2 Timotius 2 - Allah Wene Hurumbik Keron

Hindi oag weregsoho wilil yabuk fanoroho suruk amin-o ulug yig epahon wene 2:1-13

¹ Namloho, hat hag At Yesus Kristus hinim wilil habuen og hitukmu hindi oag weregsoho-at welamin-o.

² Ariroho wilil anden it aphe anggolo wene yig isarukmu holtikikon etno, it aphe ninen it nin yig iseheg, it nin yig iseheg suruk amag ulug wene ari it aphe inobabut fanowon epmano yig isaruk aruhun-o.

³ Eke hat hag, At Yesus Kristus anggimbu fanowon weregma, dahon etno hobam umburuk isalug, hahla bugsoho welamin-o.

⁴ Eke ap misig anggimbu ari, at iknien yig itukon etno-at ilitoho sik ulug ahla buruk wilil, yi yabuk di yabuk werlekon sohorep isaruk-o.

⁵ Eke ap misihen onggo huliog ulug buahen larukon etno hag, it ninen ariroho buahen laruk amuk ulug wene holal embebahon etno ilitoho suruk eleg halug, onggo etno holahu fug-o.

⁶ Eke ap misig eyabuk surukon etnowen fobik anggen wirik atuk halug, aren bilin baluk fano-o.

⁷ Eke yi wene di wene yig hituk ahion epmano At Ninowe etnowen ebe du farim irisi ulug yanggul hemagsoho hindimu fanoroho ebetuk amin-o.

⁸ Ebetuk wilil, eke At Yesus Kristus etno inim obam ebetuk amin-o. Eke At Yesus etno Daud etamu neken weregma, aphe waratuk ambehen iluksoho minduhupfebag ulug, wene fano wene etno aphe yig isil nuruk ahi-o.

⁹ Ariroho yig isil nuruk ahi etno fam, dahon etno nobam umburuk atusareg, ap dahon neken-at hele war naptusa; an nebe hele war naptuson oke, Allah wene etno hele wareg wereg eleg-o.

¹⁰ Eke ari halug, it aphe At Allahen imig inapahon epmano At Yesus Kristus inuk fam inili wawon etno inim, eke iniluk mondog welamon etno inim holawag ulug it inake yabuk suruk neyeheg, it ninen dahon etno nobam umburukon oke, nahla bugsoho welahi-o.

¹¹ Eke wene du demat yig nisaruk wilil, “At ninim waratukuk halug, At ninim-at niniluk welamuhuk-o.

¹² Eke it ninen dahon etno ninobam umburukmu, ninahla bugsoho welamuhuk halug, At ninim-at suon welamuhuk-o. Eke At ebe ninapeleg uruk nisalug, Aren hit hinebe an napeleg ulug yig nisahu-o.

¹³ Eke nit we dorat ninindimu demat ulug ebetuk aheon oke, At hag demat ulug ahla buruk wilil welaruhu-o. Eke Aren bilin ebahon etno onggarehen sohorep isaruk eleg-o.”

It nin inenggal-at wene yanggul isaruk-o ulug yig epahon wene 2:14-26

¹⁴ An ariroho yig hirihion etno haren hudaki yig isaruk wilil, “Hit yi angge di angge farim winimug abuk fug-o,” ulug At Allah il fam yig isaruk amuk-o. Eke yuhun-at winimug aptukon etno fam aphe fano atuk eleg-o; yuhun-at winimug aptukon etno it aphe inesanggo holtuk atlug inindi dag atuk-o.

¹⁵ Eke At Allah hat yabuk fano suruk ahen ulug yig nemag ulug yabuk etno henggali elegsoho wilil suruk amin-o. Eke Allah wene demat ulug yig nisebahon etno fikfag aphe yanggul isaruk amin-o.

¹⁶ Eke At Allah ebe hinapeleg am nowen ulug, yi angge di angge epmano farim winimug aptuk am fug-o.

¹⁷ Eke it yi angge di angge etno farim winimug aptuk wilil, aphe inenggal-at yig isarukon ari, ukmu suon aphe ininu narukon etno ilitoho wereg-o. Eke it ariroho inune inenggal-at yanggul isarukon epmano ininuk misig Himeneus, misig Filetus epmano wereg-o.

¹⁸ It epmanowen wene demat ulug ukon etno sohorep isalug, it aphe nin demat ulug ebetukon epmano inindi kahalukag ulug yig isaruk wilil, “Ninebe min ninaptukon etno fobik min ninabuhu fug-o; arat min ninaptisi-o,” ulug yig isaruk-o.

¹⁹ Iren ariroho yig isarukon oke, eke At Allahen o andorli oag werehon imbirision etno aplohok suhu fug-o; eke o andorli etno fam wene holal umburuk wilil, “At Ninowe etnowen nudaki inebe du at-o ulug iluk wereg-o,” eke misig ari, “It apheyen At Ninowe etnowen angge-at welahi-o ulug urukon etno dag surukon etno sohorep isawag-o,” ulug o andorli etno fam wene holal imbirisi-o.

²⁰ Eke o suon ari fam yi sohorluk di sohorluk anggolo wereg-o. Eke emas olohoreon inim, eke perak olohoreon inim werehon ari inebe suon anduhunmu neken wereg-o, eke e olohoreon inim, eke kwean kabog olohoreon inim werehon ari we doron apma neken wereg-o.

²¹ Eke ari ilitoho ap misihen wene inenggal urukon etno sohorep isaruk halug, sohorluk fanowon anduhunmu wereg etno ilitoho welaruhu-o. Ariroho weregma, At Ninowe etnowen yig isaruk wilil, “Hat hebe fanowon ari yabuk fanowon du suhun-o,” ulug yig iruhu-o.

²² Eke ari halug, it udag elege yuhun-at sil nurukon epmano sohorep isalug, fanoroho surukon etno inim, eke wene demat ulug ebetukon etno inim, eke aphe hinindi hunduhuk welamon etno inim huliog ulug suruk amin-o. Ariroho suruk wilil, it aphe inobabut fanowon epmanowen, “Hat Ninowe yalmag ninabin-o,” ulug urukon etno hinim fanoroho welamuk-o.

²³ Eke it nin inapeleg wilil, urunanggeroho yi angge di angge farim uruk atlug fobik winimug aptuk etno hag, hat ariroho uk fug-o.

²⁴ Eke At Allah anggimbu etnowen winimug abuk ari hai-o. Eke At Allah anggimbu halug, it aphe obog fanoroho inim welaheg, eke wene fanoroho yanggul iseheg suruk amag-o. Eke at ap Allah anggimbu etnowen it inenggal urukon epmano winimug yig isiog ulug suruk halug, une wiogsoho orog-at yig isao fano-o. Une ariroho yig isaruk heheg, At Allahen it ap inenggal urukon epmano inindi werehap inabuhu ano, ulug ahla buruk wilil, orog-at yig isaruk-o.

²⁵ Eke it hag inindi wereg atlug ioba yatuk wilil, wene demat urukon etno iniluk atuk amuhupseg,

²⁶ at iblis ahale elma epmanowen hite wilip amuhup-o. Eke at iblis etnowen it aphe epmano bilin hele warep isarisireg, at iblisen yig itukmu ilitoho suruk amag ulug yig isarision oke, hite wilip amuhup-o.