2 Yohanes 1 - Allah Wene Hurumbik Keron

At Yohanesen holal bulmu embebahon 1:1-3

¹ Nahaloho-o, an ap Allah wene yig isarukon etnowen holal du baltuk ahi-o. An it Allah wene urukon epmano ninim wilil, hat inim, hat hudaki inim, hit obog nit ninindi hunduhuk welahe-o.

² Ari Allah wene etno nintul nantul ninindimu wereg halug, hit hinebe ninindi hunduhuk welahe-o.

³ At Ninikni Allah Amloho Yesus Kristus etno inimen nit obog ninobam inahien embeheg, eke fanowon etno inindi hunduhuken og niseheg suruk amag ulug sembahyang uruk ahe-o.

At Allahen wene fanowon yig hisarukon etno-at ebetuk amiek-o 1:4-11

⁴ Nahaloho-o, hat hudaki nin Allah wene warusa-o, ulug nesanggo holtikikseg, nahien harikik-o. At Allahen an nawene wimiek ulug yig nisebag etno fam, an nahien harikik-o.

⁵ Ari halug nahaloho-o, nit ninindi misig-at welam ari fano-o. Wene du akelehon yig hituk ahi fug-o, amuk ebahon etno-at yig hituk ahi-o.

⁶ Nit ninindi misig-at welamuk-o, ulug yig nisebahon ari, At Allahen yig nisarukon etno-at suruk amuk-o. Ariroho suruk amuk yig nisebahon etno wene ebe du at-o, nit ninindi misig-at wilil, ninomini obog-at ninindi hunduhuk welamuk-o.

⁷ Eke alem misig du inim-at yig hituk ahi-o. Ari At Yesus Kristus aphe inebe hahon o kweanma wapag fug-o, ulug aphe inindi kahalik wamag ulug it inenggal urukon inebe anggolo atusareg wereg-o. Inindi kahalik wamuog ulug o duma waharusareg wereg-o. Ari aphe inindi kahaltukon halug, at antikristus, Kristus inim healeg werehon etno-at waharisireg wereg-o.

⁸ Ari halug, hit onggo fanowon og hisawon eleg am nowen, hit hinindi yaharoho welamiek-o. Hit yabuk fano sirikipseg fam, onggo holahubon etno welamag-o.

⁹ Ap misihen At Kristus yanggul nisebahon etno sohorep isalug, obam seberoho yig nisaruk halug, At Allah inuk apeleg wilil yig nisaruk-o. At Kristusen yanggul nisebahon etno-at yig nisaruk halug, At Allah Amloho etno inim indi hunduhuk wereg-o.

¹⁰ At Kristusen yig nisebahon etno ilitoho yig hisalug eleg hinambeg waharuk isalug, ninim nohuk, ulug yig isa fug-o. Eke an nibam kik ma, ulug hinune fanoroho yig isa fug-o.

¹¹ Hinune fanoroho yig isahup halug, hit at ap etnowen dag surukon-at suruk amuhup-o.

Wene atog fam arat yig isebahon wene 1:12-13

¹² Nin anggolo yig humon wereg oke, anden hin fam holal baloko og hipmin fug-o, ari hambeg waruhukseg, nuneyen-at ninim wene uhuk-o. Nuneyen-at hat ninim uruk wilil, ninahiroho uhuk-o.

¹³ Eke hat hot udakien heahi war haptuk-o.