2 Timotius 1 - Allah Wene Hurumbik Keron

1:1-2

¹ Nomin Timotius wai. An Paulusen hat namloho nindi hunduhukon etno holal du bal hituk ahi-o. Eke nebe etno At Allah indi ebetuk apareg, At Kristus Yesus awene yig isil nuruk amag ulug minduhup naharisireg fam,

² At Kristus Yesus ninim wilil niniluk welamon etno og hisahuk ulug hurumbik yig nisebahon wene etno-at yig isil nuruk ahi-o. Eke ari halug, At Ninikni Allah inim eke At Ninowe Kristus Yesus inim epmanowen inahien hobam embeheg, eke habua heyeheg suruk wilil, hinim welamag ulug yig hirihi-o.

Fobik fanoroho welamuk ulug yig isebahon wene 1:3-18

³ Eke an dag misig sirikikon etno napeleg atlug, it ninetamukien suruk apag etno ilitoho Allah yabuk suruk wilil, Nikni Allah wa ulug yig ituk ahi-o. Eke hat hake nintul nantul sembahyang uruk wilil, wa ulug uruk ahi-o.

⁴ Eke haren ioba yatuk ahenon etno nahla buruk wilil, nahien hahuken hat bik hea wariog ulug nahla buruk ahi-o.

⁵ Eke hat humbia Lois inim, eke hat hisina Eunike inim Allah wene demat ulug eberoko webag etno hag hat ariroho-at Allah wene demat ulug eberoko waruk ahen etno niluk wilil, hobam nindi ebetuk ahi-o.

⁶ Ariroho nindi ebetuk wilil, an bilin hungguluag ninggik senetukmu, At Allahen og hitision etno hahla bukag ulug yig hituk ahi-o.

⁷ Ari halug, At Allahen Roh Kudus og nisarisireg fam ninakoltoho welahe fug-o; eke Aren angge Roh Kudus etnowen oag werehon etno inim eke ninindi seberohon etno inim, kelegsoho og nisaruk-o.

⁸ Ari halug, At Ninowe awene yig isawon etno nenggali ulug uk fug-o. Eke at Paulus Yesus awene yig isarukmu hele watuson etno nenggali ulug uk fug-o. Ariroho uk sohorep isalug, At Allahen hoag werehep haharuk etno fam, wene fano wene etno apma seberoho welamuk-o.

⁹ Eke At Allahen ninili warisireg, hit an nudaki welamuhuben ulug wol ninaptisi-o. Wol ninaptisi ari, niren fano suruk nisalug, wol ninaptisi fug-o. Eke At ahla bulug-at ninabua nisaruk wilil, wol ninaptisi-o. Eke o kweanma duma awan wal haruk eleg wilil, At Yesus Kristus inuk fam ninabua nisebahon oke,

¹⁰ eke kidia At Yesus Kristus ninili warukon etnowen At Allahen hinabua hisaruk-o, ulug dindiloko yig nisarisi-o. Ariroho wene fano wene etno yig nisaruk wilil, hiniluk welamon wene etno yig hisaruk ahi-o, ulug yig nisarisireg fam, waratukon alem etno elegsoho imbirisi-o.

¹¹ Eke wene fano wene yig isil laruk wilil, yanggul isaruk amag ulug At Allahen minduhup naharisireg fam, an kidia hele war naptusa-o.

¹² Hele war naptuson oke, nindi At Allah obam-at ebetuk wilil, At Allahen og hiruhuk ulug irision etno At Yesus waruhu sambit og niriog ulug naso wereg-o, ulug an nenggali elegsoho-at welahi-o.

¹³ Eke wene demat ulug yanggul hitikikon etno ilitoho suruk ariog ulug seneg welaruhun-o. Ariroho At Yesus Kristus hinim wilil, wene du demat ulug eberoko weheg, eke At Yesus inim, it aphe inim hindi hunduhuk welaheg suruk aruhun-o.

¹⁴ Eke oag werehon etno og nisaruk halug, yi angge di angge fanowon og hitision etno fanoroho seneg welaruhun-o.

¹⁵ Eke it obog o Asia werehon epmano inim, eke it Figelus, Hermogenes etno inimen sohorep naharusa etno hat hiluk-o.

¹⁶ Eke at Onesiforus omini inim epmano At Allahen inabua hawag ulug an inake sembahyang uruk ahi-o. At Onesiforus etno an nabua haruk wilil, at Paulus hele wareg wereg ulug akol eleg-at wilil,

¹⁷ o Roma waharisireg, nebe heag nabil waharisireg, bik nea waharisi-o.

¹⁸ Nebe bik nea waharisireg fam, At Yesus waruhu etno sambit At Allahen abua hawag ulug sembahyang uruk ahi-o. Eke at bilin an o Efesus wereg neyeheg yalmag naptisi etno hat hiluk-o.