Filemon 1 - Allah Wene Hurumbik Keron

1:1-3

^1-2 An Paulus At Yesus Kristus awene yig isil larikikseg fam hele war naptuson etno inim, eke at ninomin Timotius etno inimen, hat ninomin Filemon ninim Allah yabuk suruk aheon etno inim, eke it aphe Allah wene warukon hat hambeg nintul nantul sembahyang ik waharukon epmano inim, eke at ninahaloho inuk Apfia etno inim, eke at Arkhipus, wim aptuk etno ilitoho At Yesus Kristus awene yig isil nurukon etno inim,

³ hit obog At Ninikni Allah inim eke At Ninowe Yesus Kristus etno inimen hinabua hisaruk wilil, hinim dambuksoho welamag ulug wene ari yig hisi­hi-o.

Wa ulug sembahyang ebahon wene 1:4-7

⁴ Nomin Filemon wai. An nintul nantul sembahyang uruk wilil, hat hake eheg, eke Nikni Allah hat farim wa yig ereheg suruk ahi-o.

⁵ Eke hat it Allah udaki obog hinim hindi hunduhuk wilil, At Ninowe Yesus obam demat ulug ebetuk ahen etno nesang­go holtikik-o.

⁶ Eke hit obog Allah wene waruk ahebon epmano ninim ninindi misig-at wilil dambuksoho welamuhuken ulug, At Kristus ninim wilil Aren yi angge di angge fanowon epmano og nisarukmu nit obohen fanoroho At obam ebebuhuken ulug sembahy­ang uruk ahi-o.

⁷ Eke ari halug, nomin nindi hunduhukon wai. Hat it Allah udaki obog hinim hindi hunduhuk wilil, haren inin­di fano inaptuk ahenon etno nesanggo holtikikseg, nahien anggo­lo haruk wilil, nonggarehen nindi oag werehepatarikik-o.

At Paulusen Onesimus farim Filemon yig epahon wene 1:8-22

⁸ Ari halug, anden At Kristus inuk fam ariroho siuk ulug yig hetleon oke,

⁹ eke hat ninim nindi hunduhuk wilil, we hinog neken yig hituk ahi-o. Eke an Paulus At Yesus Kristus awene yig isarukmu hele war naptuson epmanowen hinog bilin irikikon etno farim yig hituk ahi-o.

¹⁰ Eke at Onesimus etno an hele wareg wilil Allah wene yig itikikseg, namloho neken endag sarikikon etno farim yig hituk ahi-o.

¹¹ Eke at Onesimus etno bilin hat hanggimbu dahon-at welatision oke, eke kidia hat inim, an inim ninanggimbu fanoroho werehon etno iog suhuluk hat hambeg lahap­fik waharuk ahi-o.

¹² Eke at ebe lahapfik waharuk wilil, nindi hunduhuk heheg-at lahapfik waharuk ahi-o.

¹³ Eke an Allah wene yig isarukmu hele war naptuson etno hat hubulukmu yalmag nabukag ulug, hat Onesimus duma welamin ulug yig etleon oke,

¹⁴ eke hat Filemon ariroho miming habuk ari nambit-o. Hat hakelehen hahla bulug-at yig num ari fano-o. Eke haren fano ulug uruk eleg healug, anden hat duma wela­min yig isaruk ahi fug-o.

¹⁵ Eke at Onesimus etno inggik dorat hinim welatikip fug ari, fobik mon­dog mondog hinim welamuhuben bilin wilip atisi ano?

¹⁶ Eke at ebe kidia iog suhuluk hambeg waharuk ari, haren an nanggimbu at-o ulug hahla buruk am fug-o. At ebe Kristus awene warisireg fam an nomin neken-at wereg-o, ulug hahla buruk amin-o. Eke at ebe an nomin-at heheg, hat hag ap du an nanggimbu-at oke, Allah wene warisireg fam nomin-at wereg-o, ulug hahla buruk wilil, hinim hindi hunduhuk welamin-o.

¹⁷ Eke ari halug, an nebe nomin ulug heahi war naptuk ahen etno ilito­ho, at ebe heahi waroko hibam hinim welamuk-o.

¹⁸ Eke at ebe haren angge yi angge di angge heragsalug obam nomat neken wereg halug, an nobam nomat neken wereg-o.

¹⁹ Eke an ninggik fam holal baltuk wilil, onggo an Paulusen umbuhuk-o, ulug yig hituk ahi-o. Eke anden hat hili warikikseg fam nomat neken hobam wereg ari anden yig hum ari hai-o. Hat-at hiluk-o.

²⁰ Ari halug nomin-o. At Allah inuk fam hinog yig hirihion etno ilito­ho siuk-o. Eke hat an ninim At Kristus awene waruk ahe etno fam an nahien hawag ulug hat nominen ariroho siuk-o.

²¹ Eke an hinog yig hirihion etno aren ilitoho suhu ulug nahla buruk wilil, holal du bal hirihi-o. Eke yig hirihion etno inim, eke nin yig hituk ahi fuhon inim suhun ari an niluk-o.

²² Eke misig ari, an noho­ruk ambeg nibam baharik misig fikfag hal naptuk amin-o. Eke hiren an nake sembahyang uruk ahep etno At Allahen esanggo holtug an nebe suhuluk hit hinambeg lahap nabik wamag ulug sembahyang uruk ahi-o.

Atog fam wa ulug yig isebahon wene 1:23-25

²³ Eke at Epafras etnowen Kris­tus Yesus awene yig isarukmu ninim hele war ninaptuson etnowen heahi war haptuk-o.

²⁴ Eke it nomini ninim yabuk suruk aheon epmano, at Markus inim, eke at Aristarkhus inim, eke at Demas inim, eke at Lukas inim, it obohen heahi war haptuk-o.

²⁵ Eke Ninowe Yesus Kris­tus etnowen hinabua hisaruk wilil, Aren hit obog hinim welamag ulug yig hirihi-o.