Efesus 2 - Allah Wene Hurumbik Keron

Nit warehon neken weregma At Allahen niniluksoho minduhup nisaharisi-o ulug yig isebahon wene 2:1-10

¹ Eke hiren bilin yi dag di dag suruk wilil, hinebe warehon neken-at welatikip-o.

² Eke it kweanmonen suruk etno hag dag suruk wilil, it dag surukon inahurangge une etno hinesanggo holtikip-o. Eke it inowe ari kidia it aphe Allah wene holtuk elehon epmano inowe-at wereg-o.

³ Eke bilin Allah wene ninapeleg wilil, ninim ilitoho-at welatukuk-o. Ariroho wilil, ninakelehen yuhun-at seheg, eke ninebe kweanmon-at wilil ariroho suk ulug ninahla buruk atukukon epmano-at seheg suruk atukuk-o.

⁴ Ariroho suruk nisalug, At Allah asine ninobam umburuk heheg welatukuk-o.

⁵ Eke nit ariroho Allah wene ninesanggo holtuk eleg wilil ninebe warehon neken welatukukon oke, At Allah nit ninobam indi hunduhuk wilil ahmu nisaruk apareg fam, At Kristus ninim niniluksoho minduhup nisaharisi-o. Eke At Allahen hinabua hisaruk etno fam hinili warisi-o.

⁶ Eke nit At Kristus Yesus ninim dambuksoho ninombisaharuk atisireg, nit At Kristus ninim boholmen suon welamag ulug minduhup nisaharisi-o.

⁷ Eke At Yesus Kristus etno og nisaruk wilil, At Allahen An nindi hinobam hunduhuk wilil hinabua hisaruk ahi-o ulug selegmaroho yig nisarision etno it yi aphe di aphe fobik welamuhubon epmanowen At Allahen demat anggolo og nisaruk-o, ulug inahla bukag ulug yig nisarisi-o.

⁸ Eke At Allahen hinabua hisebareg fam hit demat ulug eberoko warukmu hinili warisi-o. Eke hit fano suruk hisalug, hinili warisi fug-o. We yuhun-at hinili warukon etno og hisarisi-o.

⁹ Eke hinili wawon etno niren suruk atukukon epmano og nisarisi ulug suontepata fug-o. Hiren fanoroho suruk ahep ulug og hisarisi fug-o.

¹⁰ Eke At Allahen ninebe wal haruk apareg, fobik At Kristus Yesus ninim dambuk ninapareg fam, niren fanoroho sukag ulug ninebe ninindi inim keron wal harisi-o. Eke nit ariroho ninobabut fano welamag ulug Aren-at fuloko ninombisahabag-o.

At Kristusen dambuk ninaptuk-o ulug yig isebahon wene 2:11-22

¹¹ Eke hit hinebe Allah wene hinapeleg wilil endag apahon epmano it Yahudi aben ininggiken surukon epmano fam, nit hag niniyunggul ambilik balehon welahe-o, eke hit hag hiniyunggul ambilik baleg elehon welahep-o ulug yig hisebahon etno hit bilin keroho welatukuk ulug hinahla ebetuk amiek-o.

¹² Eke hit bilin At Kristus hinim welatikip fug-o. Eke hinebe huso neken wilil, At Allah udaki imig inapahon epmano hinim welatikip fug-o. Eke At Allahen At udaki yig isaruk wilil, fanowon etno demat og hisahuk ulug abug yig isebag etno hit hag yig hisebag fug-o. Eke hiren fanowon etno og nisahu ulug hinahla buruk eleg wilil, o kweanma duma Allah hinim welatikip fug-o.

¹³ Eke bilin ariroho wilil, yatma neken welatikibon oke, At Kristus Yesus hinim dambuksoho hinombisahukag ulug At Kristus amep deloko umbulug warapareg fam, kidia hinebe horog-at neken welahep-o.

¹⁴ Eke At Kristusen it Yahudi ap inim, eke it Allah wene inapeleg welatuson epmano inim it inebe misig-at welamag ulug imbisaruk wilil, ninebe obog-at dambuk ninaptisi-o. Eke At ebe etno waratuk wilil, o hobat neken huli baloko werehon etno mialoko imbirisireg fam, it bilin healeg welatuson epmano dambuk inaptisi-o.

¹⁵ Eke it Yahudi aben wene duroho suruk amuk eke duroho suruk am fug ulug komo yig isebahon etno elegsoho umburuk atisireg, it inungguluag biren neken welatuson epmano misig-at welamag ulug wal haruk wilil, it inim At inim dambuk atusa-o.

¹⁶ Eke At Kristus etno e fam lenggaloko embebagma warapag etno fam it apheyen nambit hambit uruk amon etno elegsoho embebag-o. Eke e salib etno fam it inungguluag birenon epmano misig-at welamag ulug At Allah inim dambuksoho imbisebag-o.

¹⁷ Eke ariroho suruk apareg fam, At Kristus etno waharuk apareg, wene fano wene dambuk ninabukon etno it aphe obog-at yig isa wapag-o. Ariroho yig isa wapag ari, hit bilin Allah wene hinapeleg wilil, At Allah hinim yatma neken welatikibon epmano inim, eke it Yahudi ap At Allah inim horogsoho welatuson epmano inim obog-at yig hisa wapag-o.

¹⁸ Eke At Kristusen ariroho yig nisa wapareg fam, nit obog-at it Yahudi inim, eke hit Allah wene hinapeleg welatikibon inim, Roh Kudus misig etno-at ninindimu kurukmu, At Ninikni Allah misig-at obam ebetuk ahe-o.

¹⁹ Eke ari halug, hit Allah wene hinapeleg welatikibon epmano kidia huso neken welahep fug-o. At Allah udaki hinim hinungguluag misig-at welahep-o. Eke At Allah udaki epmano hinim o yuwi misig-at neken welahep-o. Eke it Allah wene hurumbik yig isarukon epmano inim,

²⁰ eke it Allah wene yig isil lawag ulug mondep isebahon epmano inimen o andorli neken oag weregsoho embebag etno fam, At Kristus Yesus ebe-at o wut oag neken wereg heheg, hit epmano o hobat neken hinombisaharisi-o.

²¹ Eke ariroho weregma, o wut oag etno fam hinibam oag weregsoho wereg hiseheg, aren At Allah ibam sembahyang uruk ambeg ulug fal hisaruk-o.

²² Eke At Kristus hinim dambuksoho welahep etno fam, it Allah udaki obog epmano hinim At Allah ibam Roh Kudus wereg ambeg ulug fal hisaruk-o.