Efesus 5 - Allah Wene Hurumbik Keron

Hit o seleg udaki wereg etno hag welamuk-o ulug yig isebahon wene 5:1-20

¹ Eke hit At Allah udaki indi hunduhukon epmano At ilitoho welamuog ulug nintul nantul mutlug laruk amiek-o.

² Eke At Kristus nit ninobam indi hunduhuk welapag etno hag, hit hit hinindi hunduhuk welamuk-o. Eke At Kristus ari nit ninake warariog ulug onggarehen imig saruk wilil, At Allah ahien hawag ulug At ebe fanowon etno Allah ake atisi-o.

³ Eke hit Allah udaki welahep halug, wanggik surukon etno inim, suk sohorep isawon surukon etno inim, eke yi angge di angge an-at hulik ulug urukon epmano inim, eke hinune mirlog uruk ahebon etno inim, eke aik dahog urukon etno inim, eke nenek neken urukon etno inim, obog-at hit hinanggelegmen suk hai-o.

⁴ Hiren At Allah akeleg-at wa ulug yig ituk amuk-o.

⁵ Eke alem misig du inim yig hisamin-o, it wanggik surukon etno inim, eke it fano suk sohorep isawon surukon etno inim, eke it yi angge di angge an-at hulik ulug uruk wilil, it inaharek ninamonggat ulug suontepfurukon etno inim it obog-at At Kristus Allah inim weregma kuhup fug-o.

⁶ Eke ap misihen enggal yig hisaruk wilil, hinindi kahalik wam nowen-o. Eke it aphe Allah wene inesanggo holtuk eleg wilil, inenggal urukon epmano At Allahen asine inobam umbuhu-o.

⁷ Eke ari halug, it aphe inenggal urukon ari hinim welam fug-o.

⁸ Eke hit bilin o hikmu welatikibon oke, At Ninowe udaki atikipseg, o selegma-at welahep-o. Eke ariroho wilil, at o seleg udaki wereg etno hag welamuk-o.

⁹ Eke o seleg ari, At Roh Kudus etnowen yi angge di angge fanoroho surukon inim, eke hinobabut motoho surukon etno inim, eke demat wene urukon etno inim obog-at yanggul hisaruk-o.

¹⁰ Eke hit At Allah ahien hawon etno-at suog ulug hinahla buruk amuk-o.

¹¹ Eke it aphe o hikmu wilil, yi angge di angge ebe elehon surukon etno hinim welam fug-o. Eke it o hikmuen surukon epmano o seleg etno fam inaren balepfuruk amuhukseg, dag sehep ulug yig isaruk amuk-o.

¹² Eke iren herako surukon epmano anden selegma uk ari nenggali-o.

¹³ Eke herako surukon ari selegmaroho umburuk atlug du dahon ulug bukal atuk-o.

¹⁴ Eke yi wene di wene bukaloko yig nisarukon ari o seleg etno ilitoho wereg-o. Eke ari fam Alkitab etnowen yig nisaruk wilil, “Hat nohoruk ahen du hiluk amin-o. Hiluk atlug it warehon wereg ambeg eke warehon neken welamon etno sohorep isalug, hiluksoho minamin-o.

¹⁵ Ariroho minatlug wereg healug, At Kristusen selegma hombahaku-o,” ulug ariroho Alkitab fam weregma, hiren ninobabut keroho welamuk ulug hinindi fikfag ebetuk amiek-o. Hit it ap inapelehon wereg etno hag welam fug-o. It ap inindi inilukon wereg etno hag welamuk-o.

¹⁶ Eke o kidia hag it aphe dag anggolo suruk ari famen, hit nintul nantul fanoroho sukon etno o ke sambit suhuk ulug hinindimu fanoroho ebet halug, suruk amiek-o.

¹⁷ Eke ari halug, urunangge neken welamon etno sohorep isalug, anden suruk amag ulug At Allahen keroho yig nituk-o, ulug hinindi ebetuk amuk-o.

¹⁸ Eke hit hinebe nenek suruk wilil, uk olokon hinobam ombatehep ha nowen e anggur ambusu etno donggogsoho na fug-o. At Roh Kudus etno-at hinindimu kelegsoho welam ari fano-o.

¹⁹ Eke hit hit wilil, mazmur alem inim, enggangga inim eke i-u inim fanoroho uruk amuk-o. Eke hinindimuen Ninowe wa ulug At ake di etno uruk amuk-o.

²⁰ Eke At Ninowe Yesus Kristus inuk fam sembahyang uruk wilil, yi angge di angge obog epmano farim Ninikni Allah wa ulug yig ituk amuk-o.

It ap inuhwesi inim ariroho welamuk ulug yig isebahon 5:21-33

²¹ Eke hit obog-at Kristus hinakoltoho welahebon epmano hit hit napma hapma wilil seberoho welamuk-o.

²² Eke hit hweap ari, At Ninowe apma welahep etno hag, hinahuni inapma welamuk-o.

²³ Eke At Kristus At udaki At ebe neken werehon epmano inili og inapareg fam, At etno it inungguluag neken wereg etno hag, at hwe etno ungguluag neken ahun-at wereg-o.

²⁴ Eke it Allah udaki epmanowen At Kristus une inesanggo holtuk etno hag, it hweap epmano inahuni inune holtuk amag-o.

²⁵ Eke At Kristus etno At udaki indi hunduhuk welapag etno hag, hit aben hinuhwesi hinindi hunduhuk welamuk-o. Eke At Kristus ari At udaki inake warapareg fam,

²⁶ it inebe ik etno fam ho inaptuk apareg, At Allah udaki inakeleg-at welamag ulug At awene etno yig isaruk wilil inakeleg-at fuloko imbisebag-o.

²⁷ Ariroho inakeleg-at imbisebareg fam, At udaki epmano dag seheg eleg fano mondog welamag ulug endag inapag-o.

²⁸ Eke ari halug, it ap epmano inonggarehen inaso wereg etno hag, inuhwesi inindi hunduhuk welamag-o. Eke ap misig uhwe indi hunduhuk wereg halug, onggareg aso neken wereg-o.

²⁹ Eke it aphe inebe epmano inonggarehen inambit hun saruk eleg wilil, inaharom nenggeg, eke onggarehen fanoroho aso welaheg suruk-o. Eke At Kristus etno At udaki ariroho inaso wereg-o.

³⁰ Eke At Kristus ebe etno nit-at welahe-o.

³¹ Ari halug, Alkitab etnowen duroho yig nisaruk-o, “Alem ari fam at ap misig ikni isina sohorep isalug, uhwe inim dambuksoho wilil, inebe biren oke, misig-at neken welamuhup-o,” ulug Alkitab fam ariroho weregma,

³² demat ulug yig nisaruk-o. Eke Alkitab fam yig nisarukon ari At Kristus udaki inim dambuksoho welamon etno farim yig nisaruk buruk ahi-o.

³³ Eke ariroho yig nisaruk oke, eke hit ariroho welamon etno inim-at yig hisaruk-o, eke ari halug, it aben inonggareg inaso wereg etno hag inuhwesi inindi hunduhuk welamag-o, eke it hweaben inahuni inune holtuk amag-o.