keron

Hinindi fanoroho welamon etno wuog ulug suruk amuk-o ulug yig isebahon wene 3:1-11

¹ Nomini-o, At Ninowe etnowen hinindi hinahientep hisaharuk amag ulug yig hisihi-o. Eke bilin holal bal hisarikikon hinindi oag wereg amag ulug, fobik etno-at dahagsoho bal hisao ari fano at-o.

² Eke it ap dag surukon epmanowen yangge neken wilil, hiniyunggul ambilik balsaruk amiek-o, ulug urukon etno yaharoho welamiek-o.

³ Eke nit hag Roh Kudus etno fam At Allah inuk weheg, eke At Yesus Kristus ninim wilil ninahientoho welaheg suruk ahe fam nit hag niniyunggul ambilik baleg neken welahe-o. Eke it iniyunggul ambilik balehon epmano inenggal-at wereg-o. Eke nit hag yi angge di angge nininggiken surukon epmano fam ninili wahu fug buruk ahe-o.

⁴ Eke it epmano dorat suruson oke, an hag ninggiken surukon epmano fam ninili welepmen, yi angge di angge anggolo suruk atikik epmano fam nili wahu ulug nahla bele-o. Eke an nebe sembahyang misig-at endoho weregma, niyunggul ambilik bal napag-o.

⁵ Eke an nebe Israel ap-at endag atuk seyag-o. Eke an nungguluag Benyaminon wilil, nebe Ibrani ap welahi-o. Eke it Yahudi aben wene duroho suruk amuk eke duroho suruk am fug ulug ebahon etno fam an nebe Farisi ap welatikik-o.

⁶ Ariroho wilil, it Allah udakion epmano mondog-at war inabiog ulug naborali elegsoho-at suruk atikik-o. Eke it wene duroho suruk amuk eke duroho suruk am fug ulug ebahon ilitoho surukon etno fano welatlepmen, an wene ari obog-at nesanggo holtikikseg fam nebe mondog fano-at welatle-o.

⁷ Ariroho welatleon oke, eke bilin yi angge di angge duma fam ninili wahu ulug nahla birikikon etno At Kristus inuk fam sohorep isarikik-o.

⁸ Eke At Ninowe Yesus Kristus ninim wilil At ebe niluk welahion etno ari-at fano ulug nahla buruk ahi-o. Eke yi angge di angge ninon obog doron-at ulug At Kristus inuk fam hik isarikik-o. Eke ariroho hik isaruk atikikseg, At Kristus ninim dambuksoho welamon etno-at huliog ulug nahla buruk ahi-o. Eke wene duroho suruk amuk eke duroho suruk am fug ulug ebahon etno it apheyen inesanggo holtug,

⁹ an nebe fanowon-at welahi-o, ulug uruk etno hag, an nonggarehen nebe fanowon welahi ulug uruk ahi fug-o. Eke ariroho uruk eleg wilil, At Kristus inuk eberoko warikik etno fam At Allahen an nindi fanoroho welamon etno og nitisimu, At Kristus inuk fam an fanowon welahi-o ulug uruk ahi-o.

¹⁰ Eke At Kristus ebe niluk welamon etno inim, eke At ebe iluk atlug minapareg fam oag werehon og nisawon etno inim, eke At obam dahon umburusa etno hag an nobam umbukon etno inim,

¹¹ eke At ebe warapag etno hag, nindi dahon waramon etno inim, huliog ulug nahla buruk ahi-o. Ariroho nahla buruk wilil, eke niluk atlug nindi fanowon minamon etno inim huliog ulug nahla buruk ahi-o.

An fanowon etno huliog ulug laruk ahi-o ulug yig isebahon wene 3:12-21

¹² Nomini-o, anden fanowon etno arat holarikik ulug suontepataruk wilil uruk ahi fug-o. Eke At Kristus Yesus etnowen nili wiog ulug nebe og naplug waharisi etno fam, an fanowon etno huliog ulug suruk ahi-o.

¹³ Nomini-o, eke anden fanowon etno arat holarikik ulug uruk ahi fug-o. Eke misig suruk ahi ari, yi angge di angge nambolma werehon epmano napelegsoho sohorep isalug, fanowon nolohotma werehon etno hag huliog ulug suruk ahi-o.

¹⁴ Ariroho suruk wilil, onggo fanowon etno huliog ulug bikit-at laruk ahi-o. Ariroho laruk ahi ari, At Allahen onggo fanowon etno og hisahuk ulug wol nisaruk etno fam laruk ahi-o. Eke onggo fanowon ari, At Kristus Yesus ninonggo balfag etno fam boholmen ninim niniluk welamon etno og nisahu-o.

¹⁵ Eke anden yig hisihi etno hag, hit obog Allah wene fanoroho waruk ahebon epmano hinobabut arion-at welamuk-o. Eke hinobabut ninon welahebon halug, At Allahen dindiloko yanggul hisahu-o.

¹⁶ Ariroho yanggul hisahuon oke, eke bilin Allah wene etno fam motoho larukuk etno hag, fobik ilitoho-at lahuk ari fano at-o, nomini.

¹⁷ Ari halug, hit an nahengga senetuk amiek-o. Eke hit obog an mug naplug fobik lawag ulug an bilin larikik-o. Eke it an ilitoho larukon ari hinil og inabiek-o.

¹⁸ Eke bilin nintul nantul yig hisaruk atikikon epmano ioba yatuk wilil kidia dahagsoho yig hisamin-o. Eke it nin inobabut dahan fahan suruk wilil, At Kristus nit ninake e fam lenggaloko warepfebahon etno inim healeg neken wereg-o.

¹⁹ Eke it epmano fobik o dagma lahup-o. Eke it inikni suon neken inahum-at wereg-o. Eke it yi angge di angge inenggali haon epmano fam suontepataruk-o. Eke it yi angge di angge kweanmon epmano-at inahla buruk-o.

²⁰ Eke it ariroho suruk oke, eke nit hag boholma lahuk ulug welahe-o. Eke At Ninowe Yesus Kristus ninili warukon etno boholmen ambik waruhu ulug aso welahe-o.

²¹ Eke Aren nit ninebe waratuk aheon olohore nintoho seko umbulug, At ebe fanowon itog mondog werehon etno-at ilitoho seko ninombisahaku-o. Eke Aren yi angge di angge obog at apmarepatarukon halug, at oag wereg etno fam ninebe ketoho ninombisahaku-o.