Filipi 2 - Allah Wene Hurumbik Keron

At Kristus ap suon-at oke seberepatarisi-o ulug yig isebahon wene 2:1-11

¹ Eke At Kristus hinim welahep etno fam hinindi oag wereg atuk ano? Eke hinindi hunduhuk welahep ari fam, hinindi fano atuk ahep ano? Eke At Roh Kudus hinindimu weregma, hinim welahep ano? Eke it hinomini inabua isaruk wilil, hinim hinindi hunduhuk welahep ano?

² Eke ari fam hinindi misig-at ebereheg, eke it hinomini hinim hinindi misig-at hunduhuk welaheg, eke hinobabut misig-at welaheg suruk hisalug, an nindi nahien hisahuk-o.

³ Eke hiren uruk wilil, an nebe suon-at welaruhuk-o, ulug hinonggarehen suontepataruk wilil, suruk am fug-o. Eke nomini du fano wereg heheg, an dag welahi-o ulug it hinomini inil fam seberepataruk amiek-o.

⁴ Eke an neyabuk-at sik-o, ulug hinahla buruk eleg wilil, it hinomini ineyabuk yalmag inaptuk amiek-o.

⁵ Eke At Kristus Yesusen suruk apag etno hag, hit hinobabut ilitoho-at suruk amiek-o.

⁶ Eke At Kristus ari Allah ebe neken-at wilil, an Allah ilitoho welamon etno nomat neken senetuk ahe-o, ulug indi ebepag fug-o.

⁷ Ariroho ebetuk eleg wilil, onggareg ahla buruk atlug, At ebe suon welamon etno sohorep isalug, At ebe onggarehen kimburepatarisireg, ap ilitoho seg atisi-o.

⁸ Ap ilitoho seg atisi ari, onggarehen seberepatalug, At Ikni une etno esanggo holtuk wilil, e fam lenggaloko nowabukag ulug At ebe etno onggarehen dorontepatarisi-o.

⁹ Ariroho dorontepatarisireg fam, At Allahen inuk mondog suontepfuruk wilil, At akeleg-at suon welamag ulug minduhupfirisi-o.

¹⁰ Ariroho minduhupfirisireg fam, it o boholmon inim eke it kweanmon inim eke it kwean apmon inimen At Yesus inuk suontepfuog ulug inindibahal kunuk uhup-o.

¹¹ Kunuk uruk amuhupseg, it yi aphe di aphe obohen At Ninikni Allah inuk su amag ulug uruk wilil, “Nit Ninowe At Yesus Kristus-at wereg-o,” ulug selegma-at uruk amuhup-o.

Hit o kweanma eral fisaho neken welamuk ulug yig isebahon wene 2:12-18

¹² Nomini nindi hunduhukon wai. An hit ninim weregma nune holtuk atikip etno hag, kidia nebe yatma welahi oke, nune holtuk amuk-o. Eke hinili wawon etno huluog ulug hinakoltoho suruk amiek-o.

¹³ Ariroho suruk hiseheg, At Allahen ariroho suruk amuhup ulug yig hisebahon hinahien haruk wilil ilitoho sukon etno nintul nantul og hisaruk-o.

¹⁴ Eke hiren yi angge di angge suruk wilil, nambit eheg, eke winimug neken abeheg, uk ari sohorep isalug, yamintal neken suruk elehon inim, eke apheyen hinobam denggeltuk elehon inim hit hinebe arion-at welamuk-o.

¹⁵ Eke hit ariroho suruk ahebon etno At Allah udaki oke, it aphe yuhun-at wilil dahan fahan surukon epmano inanggelegma welahep-o. Eke hit ariroho inanggelegma wilil, wene iniluk amon etno yig isaruk hisalug, soholoal boholma werehon oke yangguk atuk etno hag, hit epmano eral fisaho neken inanggelegma welamuk-o. Ariroho wereg hisalug, At Kristus waruhu etno sambit an nahien hahuk-o;

¹⁶ eke ariroho nahien haruk wilil, an o kweanmen yabuk sat anggolo suruk wilil werlek-at suruk atikik fug-o, ulug nahla buhuk-o.

¹⁷ Eke an neyabuk atog neken hit hinake Allah wene yig hisaruk atikikon epmano At Allah il fam eberoko waruk ahep-o. Eke fobik atog neken an namep etno hit hinake del atuk halug ari fano at-o. Ariroho suruk aruhukseg, nahien hahuk-o.

¹⁸ Hahuk ari hit ninim-at obog ninahien hahuk-o. Eke hit ariroho-at hinahien haruk wilil, yig nituk amuhupseg, nit obog ninahien hahuk-o.

It Timotius Epafroditus hinambeg lahap isa waruhuk-o ulug yig isebahon wene 2:19-30

¹⁹ Eke At Ninowe Yesusen fano-at uruk halug, at Timotius etno sono hao lahapfik waruhuk-o. Lahapfik waruhukmu, fobik suhuluk nambeg lahureg, nindi nahien hawag ulug it Filipi ap epmano fano wereg ulug yig niruhu-o.

²⁰ Eke at Timotius etno an ninim ninindi misig-at welahe etna hit hineyabuk fanoroho-at suhu-o.

²¹ Eke it yi aphe di aphe epmanowen inonggareg ineyabuk sukon inahla burukon oke, At Yesus Kristus eyabuk sukon etno hag inahla buruk eleg-o.

²² Eke at Timotius etnowen yabuk fanoroho sirisi etno hit hiniluk-o. Eke at inim, an ninim ikni amloho neken wilil, wene fano wene yig isawon etno ninim dambuksoho urukuk etno hiniluk-o.

²³ Eke ari fam, an keroho welaruhuk ulug niluk atuk aruhukseg, at Timotius etno dulum-at lahapfik waruhuk-o.

²⁴ Eke At Ninowe etnowen fano-at uruk halug an nebe-at bik hisa waruhuk nahla buruk ahi-o.

²⁵ Eke at ninomin Epafroditus etno inim-at lahapfik wariog ulug nahla birikik-o.

²⁶ Eke at Epafroditus etno ninim yabuk sat anggoloroho suruk atukukmu, eke hiren an yalmag nabuog ulug nambeg lahapfik waharikip-o. Eke at Epafroditus etno hit obog bik hisiog ulug indi ebetukmu, eke hiren at Epafroditus uk wareg ulug hinesanggo holtikip etno fam, it keroho inahla buhup ulug indi seneni ebetuk-o.

²⁷ Eke at ebe demat uk waruk wilil, warariog ulug sirision oke, At Allahen abua harisi-o. Ariroho abua harisireg, an inim-at nabua harisi-o. Eke at Epafroditus uk wareg welatisireg, iluk atisi etno fam, inim-at nabua ha-o.

²⁸ Eke ari halug, at ebe hinambeg lahapfik wariog ulug nahla buruk ahi-o. Eke fobik hinambeg waharuk aruhumu, at ebe hinilanggen halug hinahien hahup-o. Hinahien hahup ari fam, an nindi dag atision etno fano aruhu-o.

²⁹ Eke ari halug, hit hinahien haruk wilil, at ninomin ninim Allah wene waruk aheon etno waha-o, ulug heahi wabuhup-o. Eke it ap nin at ebe ilitoho halug, du ap fanowon at-o, ulug ininuk suontepfuruk amuk-o.

³⁰ Eke hiren an yalmag naplebon oke, hit hinebe yatma werehen at Epafroditus etnowen yalmag nabiog ulug suruk wilil, at waramon ahlahiroho welatisi etno fam, at Kristus eyabuk suruk wilil, horog warariog ulug sirisi-o.