2 Timotius 3 - Allah Wene Hurumbik Keron

It ninen dahan fahan suruk amuhup-o ulug yig epahon wene 3:1-9

¹ Eke an kidia yig hipminon etno hindi ebetuk amuk-o, eke yi angge di angge angginon fobik aphe inobam wamon epmano hindi ebetuk amin-o.

² Eke fobik it aphe an-at hulik ulug inahla burukon etno inim, an uang nindi urukon etno inim, inindi arikon epmano inim, inonggarehen suontepatarukon etno inim, eke it aphe inobam denggeltukon etno inim, eke iniknisi inune holtuk elehon etno inim, eke wa ulug uruk elehon etno inim, eke Allah wene fanoroho ebetuk elehon etno inim,

³ eke aphe inim hundutuk elehon etno inim, eke aphe inabua haruk elehon etno inim, eke inabug baltukon etno inim, eke yuhun-at sil nurukon etno inim, eke inasine atukon etno inim, eke it ninen fano surukmu nambit ulug urukon etno inim,

⁴ eke inenggal-at yig isarukon etno inim, eke nenekon neken sil nurukon etno inim, eke inonggarehen inindi lehepatarukon etno inim, eke At Allah inim inindi hundutuk welam sohorep isalug it inindien-at surukon etno inim,

⁵ eke inambiliken nit Allah wene waruk aheon at-o uruk wilil nintul nantul ilitoho suruk elehon etno inim, dag surukon etno obog-at it apheyen fobik suhup-o. Ariroho suruk amuhubon oke, hat sohorep isalug wilip amin-o.

⁶ Eke it aphe ariroho surukon ari, aphe inibam kuruk atlug, it hweap yuhun-at werehon epmano inapmarep isuog ulug suruk-o.

⁷ Eke it hweap yuhun-at werehon ari, inindien-at suruk wilil, dag anggolo-at suruk-o. Ariroho suruk wilil, wene keron misig niluk amag ulug surukon oke, wene demat urukon etno inapeleg welamuhup-o.

⁸ Eke o amuk it Yanes Yambres etanowen at Musaen ebahon etno ninambit-o ulug seberepfebag etno hag, kidia it ap inindi elehon epmano wene demat urukon etno inapeleg wilil, wene etno ninambit-o ulug seberepfuruk-o.

⁹ Ariroho seberepfurukon oke, eke it Yanes Yambres urunanggeroho sil nuruk apahon bukal apag etno hag, it ap kidia inenggal urukon epmano it aphe obog inil fam bukal atuk halug, it apheyen sohorep isahup-o.

Yabuk fanoroho suruk amin-o ulug yig epahon wene 3:10–4:8

¹⁰ Eke hat hag, wene yanggul isaruk ahion etno inim, eke an sil nuruk ahion etno inim, eke ariroho suhuk ulug nahla buruk ahion etno inim, eke Allah wene demat ulug nahla ebetuk ahion etno inim, eke aphe winimug yig isaruk ahi fuhon etno inim, eke aphe ninim ninindi hunduhuk welaheon etno inim, eke dahon etno nobam umburukmu nahla bugsoho welahion etno inim, obog-at hiluk welahen-o.

¹¹ Eke o Antiokhia inim, o Ikonium inim, eke o Listra inim dahon mondog nobam umburukmu welatikik etno hiluk-o. Eke iren dahon etno nobam umburuson oke, At Allahen nili warisi-o.

¹² Eke it aphe obog At Kristus inim wilil At awene ilitoho surukon halug, it aphe ninen dahon etno inobam umbuhup-o.

¹³ Eke it dag surukon etno inim, eke it inenggal urukon etno inim, dag mondog suruk wilil welamuhup-o; ariroho wilil, iren aphe inindi kahalik waheg, eke it apheyen it inindi kahalik laheg suruk amuhup-o.

¹⁴ It ariroho suruk amuhubon oke, eke hat hag wene du demat ulug yanggul hitusama eberoko warikin-o. Eke ap dumen yanggul nitusa ulug hiluk welahen-o. Eke hat hebe udag doron famen Alkitab etno hiluk welatikin-o.

¹⁵ Eke Alkitab ari fam wene etno niniluk amuhukseg weregma, At Yesus Kristus obam ebetuk hisalug, aren hinili wahu-o, ulug Alkitaben yig nisaruk-o.

¹⁶ Eke Alkitab ari holal umbukag ulug At Allahen yig isebag etno fam, wene demat urukon etno yanggul niseheg, eke ninesanggo wareheg, eke dahan fahan suruk nisalug ariroho siek-o ulug yig niseheg suruk-o.

¹⁷ Eke Alkitab etno wereg halug, it ap Allah anggimbu wilil yabuk fanowon surukon etno yabuk keroho sik-o ulug iniluk amag ulug yanggul isaruk wereg-o.