Efesus 3 - Allah Wene Hurumbik Keron

Hit Allah wene hinapeleg welatikibon epmano hineyabuk suruk ahi-o ulug yig isebahon wene 3:1-13

¹ Eke an Paulus At Kristus Yesus awene etno hit aphe bilin Allah wene hinapeleg welatikibon epmano yig hisaruk atikikseg, an nebe hele wareg wilil, At Allah obam sembahyang uruk ahi-o.

² Eke At Allahen nabua nearuk wilil, hit hinake yabuk sukag ulug minduhup naharisi etno arat hinesanggo holtikip-o.

³ Eke wene bilin ninapeleg welapahon etno an niluk amag ulug At Allahen selegmaroho yig nitisi-o. Eke ariroho yig nitision ari arat holal fam bal hisihion ari hit wane suruk amuhupseg, wi,

⁴ at Paulusen Kristus awene heraho welapahon etno duroho yanggul nisarisi-o ulug hinahla buhup-o.

⁵ Eke o amuk wene heraho welapahon etno aphe yig isebag fug oke, kidia At Allahen Roh Kudus etno fam it At awene yig isil lawag ulug mondep isebahon epmano inim, eke it nabi epmano inim bukaloko yig isarisi-o.

⁶ Eke wene misig heraho welapahon bukaloko yig isarision etno duroho yig isarisi-o, bilin it Yahudi ap At Allah ahien inobam embebahon oke, kidia wene fano wene yig isil lawon etno fam it bilin Allah wene inapeleg welatuson epmano inim-at ahien inobam umburuk-o.

⁷ Eke an wene yig isil lawag ulug noag weregsoho nombaharisireg, og nitisi etno fam wene fano wene etno anggimbu neken welahi-o.

⁸ Eke an nebe it Allah udaki epmano inahla mondog doron-at seberoho welahion oke, it Allah wene inapeleg welatuson epmano wene fano wene yig isil lawag ulug minduhup naharisi-o. Eke anden yig isaruk wilil,

⁹ “At Kristusen yi angge di angge fanowon obog-at og nisaruk-o,” ulug yig isaruk wilil, At Allahen ariroho suhuk ulug wene heraho welapahon etno kidia ilitoho suruk-o ulug it aphe obog demat inahla buruk wilil, inindi ebebukag ulug yig isaruk ahi-o.

¹⁰ Eke At Allah yi angge di angge obog wal hebahon etno bilin wene du heraho welamag ulug dugsoho embebahon oke, eke kidia At awene warukon epmanowen it malaikat inim, eke it inowesi boholmon inim, At Allah yiroho diroho suruk ilukon etnowen ahla buruk atlug, duroho suruk-o, ulug iren iniluk amag ulug yig isaruk-o.

¹¹ Eke At Allahen ariroho suhuk ulug o kweanma awan wal haruk eleg wilil ahla buruk apareg, At Ninowe Kristus Yesus lahapfik wapag etno fam, At ahla bebahon epmano obog ilitoho-at sebag-o.

¹² Eke nit At Kristus ninim wilil, At obam ebetuk nisalug, ninakol elegsoho wilil At Allah apma waharuk ahe-o.

¹³ Eke an hit hinake dahon nobam umburukon ari hinesanggo holtug hinindi oag eleg am fug-o, ulug yig hisaruk ahi-o. Eke hit hinil nealug hinoag weregsoho welamag ulug ariroho welahi-o.

At Kristus etno nit ninobam indi hunduhuk wereg-o ulug yig isebahon wene 3:14-21

^14-15 Eke ari halug, At Ninowe Yesus Kristus Ikni, nit boholmon inim, kweanmon inim obog ninungguluag inuk soal ninaptukon etno il fam nindibahal yungguksoho wilil, At obam sembahyang uruk ahi-o.

¹⁶ Eke At Allah suon yi angge di angge obog unde werehon etnowen Aren angge Roh Kudus etno fam hinindi oag werehep hisahakeg,

¹⁷ eke At Kristus obam ebetuk hisalug, At ebe hinindimu welaheg suruk amag ulug an sembahyang uruk ahi-o.

¹⁸ Eke hit Allah inim, aphe inim hinindi hunduhuk welaheg, eke At Allah udaki obog hinimen At Kristus hinobam indi hunduhuk werehon etno Aren yabuk suon-at sirisi-o, ulug obam hinindi ebereheg suruk amag ulug an sembahyang uruk ahi-o.

¹⁹ Eke At Kristusen ninobam indi hunduhuk werehon etno niren obogsoho ebebuk fug oke, obog-at hiniluk am ari fano-o. Ariroho hiniluk wereg hisalug, At Allahen hinim welamon etno hinindimu kelegsoho-at og hisahu-o.

²⁰ Eke At Allah ninindi yabuk oag weregsoho surukon etno niren kino uruk wilil obam sembahyang uruk nisalug, niren ninindi ebetuk aheon epmano obam seberoho og nisiog ulug ahla buruk-o.

²¹ Eke ari halug, it obog At Kristus Yesus inuk waruk wilil, At udaki neken werehon epmanowen At Allah inuk-at nintul nantul suontepfuruk amag ulug an demat yig hisihi-o.