2 Timotius 4 - Allah Wene Hurumbik Keron

¹ Eke At Allah inim, At Kristus Yesus aphe inilukon inim, warehon inim oag del inabuhuon etno inil fam nune oag weregsoho yig hituk ahi-o; At Yesus etno waruhureg, aphe obog Inikni aruhu halug,

² kidia At awene etno yig iseheg, eke it ninen ninindi eheg, eke it ninen ninambit eheg urukon epmano nintul nantul yig iseheg suruk amag ulug yig hituk ahi-o. Eke it inenggal urukon epmano winimug yig iseheg, eke it dahan fahan surukon epmano ariroho siuk ulug yig iseheg, eke it inesanggo wareheg, eke hindi seberoho wilil yanggul iseheg suruk amag ulug yig hituk ahi-o.

³ Eke fobik it aphe ninen wene demat ulug yanggul isawon etno sohorep isalug, inindien-at suruk wilil, ap misihen yanggul niseheg, at misihen yanggul niseheg yig nisarukmu, ninesanggo holtulen yig nisawag-o, ulug uruk amuhupmu, it dindilabug inesanggo holuk inindion etno-at yig isaruk amuhup-o.

⁴ Ariroho suruk amuhup ari fam wene demat urukon etno inesanggo holuk sohorep isalug, we inenggal dindilabug urukon etno-at inesanggo holtuk amuhup-o.

⁵ Ariroho suruk amuhubon oke, eke hat hag nintul nantul hindi aso fanoroho welamuk-o; eke wene fano wene yig isil larukon yabuk etno-at suruk amin-o; eke hat hebe At Allah anggimbu wilil yabuk fanoroho suruk heyeheg, it ninen dahon hobam umburuk isalug, hahla bugsoho welamin-o.

⁶ Eke Allah ake umburuk etno hag, an nebe Allah ake neken umbukon fanggog ik waha-o. Wene ihi ari an nebe waramon etno fanggog ik waha-o.

⁷ Eke it aben onggo huluog ulug buahen laruk etno hag, an nebe wene demat urukon etno nintul nantul eberoko waruk wilil, neyabuk og nitision etno obog-at suruk atikikseg, kidia onggo fanowon etno huliog ulug suruk ahi-o.

⁸ Eke o ari sambit At Allah aphe fanoroho oag del inaptukon etnowen At udaki iniluk welamon etno og niruhu oke, an-at og niruhu fug-o. It aphe inindi At Yesus inim hunduhuk wilil At wamon aso werehon epmano obog-at og nisahu-o.

Holal atog arat balfareg yig epahon wene 4:9-18

⁹ Eke hat hebe dulum ha lahuken ulug suruk amin-o.

¹⁰ Eke at Demas etno hag kweanmen surukon etno indi ebetuk atisireg, sohorep naharisi-o. Sohorep naharuk atisireg, o Tesalonika larisi-o. Eke at Kreskes o Galatia etno larisi-o. Eke at Titus o Dalmatia etno larisi-o.

¹¹ Larusama, eke at Lukas akeleg-at ninim welahe-o. Eke at Markus ebe hag, yabuk ninim suruk amag ulug walug waruhun-o.

¹² Eke at Tikhikus etno o Efesus lahaptikik-o.

¹³ Eke hat waharuk wilil halug, an nasum o Troas at Karpus ibam umbulug waharikikon etno walug manu-o. Eke buku nin epmano inim, eke buku misig ahap fanowon etno inim walug manu-o.

¹⁴ Eke at Aleksander bisuemanggen surukon etnowen dahon nobam imbirisi ari, At Allahen onggo og iruhu-o.

¹⁵ Eke at ap etnowen niren wene yig isarukukon etno mondog nambit irisi halug, hat hag at ebe yaharoho welaruhun-o.

¹⁶ Eke an bilin nili huliog ulug minatlug wene yig isarikikon etno it obohen sohorep naharusa ari, At Allahen inobam inapelegsoho apma umbukag-o.

¹⁷ Eke an nawene etno yig isaruk neyeheg At Ninowe ninim wilil noag werehep naharisimu, it ap Allah wene inapelehon epmano inil fam wene fano wene etno obog dindiloko yig isarikik-o. Yig isaruk atikikmu, wam singa elma dil inaptuk etno hag dil naptisi-o.

¹⁸ Eke it apheyen dahon epmano nobam umburukmu At Allahen nili waruk aruhu-o. Nili waruk aruhureg, boholma At wereg ambeg epma nombahaku-o. Ari halug At inuk-at nintul nantul suontepfuruk amuk-o, ulug an demat yig hisaruk ahi-o.

Atog fam wa ulug yig isebahon wene 4:19-22

¹⁹ Eke it Priskila Akwila inim, eke at Onesiforus, omini epmano inim heahi war inabukag ulug yig hirihi-o.

²⁰ Eke at Erastus etno o Korintus bok welatisi-o. Eke Trofimus etno uk waruk atisimu, o Miletus umbulug waharikik-o.

²¹ Eke hat hag o sohik ambeg etno awan waharuk eleg heheg, dulum-at bik ha lahuken ulug suruk amin-o. Eke at Ebulus, at Pudes inim, at Linus inim, at Klaudia inim, it ninomini obog inimen wa ulug heahi war hinaptuk-o.

²² Eke At Ninowe Yesus Kristus etnowen hat inim, eke hit obog inim hinabua hisaruk wilil, hinim welamag ulug yig hirihi-o.