3 Yohanes 1 - Allah Wene Hurumbik Keron

At Yohanesen holal fobik embebahon 1:1-4

¹ Nare Gayus wai. An ap Allah wene yig isarukon etnowen holal du baloko hombahaki.

² Nomin-o, hat hindi fano welahen hag, hat hebe ariroho uk hundereheg eleg welamag ulug hat hake an sembahyang uruk ahi-o.

³ It ninomini epmano waharusareg, at duroho wereg ulug yig nitusa-o. At Allah inuk waruk wilil haren suruk ahenon etno yig nitusa-o. Yig nituk atusama, nahien harikik-o.

⁴ Ari hit nudaki Allah inuk waruk wilil fano surukmu nesanggo holtuk atikikseg, nahien harikik-o.

Hat Gayus fanoroho suruk ahen-o ulug yig epahon wene 1:5-8

⁵ Nomin-o, it Allah udaki epmano hambeg waharukmu, yalmako og inaptuk atikin ari fano-at suruk atikin-o. It ap huso-at ma, yalmag isaruk atikin-o.

⁶ It Allah udaki epmano hat hindi hunduhuk wilil suruk atikinon etno fano yig nitusa.

⁷ It epmano luog ulug surukmu, mondep isa lahun-o. It epmano Kristus yabuk sil nurukon halug, it Allah wene waruk elehonen og isarukmu etno holahup fug-o.

⁸ Ari halug, nit Allah udaki epmanowen ap ari ninambeg waharuk isalug, ninim nohulen, yig isimuk-o. Ariroho yalmag isaruk wilil, eke Allah yabuk etno-at suruk ahe-o, ulug ninindi ebebuk-o.

It Diotrefes Demetrius inaren baloko yig epahon wene 1:9-12

⁹ Eke alem misig du wereg-o. Holal misig anden it Allah inuk warukon epmano og isarikikon oke, eke at ap Diotrefes etnowen an suon-at welahi-o ulug, esanggo holtuk eleg-o.

¹⁰ Fobik an hit hinambeg waruhukseg, aren sirision obog bukaloko yig hisahuk-o. At une dahon urukon etno inim, enggal-at nobam denggeltukon etno inim, obog-at bukaloko yig hisahuk-o. Nin sirision etno du wereg-o. It ninomini hinambeg waharukmu, ninim nohulen ulug yig isaruk eleg-o. Eke it ninen ninim nohulen ulug urukon etno sohorep isiek-o ulug it Allah udaki wereg ambehen selema wilip isiog ulug suruk-o.

¹¹ Nomin-o, it dag sil nurukon epmano inahengga senebuk fug-o. Fano sil nurukon epmano halug, inahengga seneriuk-o. Fanoroho surukon halug At Allahen angge-at wereg-o. Dag surukon halug, At Allah apeleg-at wereg-o.

¹² Ari halug, at Demetrius etno obabut fano-at wereg-o, ulug it obohen yig nituk-o. At obabut fano wereg ulug, Allah wene etnowen yig nituk-o. At obabut fano wereg ulug, anden ariroho demat ulug yig hituk ahi-o.

Wene atog fam arat yig isebahon wene 1:13-15

¹³ Nin yig hisawon anggolo wereg oke, anden hin du fam holal baloko og hipmin fug-o.

¹⁴ Eke horog kidia hinambeg waruhukseg, nuneyen-at ninim wene uhuk-o.

¹⁵ At Allah ahien hobam umbuhu-o. Homini obohen heahi war haptuk etno hag, ninomini heahi war inabiuk-o.