Efesus 1 - Allah Wene Hurumbik Keron

1:1-2

¹ An Paulus, At Allah ahla buruk apareg, At Yesus Kristus awene yig isil lawag ulug mondep nahabahon etnowen, hit Allah udaki o Efesus epmen At Yesus Kristus obam ebetuk wilil At awene eberoko waruk ahebon epmano holal du bal hisihi-o.

² Eke At Ninikni Allah inim eke At Ninowe Yesus Kristus inimen ninabua hisaruk wilil, hinim dambuksoho welamag ulug yig hisihi-o.

At Kristus ahien ninobam umburuk wilil ninindi werehep nisaharuk-o ulug yig isebahon wene 1:3-14

³ Eke At Allah Ninowe Yesus Kristus Ikni etno wa ulug yig imuk-o. Eke nit At Kristus ninim wereg nisalug, At Allah ahien ninobam umburuk wilil, yi angge di angge boholmon epmano obog-at og nisaruk-o.

⁴ Eke o kweanma duma awan wal haruk eleg wilil, nit At Kristus inuk fam At Allah udaki welamag ulug Aren arat imig ninapag-o. Eke nit ninebe At il fam dag seheg eleg-at wilil ninobabut fano-at welamag ulug imig ninapag-o.

⁵ Eke At Allah indi hunduhuken heako ninombisahabareg, At Yesus Kristus inuk fam At udaki inim welamon heako ninombisahiog ulug fuloko ninombisahabag-o. Ariroho fuloko ninombisahabag ari, At ahien haruk wilil, At akeleg-at ahla buruk apareg, fuloko ninombisahabag-o.

⁶ Eke At Allahen ninabua nisaruk wilil, At Amloho indi hunduhukon etno onggo eleg yuhun-at og nisebareg fam, At Allah wa ulug uruk wilil, inuk suontepfuruk amuk-o.

⁷ Eke At Kristus etno amep deloko umbulug warapareg fam, nit hag ninili waruk wilil, dag suruk aheon epmano sohorep isalug, ninobam ninapelegsoho At apma ninombisaharuk-o.

⁸ Eke At Allahen nit ninabua nisaruk wilil, Aren ahmu nisawon etno-at og nisarisi-o. Eke At Allahen bilin ariroho suhuk ulug ahla bebahon etno indimu iluk wilil ilitoho-at sebag-o.

⁹ Eke ariroho suruk apareg fam, At Kristus eyabuk suruk etno fam an nahla buruk ahion etno suhuk-o, ulug bilin herako neken ahla bebahon oke, fobik nit niniluk amag ulug dindiloko yig nisebag-o.

¹⁰ Eke Aren hurumbik dindiloko yig nisebahon etno ilitoho-at suruk aruhu-o. Eke Aren sukon etno arat fanggog ik waharuk aruhumu, yi angge di angge boholma kweanma obog-at wal hebahon epmano At Kristus Ninowe suon welamag ulug dambuksoho ninombisahaku-o.

¹¹ Eke At Allahen yi angge di angge ariroho seg aruhu ulug ahla bebahon etno ilitoho-at seg aruhu-o. Eke At Allah bilin ahla buruk apareg, ariroho suhuk ulug ahla buruk wilil, it inebe dia Inowe At Kristus welaruhu-o, ulug At Allah udaki welamag ulug Aren fuloko ninombisahabag-o.

¹² Ariroho fuloko ninombisahabareg fam, nit bilin neken At Kristusen fano ninabuhu ulug ninindi ebetukukon epmanowen At Allah inuk-at suontepfuruk amuk-o.

¹³ Eke hit ariroho-at wene fano wene demat urukon hinili wawon etno hinesanggo holtuk atikipseg At Kristus obam ebetuk atikip-o. Ebetuk atikipmu, eke At Allahen Roh Kudus og hisahuk ulug abug yig hisarision etno arat og hisarisireg fam, aphe inebe duma An nudaki at-o, ulug yig hisarisi etno hiren demat bukag ulug yig hisarisi-o.

¹⁴ Eke At Roh Kudus etno og hisarisireg fam, At Allahen it nudaki ari fanowon etno og hisahuk ulug abug yig nisebahon etno demat og nisahu ulug ninindi ebetuk wilil, At Allahen aphe At udakion ninili oko suontep nisahaku-o, ulug ninindi ebetuk ahe-o. Eke niren At inuk-at suontepfuruk amuk-o.

At Paulusen hinake sembahyang uruk ahi ulug yig isebahon wene 1:15-23

¹⁵ Eke hiren At Ninowe Yesus obam ebetuk ahebon epmano inim, eke hiren it Allah udaki obog inobam hinindi hunduhuk welahebon epmano inim, obog-at an nesanggo holtuk atikikseg, nintul nantul hit farim At Allah wa ulug yig ituk atikik-o.

¹⁶ Eke hit hinake sembahyang uruk wilil, At Allah Ninowe Yesus Kristus Ikni suon etnowen Roh Kudus og hisawag ulug sembahyang uruk ahi-o. Eke hiren At Allah hiniluk amag ulug, At Roh Kudus etnowen hit hinindi enggatep hisaharuk wilil, At Allah wene etno selegmaroho yig hisaruk-o.

¹⁷ Eke Aren selegmaroho bukaloko yig hisarukon etno hit hinilanggen fenggeneg neken wilil, fanoroho ebebukag ulug sembahyang uruk ahi-o.

¹⁸ Eke hit fanoroho hinindi ebetuk hisalug, fano hinabiog ulug wol hisarision etno inim, eke At udaki ahien inobam umburuk wilil, og hisahuk ulug abug yig hisarision etno inim,

¹⁹ eke nit Allah wene waruk aheon At Allahen oag weregsoho ninoag werehep nisaharukon etno inim, obog-at fanoroho ebebukag ulug yig hisihi-o. Eke nit ninoag werehep nisaharuk etno hag,

²⁰ At Kristus etno it aphe warehon wereg ambeg epmanowen At Allah oag werehon etnowen iluksoho minduhupfuruk apareg, o boholma At inggik bikit fil horieg welamag ulug walug lahabag-o.

²¹ Ariroho walug laharuk apagma, At Kristus etno etlema wilil, yi ap di ap suon inim, eke yi ap di ap inoag werehon inim, eke yi angge di angge inuk suon kidia werehon epmano inim, eke fobik welamuhubon epmano inim obog-at At apma wereg isalug, At Inowe suon wereg-o.

²² Eke At Allahen yi angge di angge obog At Kristus iog alma umburuk apareg, yi angge di angge inim, eke yi aphe di aphe inim inowe suon welamag ulug At udaki At awene warukon epmano og isebag-o. Eke At Kristus etno ariroho At ungguluag neken weregma, it At awene warukon epmano At ebe neken wereg-o.

²³ Ariroho wereg iseheg, eke At Kristus yi angge di angge obog werehep isarukon epmano At udaki inim wilil inebe misig-at wereg-o.